កម្លាំងនគរបាលនៅច្រកទ្វារព្រំដែនអន្តរជាតិប៉ោយប៉ែតក្នុងខេត្តបន្ទាយមានជ័យ។ រូបថត នគរបាល
ភ្នំពេញៈ ក្រសួងមហាផ្ទៃ បានចេញសេចក្តីប្រកាសស្តីពីការកំណត់នូវអាណត្តិការងាររបស់នាយ និងនាយរងប៉ុស្តិ៍និងការកំណត់ចំនួននាយរងប៉ុស្តិ៍នគរបាលច្រកទ្វារព្រំដែនអន្តរជាតិ និងច្រកទ្វារអាកាសយានដ្ឋានអន្តរជាតិ នៃអគ្គនាយកដ្ឋានអន្តោប្រវេសន៍ដែលអាចបម្រើការងាររយៈពេល ៤ ឆ្នាំ។ សង្គមស៊ីវិលគាំទ្រទៅនឹងការកំណត់អាណត្តិបែបនេះ ដែលនឹងរួមចំណែកលុបបំបាត់អំពើពុករលួយនៅតាមច្រកព្រំដែន។
សេចក្តីប្រកាសរបស់រដ្ឋមន្រ្តីក្រសួងមហាផ្ទៃលោក ស សុខា ចុះថ្ងៃទី២៩ ខែធ្នូ ឆ្នាំ២០២៣ ដែលត្រូវបានផ្សព្វផ្សាយនៅថ្ងៃទី៤ ខែមករា ឆ្នាំ២០២៤ បានឱ្យដឹងថា ចំពោះនាយ និងនាយរងប៉ុស្តិ៍នគរបាលច្រកទ្វារព្រំដែនអន្តរជាតិ និងច្រកទ្វារអាកាសយានដ្ឋានអន្តរជាតិ អាចបម្រើការងារក្នុងអាណត្តិរយៈពេល ៤ឆ្នាំ ហើយនៅពេលចប់អាណត្តិ ត្រូវតែងតាំងមុខតំណែងថ្មី តែងតាំង ជានាយ ឬនាយរងប៉ុស្តិ៍នៅបណ្តាច្រកទ្វារផ្សេងទៀត សម្រាប់អាណត្តិបន្ទាប់ ឬនិយាយម្យ៉ាងទៀតថា ត្រូវប្តូរទីតាំងច្រក។
សេចក្តីប្រកាសនេះបញ្ជាក់ថា ប៉ុស្តិ៍នគរបាលច្រកទ្វារព្រំដែនអន្តរជាតិ និងច្រកទ្វារអន្តរជាតិនីមួយៗ ដឹកនាំដោយនាយប៉ុស្តិ៍ ១ នាក់ និងមាននាយរងប៉ុស្តិ៍ជាជំនួយការខុសៗគ្នាទៅតាមទីតាំង ដែលខ្លះមានចំនួន ១៥រូប ច្រកខ្លះ ១២រូប ខ្លះ ២៥ រូប ខ្លះត្រឹម៨ រូប ខ្លះទៀតត្រឹម ៤ រូប អាស្រ័យតាមទីតាំងជាក់ស្តែង។
នៅក្នុងនោះ គេឃើញមានប៉ុស្តិ៍នគរបាលច្រកទ្វារអាកាសយានដ្ឋាន អន្តរជាតិភ្នំពេញ មាននាយប៉ុស្តិ៍ ១រូប និងនាយរង ១៥រូប នៅឯច្រកអាកាសយានដ្ឋានខេត្តព្រះសីហនុ មាននាយប៉ុស្តិ៍ ១រូប និងនាយរង ១២រូប នៅឯច្រកព្រំដែនប៉ោយប៉ែត មាននាយប៉ុស្តិ៍១រូប និងនាយរង ២៤ រូប ជាដើម។
សេចក្តីប្រកាសនេះ បន្ថែមថា នៅក្នុងករណីមុខតំណែងទាំងនេះ នៅទំនេរដោយមូលហេតុចូលនិវត្តន៍ ឬផ្ទេរចេញ ឬមូលហេតុផ្សេងទៀត នោះនឹងមិនត្រូវបំពេញបន្ថែមឡើយ ដោយនៅរក្សាទុកឱ្យទំនេរដដែល រហូតមានចំនួនស្ថិតនៅក្រោមការកំណត់។
ពាក់ព័ន្ធការកំណត់នេះ លោកប៉ិច ពិសី នាយកប្រតិបត្តិអង្គការតម្លាភាពកម្ពុជាលើកឡើងថា ការរឹតបន្តឹងប្រសិទ្ធភាពតាមច្រកព្រំដែនអន្តរជាតិគឺជារឿងសំខាន់ ដើម្បីធានាដល់សន្តិសុខជាតិ សណ្តាប់ធ្នាប់ ការចេញចូល ការដឹកជញ្ជូន ឆ្លងកាត់ព្រំដែន ដែលចាំបាច់មានការធានាភាពស្អាតស្អំ ការអនុវត្តការងារដោយម៉ឺងម៉ាត់ និងគ្មានអំពើពុករលួយពីសំណាក់មន្ត្រីអនុវត្តច្បាប់នៅតាមច្រកព្រំដែន។
លោកថ្លែងថា៖«សម្រាប់ខ្ញុំយល់ថា ចំណាត់ការថ្មីនេះ មានភាពល្អដែលយើងដូរទីតាំងសម្រាប់ការគ្រប់គ្រងសម្រាប់កន្លែងផ្សេង និងការកំណត់អាណត្តិធ្វើការ ដើម្បីធានាកន្លែងនីមួយៗ ចាក់ឫសគល់ បក្ខពួកនិយម ដែលយើងអាចធ្វើវិធីហ្នឹងដើម្បីបង្ការហានិភ័យផ្សេងៗ»។
ទោះជាយ៉ាងណា លោកប៉ិច ពិសី យល់ថា ចំនួននាយរងប៉ុស្តិ៍តាមច្រកព្រំដែន នៅតែស្ថិតក្នុងចំនួនដ៏ច្រើនលើសលប់ រហូតដល់ចំនួនជាង ២០នាក់ ឬជាង ១០នាក់ ដែលលោកចង់ឱ្យនៅទីតាំងប៉ុស្តិ៍នគរបាលច្រកទ្វារព្រំដែនអន្តរជាតិនីមួយៗមាននាយរង ត្រឹមពី ៤ ទៅ៥ នាក់ ដើម្បីមានការបែងចែកតួនាទីនិងភារកិច្ចច្បាស់លាស់ ចៀសវាងកើតមានការិយាធិបតេយ្យ ។
ជាមួយគ្នានេះ លោកយង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព គាំទ្រទៅលើយន្តការកំណត់អាណត្តិមន្ត្រីច្រកព្រំដែន និងការផ្លាស់ទីតាំងបម្រើការងារ ដែលជាការបង្ការអំពើពុករលួយកើតចេញពីការដុះស្នឹមនៃខ្សែបក្ខពួកនិយម។
មិនខុសពីលោកប៉ិច ពិសី លោកយង់ គិមអេង មិនពេញចិត្តត្រង់ការអនុញ្ញាតឱ្យមានចំនួននាយរងប៉ុស្តិ៍ច្រើនពេក ដោយលោកស្នើឱ្យកំណត់ចំនួននាយរងប៉ុស្តិ៍តិចតួច ហើយបើកឱ្យមានចំនួនមន្ត្រីបច្ចេកទេសច្រើនវិញដើម្បីបង្កើនប្រសិទ្ធភាពការងារ។
លោកសង្កេតឃើញថា៖«នៅតាមច្រកព្រំដែនយើង គឺមានភាពអវិជ្ជមានត្រង់បញ្ហាអំពើពុករលួយ ពោលគឺការទារលុយខាងក្រៅជាដើម ដែលក្រសួងគួរពិនិត្យបញ្ហានេះ ដោយបង្កើតប្រព័ន្ធត្រួតពិនិត្យមួយដែលមានប្រសិទ្ធភាព ធ្វើយ៉ាងណាឱ្យមន្ត្រីអនុវត្តច្បាប់គោរពច្បាប់»៕
