លោក ហេង សួរ រដ្ឋមន្ត្រីក្រសួងការងារ។ ក្រសួងការងារ
ភ្នំពេញៈ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសឱ្យពលរដ្ឋមានការប្រុងប្រយ័ត្នចៀសវាងចាញ់បោកជនខិលខូច ជុំវិញការប្រកាសជ្រើសរើសពលករខ្មែរ ទៅបម្រើការងារនៅប្រទេសអ៊ីស្រាអែល ខណៈកម្ពុជា-អ៊ីស្រាអែល ពុំទាន់មានកិច្ចព្រមព្រៀងជាផ្លូវការ ក្នុងការបញ្ជូនពលករនៅឡើយ។
ប្រកាសនេះ ធ្វើឡើងបន្ទាប់ពីក្រសួងការងារបានទទួលបានព័ត៌មានថា មានបុគ្គល ១ រូប បានបង្កើតគណនីតេឡេក្រាមឈ្មោះ ISRAEL WORK ២០២៤ ដើម្បីជ្រើសរើស និងបញ្ជូនពលករឱ្យទៅធ្វើការងារនៅប្រទេសអ៊ីស្រាអែល ដោយខុសច្បាប់។ សេចក្តីជូនដំណឹងរបស់ក្រសួងការងារចុះថ្ងៃទី ៣ ខែមករា បានឱ្យដឹងថា បច្ចុប្បន្នក្រសួងកំពុងធ្វើការជាមួយភាគីអ៊ីស្រាអែល ដើម្បីពិភាក្សាលើសេចក្តីព្រាងអនុស្សរណៈនៃការយោគយល់គ្នាស្តីពីការជ្រើសរើស និងការបញ្ជូនពលករ ប៉ុន្តែភាគីទាំង ២ នៅពុំទាន់មានកិច្ចព្រមព្រៀងស្តីពីការបញ្ជូនពលករទៅធ្វើការនៅអ៊ីស្រាអែលនៅឡើយទេ។ ការបំភ្លឺរបស់ក្រសួងនាពេលនេះ ដើម្បីបង្ការនូវការឆបោករបស់ជនខិលខូចលើប្រជាពលរដ្ឋខ្មែរ។
ក្រសួងស្នើថា ក្នុងករណីបានឃើញ ឬមានការផ្សព្វផ្សាយពីការជ្រើសរើសពលករទៅបម្រើការងារនៅប្រទេសអ៊ីស្រាអែល ក្នុងរូបភាពណាក៏ដោយ សូមជូនដំណឹង ឬរាយការណ៍មកកាន់ក្រសួងការងារ តាមរយៈ Hotline ១២៩៧ ជាបន្ទាន់ ដើម្បីអាចឱ្យក្រសួងពិនិត្យ និងចាត់វិធានការតាមផ្លូវច្បាប់។
លោក ហេង សួរ រដ្ឋមន្ត្រីក្រសួងការងារបានឱ្យដឹងតាមរយៈហ្វេសប៊ុកថា មានករណីបុគ្គលមួយរូបដែលមានឈ្មោះក្នុងតេឡេក្រាម មៀន សុដារ៉ា បានបង្កើតតេឡេក្រាមឈ្មោះ ISRAEL WORK ២០២៤ ដើម្បីជ្រើសរើស និងបញ្ជូនពលករឱ្យទៅធ្វើការងារនៅអ៊ីស្រាអែល ដោយខុសច្បាប់។
លោកក្រើនរំឭកពលរដ្ឋឱ្យមានការប្រុងប្រយ័ត្នកុំឱ្យចាញ់បោកបុគ្គល MEAN Sodara ឬខ្លឹមសារដែលបានផ្សព្វផ្សាយនៅ ISRAEL WORK ២០២៤ ឱ្យសោះ។
លោកថ្លែងថា៖ «ខ្ញុំសូមបញ្ជាក់ជូនសាធារណជនថា បច្ចុប្បន្នកម្ពុជាមិនទាន់បានចុះកិច្ចព្រមព្រៀងក្នុងការបញ្ជូនពលករទៅធ្វើការនៅប្រទេសអ៊ីស្រាអែល នៅឡើយ ពោលគឺយើងកំពុងស្ថិតនៅក្នុងដំណាក់កាលពិភាក្សាគ្នានៅឡើយ ដូច្នេះការចេញទៅធ្វើការនៅប្រទេសអ៊ីស្រាអែល តាមរយៈមេខ្យល់ ឬរូបភាពក្លែងបន្លំឯកសារជាសិស្ស ឬជានិស្សិត គឺជាករណីខុសច្បាប់ និងជាបទល្មើសនៃការជួញដូរមនុស្ស»។
បើតាមលោករដ្ឋមន្ត្រីក្រសួងការងារកំពុងធ្វើការជាមួយគណៈកម្មាធិការជាតិប្រយុទ្ធប្រឆាំងការជួញដូរមនុស្សដើម្បីចាត់វិធានការដល់បុគ្គលខាងលើនេះ។
លោក មឿន តុលា ប្រធានអង្គការសង់ត្រាល់ថ្លែងថា រាជរដ្ឋាភិបាលគួរតែបង្កើនការងារ និងមុខរបរក្នុងស្រុកជូនពលរដ្ឋឱ្យបានច្រើនជាជាងការធ្វើចំណាកស្រុកនៅក្រៅប្រទេស។ លោកសង្កេតឃើញថា កន្លងមកពលករខ្មែរដែលទៅធ្វើការនៅប្រទេសថៃ ប្រទេសម៉ាឡេស៊ី មានកម្រិតចំណេះដឹងទាប រួមទាំងកម្ពុជាខ្លួនឯង បានចុះអនុស្សរណៈនៃការយោគយល់គ្នាជាមួយប្រទេសទាំងនោះ គឺមានចំណុចខ្សោយជាច្រើន ពោលមិនបានគិតគូរពីប្រាក់ឈ្មួលគោលសិទ្ធិទទួលបានការងារសមរម្យក៏ដូចជាសិទ្ធិក្នុងការចូលរួមជាមួយសមាគម និងសហជីពជាដើម។
«ប្រសិនជាកម្ពុជាបានចុះអនុស្សរណៈជាមួយអ៊ីស្រាអែល គ្រាន់តែសម្លឹងមើលចំនួនពលករដែលគេអាចទទួលយកទេ ដោយអត់បានគិតគូរពីសិទ្ធិសេរីភាពមូលដ្ឋានរបស់ពលរដ្ឋដូចជាសិទ្ធិទទួលបានប្រាក់ឈ្មួលគោល និងសិទ្ធិទទួលបានការងារសមរម្យ ម៉ោងការងារសមរម្យ គឺអត់ល្អទេ»។
បន្ថែមពីនេះលោក មឿន តុលា បានលើកឡើងថា បើមិនមានការគិតគូរលើចំណុចទាំងអស់នេះ ចំពោះពលករខ្មែរដែលមានចំណេះដឹងវប្បធម៌តិចតួចទាំងនោះ នឹងងាយរងគ្រោះធ្ងន់ធ្ងរទៅលើការកេងប្រវ័ញ្ចកម្លាំងពលកម្ម និងការរំលោភបំពាននានា។ ហេតុដូចនេះក្នុងនាមសង្គមស៊ីវិល លោកសូមលើកទឹកចិត្តឱ្យរាជរដ្ឋាភិបាល មានការគិតគូរអំពីវិធីក្នុងការបង្កើនឱកាសការងារក្នុងស្រុកដល់ពលរដ្ឋ ដើម្បីទប់ស្កាត់ពលករខ្មែរធ្វើចំណាកស្រុកដោយប្រថុយប្រថានទៅក្រៅប្រទេស៕
