ពលកររស់នៅកូរ៉េខាងត្បូងទទួលបានកម្មវិធីបន្តសុពលភាពលិខិតឆ្លងដែនដោយឥតគិតថ្លៃ នាពេលកន្លងទៅ។ រូបថត ស្ថានទូតកម្ពុជាប្រចាំប្រទេសកូរ៉េខាងត្បូង
អនុវត្តតាមប្រសាសន៍ដឹកនាំរបស់លោកនាយករដ្ឋមន្ត្រី ហ៊ុន ម៉ាណែត ក្រសួងមហាផ្ទៃ បានសម្រេចដាក់ឱ្យដំណើរការសេវាផ្តល់លិខិតឆ្លងដែនធម្មតាជូនប្រជាពលរដ្ឋ និងពលករកម្ពុជាដែលកំពុងស្នាក់នៅ និងធ្វើការនៅសាធារណរដ្ឋកូរ៉េ ចាប់ពីថ្ងៃទី ១០ ខែមករា ឆ្នាំ ២០២៤ តទៅ។
សេចក្តីជូនដំណឹងរបស់ក្រសួងមហាផ្ទៃចុះថ្ងៃទី ៥ ខែមករា ឆ្នាំ ២០២៤ បញ្ជាក់ថា ទីតាំងផ្តល់សេវាខាងលើនេះ ស្ថិតនៅស្ថានទូតនៃព្រះរាជាណាចក្រកម្ពុជាប្រចាំនៅសាធារណរដ្ឋកូរ៉េចាប់ពីថ្ងៃចន្ទ ដល់ថ្ងៃសុក្រ លើកលែងថ្ងៃសម្រាក ឬការកំណត់ដោយឡែក ចាប់ពីម៉ោង ៩ ព្រឹកដល់ម៉ោង៥ល្ងាច។
ចំពោះបែបបទនៃការផ្តល់លិខិតឆ្លងដែនធម្មតា គឺក្នុងករណីពលរដ្ឋដែលមានអាយុចាប់ពី១៥ឆ្នាំឡើង ត្រូវមានឯកសារលិខិតឆ្លងដែនច្បាប់ដើម (ដែលផុតឬជិតផុតសុពលភាព) ឬអត្តសញ្ញាណប័ណ្ណសញ្ជាតិខ្មែរឬសេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត ឬឯកសារផ្សេងទៀតដែលបញ្ជាក់អំពីសញ្ជាតិខ្មែរ និង សៀវភៅស្នាក់នៅ ឬសៀវភៅគ្រួសារ ឬលិខិតបញ្ជាក់ទីលំនៅដែលចេញដោយស្ថានទូត នៃព្រះរាជាណាចក្រកម្ពុជាប្រចាំនៅបរទេស។
ដោយឡែកក្នុងករណីទារក ឬកុមារដែលមានអាយុក្រោម១៥ឆ្នាំ ត្រូវមានឯកសារដូចចំណុច (ក) ខាងលើ ដោយភ្ជាប់បន្ថែមនូវឯកសារលិខិតអនុញ្ញាតជាលាយលក្ខណ៍អក្សរពីឪពុក ឬម្តាយ ឬអាណាព្យាបាល និងសំបុត្រពេទ្យ (ករណីកើតនៅក្រៅប្រទេស)។ សម្រាប់រយៈពេលផ្តល់លិខិតឆ្លងដែននឹងត្រូវផ្តល់ជូនក្នុងរយៈពេល៤-៥សប្ដាហ៍ គិតចាប់ពីថ្ងៃស្នើសុំ។
ជាមួយគ្នានោះដែរ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២ ខែមករា ឆ្នាំ២០២៤នេះ បានចេញសេចក្តីជូនដំណឹងដល់ប្រជាពលរដ្ឋ និងពលករខ្មែរ ដែលកំពុងស្នាក់នៅនិងធ្វើការនៅសាធារណរដ្ឋកូរ៉េទាំងអស់ អាចទៅទទួលសេវាធ្វើលិខិតឆ្លងដែនធម្មតានៅតាមស្ថានទូតរយៈពេល ៤ខែ ចាប់ពីខែមករា ឆ្នាំ២០២៤ នេះតទៅ។
ក្រសួងបានបញ្ជាក់ទៀតថា ៖«ការផ្តល់សេវាធ្វើលិខិតឆ្លងដែននៅស្ថានទូតនេះស្របតាមអនុសាសន៍ ណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការការសម្របសម្រួលធ្វើលិខិតឆ្លងដែននៅក្រៅប្រទេស ដើម្បីកុំឱ្យពលករជួបការលំបាកធ្វើដំណើរមកកម្ពុជា ក្នុងការធ្វើលិខិតឆ្លងដែន»។
ជាមួយគ្នានេះដែរ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) បានគាំទ្រចំពោះយន្តការនេះ ដែលជាចំណែកសម្រួលដល់ប្រជាពលរដ្ឋខ្មែរនៅកូរ៉េខាងត្បូង ជាពិសេសពលករខ្មែរ ដោយមិនចាំបាច់ធ្វើដំណើរមកកាន់កម្ពុជា។ ប៉ុន្តែលោកចង់ឃើញការធ្វើលិខិតឆ្លងដែននេះ ស្ថិតក្នុងតម្លៃមួយដ៏សមរម្យអាចត្រឹម ២០ ដុល្លារអាមេរិក ដើម្បីជួយសម្រួលដល់ពលករខ្មែរ។
លោកបានប្រាប់ថា៖ «សម្រាប់ខ្ញុំនៅក្នុងកិច្ចការងារនេះ ខ្ញុំសំណូមពរឱ្យពិនិត្យមើលតម្លៃធ្វើលិខិតឆ្លងដែននោះឱ្យទាបតាមដែលអាចធ្វើបានហើយពន្លឿនការធ្វើលិខិតឆ្លងដែន បើអាចធ្វើត្រឹម ១ ម៉ោង ឬកន្លះម៉ោងអីបានរឹតតែល្អ ដោយសារពលករយើងមកពីចម្ងាយដោយទៅធ្វើតែ ១ លើក គឺបានលិខិតតែម្តង ហើយបើសិនជាអាចយើងអាចធ្វើនៅថ្ងៃឈប់សម្រាក ដើម្បីជួយសម្រួលពលករ មិនចាំបាច់សុំច្បាប់ឈប់សម្រាក»។
គួរជម្រាបថា ក្នុងពិធីសំណេះសំណាលជាមួយកម្មករ និយោជិត មកពីរោងចក្រ សហគ្រាសនានា ក្នុងខេត្តកំពង់ស្ពឺ នាព្រឹកថ្ងៃទី៩ ខែកញ្ញា ឆ្នាំ២០២៣ លោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យក្រសួងស្ថាប័ន ពាក់ព័ន្ធរៀបចំទីតាំងធ្វើលិខិតឆ្លងដែនកម្ពុជា នៅក្រៅប្រទេសដែលនឹងចាប់ផ្ដើមពីប្រទេសកូរ៉េមុនគេ ព្រមទាំងបង្កើតកុងស៊ុល បន្ថែមនៅភាគខាងត្បូងប្រទេសថៃ ដើម្បីសម្រួលដល់ពលករ ឬប្រជាពលរដ្ឋខ្មែរ រស់នៅក្រៅប្រទេសក្នុងការទទួលសេវាផ្សេងៗ៕
