លោក ជា ចាន់តូ អតីតអគ្គទេសាភិបាលធនាគារជាតិនៃកម្ពុជា។ រូបថត AKP
ថ្នាក់ដឹកនាំកម្ពុជាផ្ញើសាររំលែកទុក្ខដល់ក្រុមគ្រួសារលោក ជា ចាន់តូ អតីតអគ្គទេសាភិបាលធនាគារជាតិនៃកម្ពុជា, អគ្គទេសាភិបាលកិត្តិយសធនាគារជាតិនៃកម្ពុជា និងជាតំណាងរាស្ត្រមណ្ឌលខេត្តកំពង់ធំ ដែលបានទទួលមរណភាព នៅថ្ងៃទី២៥ ខែតុលានេះ ក្នុងជន្មាយុ ៧៣ឆ្នាំដោយរោគាពាធ។
ក្នុងលិខិតរបស់លោកទៅកាន់លោកស្រី ខៀវ ស៊ីណា ដែលជាភរិយារបស់លោក ជា ចាន់តូ លោកនាយករដ្ឋមន្ត្រី ហ៊ុន ម៉ាណែត បានថ្លែងថា លោកនិងភរិយាពិតជាមានសេចក្ដីក្ដុកក្ដួលរំជួលចិត្តជាពន់ពេក និងសោកស្តាយចំពោះមរណភាពរបស់លោក ជា ចាន់តូ។
លោកថ្លែងថា មរណភាពរបស់លោក ជា ចាន់តូ គឺជា «ការបាត់បង់ឥស្សរជនដ៏ឆ្នើមរបស់ជាតិ ដែលតែងតែបានធ្វើពលិកម្មគ្រប់បែបយ៉ាង ក្នុងបុព្វហេតុ ជាតិ សាសនា ព្រះមហាក្សត្រ លើកស្ទួយ កិត្យានុភាពជាតិលើឆាកអន្តរជាតិ និងធ្លាប់បានបំពេញបេសកកម្មដ៏ឧត្តុង្គឧត្តមបំផុតជូនប្រទេសជាតិ តាមរយៈការកំណត់ និងដឹកនាំគោលនយោបាយរូបិយវត្ថុ សំដៅរួមចំណែកជំរុញការអភិវឌ្ឍសង្គម សេដ្ឋកិច្ច ក្នុងក្របខ័ណ្ឌគោលនយោបាយសេដ្ឋកិច្ច និងហិរញ្ញវត្ថុនៃព្រះរាជាណាចក្រកម្ពុជា ជារៀងរហូតមក»។
លោកស្រី ឃួន សុដារី ប្រធានរដ្ឋសភា ក៏បានផ្ញើរសាររំលែកទុក្ខដល់ក្រុមគ្រួសារលោក ជា ចាន់តូ ផងដែរ។
លោកស្រីថ្លែងថាលោក ជា ចាន់តូ បានដឹកនាំវិស័យធនាគារ និងហិរញ្ញវត្ថុកម្ពុជា ឲ្យមានការរីកចម្រើនយ៉ាងខ្លាំង ដែលចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចប្រទេសកម្ពុជា តាមរយៈការលើកកម្ពស់គោលនយោបាយ សេដ្ឋកិច្ច និងរូបិយវត្ថុ និងការប្រើប្រាស់រូបិយប័ណ្ណក្នុងស្រុក។
លោកស្រីថ្លែងថា៖ «ទោះបីរូបកាយ ឯកឧត្តម បានបាត់បង់ទៅក៏ពិតមែន ប៉ុន្តែកេរដំណែល កិត្តិយស សេចក្តីថ្លៃថ្នូរ ភាពអំណត់តស៊ូ និងស្នាដៃ របស់ឯកឧត្តមនឹងនៅស្ថិតស្ថេរក្នុងចិត្តក្រុម គ្រួសារ ញាតិមិត្តជិតឆ្ងាយ ថ្នាក់ដឹកនាំនិងមន្ត្រីរដ្ឋសភា ព្រមទាំងប្រជាពលរដ្ឋទាំងអស់ជានិច្ចនិរន្តរ៍»។
លោក ជា ចាន់តូ ត្រូវបានតែងតាំងជាអគ្គទេសាភិបាលធនាគារជាតិនៃកម្ពុជា ចាប់ពីឆ្នាំ១៩៩៨ ដល់ឆ្នាំ២០២៣។ លោកធ្លាប់ជារដ្ឋមន្ត្រីក្រសួងផែនការពីឆ្នាំ១៩៨៦ ដល់ឆ្នាំ១៩៩៨ និងបានបញ្ចប់ថ្នាក់បណ្ឌិតផ្នែកគ្រប់គ្រងធុរកិច្ចពីសាកលវិទ្យាល័យ Southern California សហរដ្ឋអាមេរិក នៅឆ្នាំ១៩៩៥៕
