ភ្នំពេញៈ ប្រទេសកម្ពុជានឹងពង្រីកការទូតបរិស្ថានរបស់ខ្លួននៅលើឆាកអន្តរជាតិ ដើម្បីផ្សព្វផ្សាយនូវភាពស្អាតរបស់កម្ពុជា នៅពេលចូលរួមសន្និសីទ នៃរដ្ឋភាគីកិច្ចព្រមព្រៀង អង្គការសហប្រជាជាតិស្តីពីជីវៈចម្រុះ លើកទី១៦ (COP16) នៅទីក្រុងកាលី ប្រទេសកូឡុំប៊ី ដែលមានប្រទេសជិត ២០០ចូលរួម។
រដ្ឋមន្រ្តីក្រសួងបរិស្ថាន លោក អ៊ាង សុផល្លែត ដែលតំណាងប្រមុខរដ្ឋាភិបាល លោកនាយករដ្ឋមន្រ្តីហ៊ុន ម៉ាណែត បានដឹកនាំប្រតិភូជាន់ខ្ពស់កម្ពុជាទៅចូលរួមកិច្ចប្រជុំ ដែលបានចាប់ផ្តើមកាលពីថ្ងៃទី២១ ខែតុលា ដល់ថ្ងៃទី១ ខែវិច្ឆិកា ឆ្នាំ២០២៤នេះ។
លោករដ្ឋមន្រ្តីបានថ្លែងនៅមុនពេលចេញដំណើរទៅចូលរួមប្រជុំនេះ នាយប់ថ្ងៃទី២៦ ខែតុលានេះថា អ្វីដែលជាការរំពឹងទុកនោះ គឺកម្ពុជា នឹងពង្រីកការទូតបរិស្ថានកម្ពុជា ទៅលើឆាកអន្តរជាតិ ដើម្បីធ្វើយ៉ាងណាផ្សព្វផ្សាយនូវភាពស្អាតរបស់កម្ពុជា។
លោកបញ្ជាក់ថា៖«ដូចខ្ញុំបានដាក់ចេញអញ្ជឹង ភាពស្អាតរបស់កម្ពុជាមាន៣ ទី១ ភាពស្អាតក្នុងផ្នត់គំនិតរបស់កម្ពុជា ទី២ ភាពស្អាតនៅក្រៅខ្លួន ប៉ុន្តែនៅក្នុងដែនប្រទេសកម្ពុជា ៣ ភាពស្អាតរបស់កម្ពុជានៅលើឆាកអន្តរជាតិ។ ដំណើរចូលរួមកិច្ចប្រជុំនេះគឺដើម្បីចូលរួមផ្សព្វផ្សាយ ធ្វើយ៉ាងណាឱ្យអន្តរជាតិយល់ដឹងកាន់តែច្បាស់ឡើងពីកិច្ចប្រឹងប្រែងរបស់កម្ពុជា ពីភាពស្អាតរបស់កម្ពុជា ជៀសវាងយល់ច្រលំពីកម្ពុជា»។
លោកបានលើកឡើងថា កិច្ចប្រជុំ COP16 ដែលពាក់ព័ន្ធនឹងជីវៈចម្រុះនេះ គឺផ្តោតលើការយកចិត្តទុកដាក់ ប្រមែប្រមូលកៀរគរ និងពិចារណាថាតើ ពិភពលោកនេះគប្បីធ្វើយ៉ាងណាខ្លះដើម្បីថែទាំ អភិរក្ស និងអភិវឌ្ឍជីវៈចម្រុះនៅតាមប្រទេសនីមួយៗ។
ប្រទេសទាំង ១៩៦ប្រទេសនេះ នឹងនាំគ្នារំលេចចេញនូវបញ្ហានិងផ្តល់ជាដំណោះស្រាយទាំងឡាយ ហើយនឹងប្រឹងប្រែងកៀរគរថវិកា ដែលធ្វើយ៉ាងណាឱ្យបានប្រមាណ ៧០០ពាន់លានក្នុងមួយឆ្នាំ។
លោកបន្តថា ថវិកា ៧០០ពាន់លាននេះនឹងយកមកចែកជូនទៅប្រទេសកំពុងអភិឌ្ឍន៍ក្នុងនោះរួមទាំងកម្ពុជាផងដែរ ដើម្បីយកមកថែរក្សានិងអភិរក្ស ធនធានជីវៈចម្រុះកម្ពុជា និង ជីវៈចម្រុះនៅទូទាំងពិភពលោក។
លោករដ្ឋមន្រ្តីបានថ្លែងដូច្នេះថា៖ «កម្ពុជាយើងនឹងចេញសេចក្តីថ្លែងការណ៍ថ្នាក់ជាតិនៅទីនោះដែរ ដើម្បីឆ្លុះបញ្ជាំងនូវការប្តេជ្ញាចិត្តរបស់កម្ពុជាយើងផង និងដំណើរការក្នុងការការពារធនធានធម្មជាតិរបស់កម្ពុជាយើងផង។ ទាំងនេះគឺសុទ្ធសឹងតែជាធាតុចូលដែលកម្ពុជានឹងផ្តល់ជូនផង និងក៏ជាការប្តេជ្ញាចិត្តរបស់កម្ពុជាផង ក្នុងការអភិរក្សជីវៈចម្រុះកម្ពុជា»។
យោងតាមក្រសួងបរិស្ថាន បានឱ្យដឹងថា កម្ពុជាបានត្រៀមខ្លួនរួចជាស្រេច ក្នុងការដោះស្រាយបញ្ហាសកល ជាមួយអន្តរជាតិ ផ្អែកតាមយុទ្ធសាស្រ្ត និង ការអនុវត្តសកម្មភាពប្រកបដោយការប្តេជ្ញាចិត្តខ្ពស់។ ប្រតិភូរាជរដ្ឋាភិបាលកម្ពុជា នឹងលើកយកគោលនយោបាយជាតិ យុទ្ធសាស្រ្តចក្រាវិស័យបរិស្ថាន វិធានការការពារនិងអភិរក្សធនធានធម្មជាតិនៅកម្ពុជា ជាពិសេស យុទ្ធនាការកាត់បន្ថយការប្រើប្រាស់ប្លាស្ទិក ការដាំដើមឈើឱ្យបានច្រើន ដើម្បីបង្កើនគម្របព្រៃ ការអភិវឌ្ឍវិស័យឌីជីថល និង ការពង្រឹងកិច្ចសហប្រតិបត្តិការ កៀរគរការគាំទ្រ ដើម្បីធានាការអភិរក្សជីវៈចម្រុះ និងការលើកកម្ពស់ជីវភាពប្រជាពលរដ្ឋនៅតាមសហគមន៍មូលដ្ឋានជាដើម។
ក្រៅពីការឡើងថ្លែងសន្ទរកថាក្នុងកិច្ចប្រជុំនោះ លោករដ្ឋមន្រ្តីក៏នឹងទទួលជួបសម្តែងការគួសម និងពិភាក្សាការងារ ជាមួយបណ្តាមេដឹកនាំនៃប្រទេសជាមិត្តមួយចំនួន ដៃគូអភិវឌ្ឍន៍ និងតំណាងវិស័យឯកជនផងដែរ ដើម្បីពង្រឹងនិងពង្រីកកិច្ចសហប្រតិបត្តិការ លើការងារគ្រប់គ្រងធនធានធម្មជាតិ ការអភិរក្សជីវៈចម្រុះ ដើម្បីការរស់នៅប្រកបដោយចីរភាព។
កិច្ចប្រជុំ COP15 កាលពីឆ្នាំ២០២២ ត្រូវបានធ្វើឡើងនៅក្នុងទីក្រុង ម៉ុងរ៉េអាល់ ប្រទេសកាណាដា ដែលកិច្ចព្រមព្រៀងជាលក្ខណៈអន្តរជាតិមួយត្រូវបានឯកភាព ដើម្បីការពារ ៣០ភាគរយនៃផ្ទៃដី និងមហាសមុទ្រ (៣០គុណ៣០) នៅឆ្នាំ ២០៣០៕