លោកគ្រូ-អ្នកគ្រូ និងសិស្សានុសិស្សនៃសាលាបឋមសិក្សាពាមឆ្កោក ក្នុងស្រុកជលគីរី បានចុះធ្វើយុទ្ធនាការ «កម្ពុជាស្អាត ខ្មែរធ្វើបាន» ព្រមទាំងធ្វើអនាម័យសម្អាតបរិស្ថានតាមដងផ្លូវនិងបរិវេណសាលា កាលពីសប្តាហ៍មុន។ រូបថត មន្ទីរបរិស្ថានខេត្តកំពង់ឆ្នាំង
កំពង់ឆ្នាំងៈ រដ្ឋបាលខេត្តកំពង់ឆ្នាំងកំពុងតែដំណើរការរៀបចំខ្លួន ដើម្បីប្រែក្លាយទៅជាខេត្ត«ស្អាត គំរូមុនគេ»ក្នុង ចំណោម រាជធានី ខេត្តទូទាំងប្រទេស ទៅតាមការ ជ្រើសរើសរបស់ក្រសួងបរិស្ថាន តាមរយៈយុទ្ធនាការ«ថ្ងៃនេះ ខ្ញុំមិនប្រើថង់ប្លាស្ទិកទេ» និង«កម្ពុជាស្អាត ខ្មែរធ្វើបាន»។
អភិបាលខេត្តកំពង់ឆ្នាំង លោកស៊ុន សុវណ្ណារិទ្ធិ បានឱ្យដឹងថា ក្រោយពីក្រសួងបរិស្ថានបានជ្រើសរើសយកខេត្តកំពង់ឆ្នាំជាខេត្តស្អាត និងគ្មានសំរាមមុនគេនោះមក រដ្ឋបាលខេត្ត និងអង្គភាពពាក់ព័ន្ធកំពុងតែចាប់ផ្តើមដំណើរការរៀបចំខ្លួនទៅតាមលក្ខខណ្ឌ ដែលតម្រូវ។
លោកបញ្ជាក់ប្រាប់ភ្នំពេញប៉ុស្តិ៍ថា៖«ខាងក្រសួងគាត់ចង់ឱ្យខេត្តយើងជាខេត្តមួយ ដើម្បីកុំឱ្យមានសំរាម។ អញ្ជឹងយើងកំពុងតែរៀបចំបង្កើតក្រុមការងារ ដើម្បីរៀបចំខ្លួនឱ្យស្របទៅតាមលក្ខខណ្ឌរបស់ក្រសួងបរិស្ថាន ដើម្បីយើងក្លាយខ្លួនជាខេត្តអត់មានសំរាម»។
រដ្ឋលេខាធិការក្រសួងបរិស្ថាន លោកសាបូ អូហ្សាណូ បានដឹកនាំក្រុមការងារនាយកដ្ឋានគ្រប់គ្រងសំណល់រឹង ទៅខេត្តកំពង់ឆ្នាំង កាលពីពេលថ្មីៗនេះ ដើម្បីជួបប្រជុំជាមួយរដ្ឋបាលខេត្ដកំពង់ឆ្នាំង ស្តីពីពិនិត្យពិភាក្សាលើការរៀបចំប្រែក្លាយខេត្តកំពង់ឆ្នាំង «ជាខេត្តស្អាត គំរូមុនគេនៅទូទាំងប្រទេស» ដោយមានការចូលរួមពីតំណាងរដ្ឋបាលក្រុង ស្រុក មន្ទីរបរិស្ថាន និងអង្គភាពចំណុះ។ នេះបើយោងតាមក្រសួងបរិស្ថាន។
កិច្ចប្រជុំនេះធ្វើឡើង ដើម្បីបន្តជំរុញការអនុវត្តយុទ្ធនាការដែលបានដាក់ចេញ ដូចជាយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ឱ្យបានជាប់ជាប្រចាំ ជាពិសេស ការអនុវត្តព្រមគ្នានូវយុទ្ធនាការ «កម្ពុជាស្អាត ខ្មែរធ្វើបាន» នៅតាមបណ្តាឃុំ សង្កាត់ ក្រុង ស្រុក ទូទាំងខេត្តជាប់ជាប្រចាំ រហូតទទួលបានខេត្តកំពង់ឆ្នាំង ជាខេត្តស្អាត និងជាខេត្តគំរូ។
ក្រសួងបានលើកឡើងថា រដ្ឋបាលខេត្ត ក្រុង ស្រុក និងអង្គភាពចំណុះ បានគាំទ្រ និងបេ្តជ្ញាអនុវត្តនូវយុទ្ធនាការនេះឱ្យបានជោគជ័យ ក្រោមការសម្របសម្រួល ចូលរួម និងគាំទ្រពីក្រសួងបរិស្ថាន។
លោកអភិបាលខេត្តបានឱ្យដឹងផងដែរថា ក្រោយពីត្រូវបានបង្កើតជាក្រុមការងារចម្រុះជាមួយក្រសួងបរិស្ថានរួចហើយ ក្រុមការងារនេះនឹងរៀបចំកិច្ចពិភាក្សា ដើម្បីអនុវត្តទៅគោលការណ៍របស់ក្រសួង ដើម្បីឱ្យក្លាយទៅជាខេត្តដែលអត់មានសំរាម។
លោកបញ្ជាក់ថា រដ្ឋបាលខេត្តបានណែនាំឱ្យមានការដាក់ធុងសំរាមបន្ថែម ការផ្សព្វផ្សាយលើកកម្ពស់ការយល់ដឹងទៅតាមទាំងសហគ្រាស រដ្ឋ និងឯកជន សាលារៀន វត្តអារាមជាដើម និងការជំរុញក៏ដូចជាលើកទឹកចិត្តឱ្យមានការ ចូលរួមពីពលរដ្ឋ។ ក្រៅពីនោះ ក៏មានការរៀបចំការឱ្យមានការដឹកជញ្ជូនសម្រាមទៅតាមស្តង់ដារ ដោយសារតែខេត្តបានបង្កើតទីលានចាក់សម្រាមរួចហើយ ក្រោមគម្រោងរបស់ធនាគារអភិវឌ្ឍន៍អាស៊ី (ADB)។
លោកមានប្រសាសន៍ថា៖«កន្លងមកយើងបានត្រៀមមួយចំនួនហើយ អញ្ជឹងយើងត្រូវថែមអ្វីដែលជាលក្ខខណ្ឌរបស់ក្រសួងណែនាំថែមទៀត យើងនឹងបំពេញបន្ថែម នៅចំណុចណាដែលនៅសេសសល់»។
លោកបន្ថែមថា ក្រោយពីរដ្ឋបាលខេត្ត បានណែនាំដល់រោងចក្រសហគ្រាសមួយចំនួន កុំឱ្យមានការចោលថង់ប្លាស្ទិកពាសវាលពាសកាលនោះមក ជាលទ្ធផលឃើញថា ការបោះចោលសម្រាមនេះមានការកាត់បន្ថយបានច្រើនហើយនៅតាមផ្លូវសាធារណៈ។ លើសពីនោះ នៅតាមសាលា និងវត្តអារាមមួយចំនួនក៏មានបរិស្ថានស្អាត ហើយសកម្មភាពនេះកំពុងតែពង្រីកបន្ថែមទៀតផងដែរ។
លោកថ្លែងដូច្នេះថា៖«សាលារៀនយើងចាប់ផ្តើមឱ្យចេះគ្រប់គ្រងសំរាមហើយ និងឈានទៅដល់វត្តអារាម ហើយរោងចក្របានកាត់បន្ថយបានច្រើនហើយ។ សម្រាប់មន្រ្តីរាជការយើងបានណែនាំហើយដែរ អញ្ជឹងយើងកាត់បន្ថយទាំងអស់គ្នា ហើយអនាគត យើងសង្ឃឹមនឹងមិនមានសំរាមពាសវាលពាសកាលដូចមុនទៀតទេ»។
អ្នកនាំពាក្យក្រសួងបរិស្ថាន លោកខ្វៃ អាទិត្យា មិនទាន់បានឆ្លើយតបទៅនឹងការសុំផ្តល់អត្ថាធិប្បាយបន្ថែមទាក់ទងនឹងគម្រោងនេះទេ។
ដើម្បីកាត់បន្ថយការប្រើប្រាស់ថង់ប្លាស្ទិកនេះ ក្រសួងបរិស្ថានបានដាក់ចេញយុទ្ធនាការ«ថ្ងៃនេះ ខ្ញុំមិនប្រើថង់ប្លាស្ទិកទេ»កាលខែកញ្ញា ឆ្នាំពី២០២៣កន្លងមក ដោយជឿជាក់ថា ត្រឹមឆ្នាំ២០២៥ខាងមុខ កម្ពុជានឹងមិនមានថង់ប្លាស្ទិក«ហោះហើរ»នៅតាមទីសាធារណៈទៀតនោះទេ។
ក្រសួងបានឱ្យដឹងថា រហូតមកដល់ពេលបច្ចុប្បន្ននេះ មានអ្នកចូលរួមយុទ្ធនាការនេះជាង៩,៧លាននាក់ហើយ។
ដើម្បីលើកកម្ពស់ភាពស្អាតនេះផងដែរ រដ្ឋមន្រ្តីក្រសួងបរិស្ថាន លោកអ៊ាង សុផល្លែត បានគាំទ្រដល់ក្រុង ស្រុកក្នុងការ ទុកដាក់សំរាមឱ្យបានត្រឹមត្រូវ និងបានរៀបចំធុងដាក់សំរាម ក៏ដូចជាផ្តល់ជូនដល់រដ្ឋបាលក្រុង ស្រុក សម្រាប់ចែកជូនដល់គ្រប់គ្រឹះស្ថានសិក្សា មូលដ្ឋានសុខាភិបាល វត្តអារាម រដ្ឋបាលឃុំ-សង្កាត់ក្នុងខេត្តត្បូងឃ្មុំ និងខេត្តនានាទូទាំងប្រទេសផងដែរ។ ក្នុងនោះ លោករដ្ឋមន្រ្តីបានផ្តល់ជូនធុងសំរាមសរុបចំនួន ២ ២៧២ធុងក្នុងខេត្តត្បូងឃ្មុំ។ នេះបើយោងតាមក្រសួងបរិស្ថាននាថ្ងៃទី២៧ ខែតុលានេះ៕
