បេក្ខជនប្រឡងបាក់ឌុប នៅមណ្ឌលមួយ កាលពីថ្ងៃទី៨ ខែតុលា ឆ្នាំ២០២៤។ រូបថត FN
មន្ត្រីជាន់ខ្ពស់ក្រសួងអប់រំ យុវជន និងកីឡា អបអរសាទរដល់សិស្សដែលបានប្រឡងជាប់ និងបង្ហាញជម្រើសដល់សិស្សដែលមិនទាន់បានជោគជ័យ ស្របពេលដែលលទ្ធផលប្រឡង់បាក់ឌុបបង្ហាញពីការកើនឡើងនូវចំនួនសិស្សបាននិទ្ទេស A និងកំណើននៃអត្រាប្រឡងជាប់ពីមួយឆ្នាំទៅមួយឆ្នាំ។
នៅព្រឹកថ្ងៃទី៣០ ខែតុលា នេះក្រសួងអប់រំបានបង្ហាញលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ដែលបង្ហាញថា បេក្ខជន ១០៦ ៣៥១ នាក់ក្នុងចំណោមជាង ១៣ម៉ឺននាក់ បានប្រឡងជាប់ ត្រូវជា ៧៩ ភាគរយនៃចំនួនបេក្ខជនដែលបានប្រឡង។ ចំនួននេះបង្ហាញពីការកើនឡើងពីអត្រាប្រឡងជាប់ពី ៧២,៨៩ភាគរយ ឬ ៩៨ ៤៦០ ក្នុងចំណោមបេក្ខជនជាង ១៣ម៉ឺននាក់ដូចគ្នា កាលពីឆ្នាំ២០២៣។
សម្រាប់បេក្ខជនជាប់និទ្ទេស A គឺមានចំនួន ២ ២១៦ នាក់ (ឆ្នាំ២០២៣ មានចំនួន ១ ៦៧៣ នាក់), និទ្ទេស B ចំនួន ៩ ៧០១ នាក់ (២០២៣ មានចំនួន ៦ ៩៤៦នាក់)។ បេក្ខជននៅរាជធានីភ្នំពេញ និងខេត្តកណ្ដាល អាចទៅពិនិត្យឈ្មោះរបស់ពួកគេនៅថ្ងៃនេះ សម្រាប់បណ្ដាខេត្តផ្សេងៗទៀតនឹងត្រូវផ្សព្វផ្សាយនៅថ្ងៃស្អែក។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានអបអរសាទរដល់បេក្ខជនទាំងអស់ដែលទទួលបានជោគជ័យក្នុងការបានប្រឡងនេះ។ លោកស្រីថ្លែងអំណរគុណដល់លោកគ្រូអ្នកគ្រូ និងមាតាបិតាដែលបានចូលរួមក្នុងការសហការនិងជំរុញឲ្យសិស្សប្រឹងប្រែងរៀនសូត្របានលទ្ធផលល្អ។ លោកស្រីលើកទឹកចិត្តឲ្យបេក្ខជនដែលបានប្រឡងជាប់ជ្រើសរើសមុខវិជ្ជាសិក្សាទៅតាមចំណង់ចំណូលចិត្តនិងទេពកោសល្យរបស់ខ្លួន និងតម្រូវការរបស់ទីផ្សារការងារ។
លោកស្រីក៏លើកទឹកចិត្ត និងបង្ហាញពីជម្រើសមួយចំនួនដល់អ្នកដែលបរាជ័យសម្រាប់ការប្រឡង់ឆ្នាំនេះ ដែលជម្រើសទី១ គឺការបន្តសិក្សាមួយឆ្នាំទៀតនៅសាលាចំណេះទូទៅ ឬ ដាក់ពាក្យប្រឡងជាបេក្ខជនស្វ័យរិន។
ជម្រើសទី២ គឺពួកគេអាចចាប់យកជំនាញតាមរយៈការសិក្សានៅសាកលវិទ្យាល័យ ដែលនឹងទទួលបានបរិញ្ញាបត្ររង និងអាចបន្តយកបរិញ្ញាបត្រតាមរយៈការបន្តរៀនឲ្យគ្រប់ក្រេឌីតសាលាកំណត់។
លោកស្រីបន្តថា៖ «ជម្រើសមួយទៀតគឺការសិក្សាជំនាញដែលមានតម្រូវការក្នុងពេលបច្ចុប្បន្ន។ ខ្ញុំសូមបញ្ជាក់ដែរថា ការសិក្សាអប់រំបច្ចេកទេសនាពេលបច្ចុប្បន្ននេះមានតម្រូវការទីផ្សារច្រើន ហើយយើងពិតជាត្រូវការបុគ្គលិកដែលមានជំនាញច្បាស់លាស់សម្រាប់ការបំពេញការងារ។ ការសិក្សាជំនាញមានជម្រើសជាច្រើន សម្រាប់ទាំងអ្នកដែលពូកែខាងផ្នែកសិក្សាសង្គម និងផ្នែកវិទ្យាសាស្ត្រ»។
សម្រាប់លទ្ធផលល្អនៃការប្រឡងបាក់ឌុបឆ្នាំ២០២៤នេះ លោកស្រី ឃួន វិច្ឆិកា បានថ្លែងថា មានជាប់ពាក់ព័ន្ធនឹងការប្រែងប្រែងរបស់អ្នកពាក់ព័ន្ធក្នុងវិស័យអប់រំ ការប្រឹងប្រែងរបស់ក្រសួងក្នុងកំណែទម្រង់និងគោលនយោបាយ ការកែលម្អនៅតាមសាលារៀន ដោយសហការជាមួយដៃគូពាក់ព័ន្ធធ្វើឲ្យសាលារៀនមួយមានគុណវុឌ្ឍិត្រឹមត្រូវ។
សាលារៀនស្តង់ដារគំរូ និង សាលាជំនាន់ថ្មីក៏ចូលរួមដល់ការរីកចម្រើននៃវិស័យអប់រំ និងលទ្ធផលល្អនៃការប្រឡងបាក់ឌុបឆ្នាំនេះផងដែរ។ លោកស្រីសង្ឃឹមថា សាលារៀនស្តង់ដារគំរូនឹងមានចំនួនកើនឡើងនៅឆ្នាំ២០២៥ ខាងមុខនេះ៕
