ប្រព័ន្ធត្រួតពិនិត្យនាវា(VMS)កំពុងតែត្រូវបានបំពាក់លើទូកនេសាទនាពេលកន្លងមក ដើម្បីជួយដល់អ្នកនេសាទ នៅពេលពួកគេ ជួបប្រទះបញ្ហានៅលើផ្ទៃសមុទ្រ។ រូបថត អង្គការFAO
ភ្នំពេញៈ ប្រព័ន្ធត្រួតពិនិត្យនាវា (VMS) ចំនួន ៨០០គ្រឿងផ្សេងទៀតនឹងត្រូវបំពាក់លើទូកនេសាទក្នុងខេត្តឆ្នេរសមុទ្រទាំង ៤ ត្រឹមឆ្នាំ២០២៥ ខាងមុខ ដែលនឹងធ្វើឱ្យចំនួនបំពាក់សរុបកើនឡើងដល់ ១ ៦០០គ្រឿង ដើម្បីជួយដល់ប្រជានេសាទ នៅពេលទូករបស់ពួកគេ ជួបប្រទះបញ្ហានៅលើផ្ទៃសមុទ្រ។
រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានបំពាក់រួចរាល់នូវប្រព័ន្ធនេះចំនួន ៨០០គ្រឿង នាពេលថ្មីៗនេះលើនាវាខ្នាតមធ្យម និងខ្នាតវែង និងបន្តបំពាក់ចំនួន ៨០០គ្រឿងបន្ថែមទៀតឱ្យសម្រេចរួចរាល់នៅឆ្នាំ ២០២៥ សម្រាប់បណ្ដាខេត្តតំបន់ឆ្នេរទាំង ៤ រួមមាន ព្រះសីហនុ កោះកុង កំពត និងកែប។ នេះបើយោងតាមសេចក្តីប្រកាសព័ត៌មានរបស់អង្គការ FAO នាថ្ងៃចន្ទ ទី១១ ខែវិច្ឆិកានេះ។
សេចក្តីប្រកាសបានសរសេរថា៖«ប្រព័ន្ធត្រួតពិនិត្យនាវា ផ្តល់អត្ថប្រយោជន៍ជាច្រើនដល់ប្រជានេសាទ ជាឧទាហរណ៍ក្នុងករណីនាវា ឬទូកជួបបញ្ហានៅលើផ្ទៃសមុទ្រ គេអាចកំណត់បានពីទីតាំងជាក់លាក់ចុងក្រោយរបស់នាវា ឬទូកទាំងនោះ ព្រមទាំងអាចត្រូវបានប្រើជាជំនួយក្នុងប្រតិបត្តិការរុករកនាវា ឬទូក ដែលជួបបញ្ហា»។ ការដំឡើងប្រព័ន្ធនេះ គឺមិនមានការតម្រូវឱ្យចំណាយថវិកានោះឡើយ។
ការដំឡើងប្រព័ន្ធនេះ គឺធ្វើឡើងតាមរយៈកម្មវិធីជំរុញកំណើនវិស័យជលផលប្រកបដោយចីរភាពនិងបរិយាបន្ន (CAPFISH-Capture) នៃអង្គការ FAO ដែលទទួលបានជំនួយថវិកាពីសហភាពអឺរ៉ុប (EU)។ កម្មវិធីនេះបាននិងកំពុងគាំទ្រដល់រដ្ឋបាលជលផល នូវបច្ចេកទេសថ្មីក្នុងការដាក់ឱ្យដំណើរការប្រព័ន្ធត្រួតពិនិត្យនាវា។
ឧបករណ៍ត្រួតពិនិត្យនាវាទាំងនេះដំណើរការដោយប្រើប្រាស់ថាមពលព្រះអាទិត្យ និងមិនមានប្រើភ្ជាប់ជាមួយប្រព័ន្ធអគ្គិសនីបន្ថែមនោះឡើយ។
នេះគឺជាការដាក់ឱ្យដំណើរការប្រព័ន្ធត្រួតពិនិត្យនាវា ដំណាក់កាលទី២សម្រាប់កម្ពុជា ដែលបានបំពាក់នៅលើទូកនេសាទ និងឧបករណ៍នេសាទបច្ចុប្បន្ន ដែលមានទំហំចាប់ពី១២ម៉ែត្រឡើងទៅ។
ប្រព័ន្ធត្រួតពិនិត្យនាវា(VMS)។ រូបថត អង្គការFAO
ប្រព័ន្ធត្រួតពិនិត្យនាវាដំណាក់កាលទី២នេះ គឺជាប្រភេទឧបករណ៍ ដែលត្រូវបានកែលម្អពីដំណាក់កាលទី១។ កាលពីដំណាក់កាលទី១ ឧបករណ៍ចំនួន១២៥គ្រឿងត្រូវបានបំពាក់ និងធ្វើតេស្តសាកល្បងដែលមានទំហំលើសពី ១៨ម៉ែត្រ។ អង្គការ FAO ក៏បានបណ្តុះបណ្តាលបច្ចេកថ្មីនេះដល់មន្ត្រីរដ្ឋបាលជលផលអំពីរបៀបដំណើរការឧបករណ៍ទាំងនោះផងដែរ។
លោកសេង ប៊ុណ្ណា នាយខណ្ឌរដ្ឋបាលជលផលខេត្តកោះកុង បានឱ្យដឹងថា ទូកនេសាទជាង ២០០គ្រឿងហើយត្រូវបានបំពាក់ប្រព័ន្ធត្រួតពិនិត្យនាវានេះ។ ការបំពាក់នេះគឺធ្វើឡើងជាដំណាក់កាលទៅតាមការស្ម័គ្រចិត្ត និងតាមទំហំទូកនេសាទ ដើម្បីជួយកំណត់ទីតាំងទូក ក៏ដូចជាជួយសង្រ្គោះទាន់ពេលវេលា នៅពេលទូកមានបញ្ហាផ្សេងៗនៅលើសមុទ្រ។
លោកមានប្រសាសន៍ថា៖«យើងពន្យល់គាត់ពីអត្ថប្រយោជន៍ពីការបំពាក់VMSនេះ។ កាលពីអត់មានប្រព័ន្ធហ្នឹង ពេលមានបញ្ហាអី វាពិបាករកទូកណាស់ គឺយើងសួរតាមរយៈទូកផ្សេងទៀត។ តែឥលូវ ពេលទាក់ទងទូកមិនបានអី គាត់អាចទាក់ទងមកខាងជលផល ហើយយើងអាចឆែករកឱ្យគាត់បានភ្លាមៗ»។ លោកបានបន្ថែមថា ការបំពាក់ប្រព័ន្ធនេះនឹងធ្វើឡើងជាបន្តទៀត ទៅតាមដំណាក់កាលនាពេលខាងមុខ។
កម្មវិធី ដែលកំពុងតែអនុវត្តនេះមានគោលបំណងធ្វើឱ្យប្រសើរឡើងនូវការគ្រប់គ្រង ការអភិរក្សជលផល និងការអនុវត្តច្បាប់ និងបទប្បញ្ញត្តិនានាស្តីពីជលផល រួមទាំងផែនការសកម្មភាពដើម្បីទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត ក្នុងដែននេសាទសមុទ្រ និងទឹកសាប ជាពិសេសពង្រឹងក្របខ័ណ្ឌគ្រប់គ្រងជលផល៕
