ស្រោមអនាម័យ និងប័ណ្ណអប់រំសុខភាពពាក់ព័ន្ធនឹងមេរោគអេដស៍ និងជំងឺអេដស៍ដែលនឹងត្រូវចែកជូននៅក្នុងពិធីបុណ្យអុំទូក។ ក្រសួងសុខាភិបាល
ស្រោមអនាម័យចំនួន ១១៥,២០០ស្រោម និងទឹករំអិលចំនួន ៤ពាន់កញ្ចប់ នឹងត្រូវចែកជូនសាធារជនក្នុងពិធីបុណ្យអុំទូករយៈពេល ៣ ថ្ងៃដែលប្រព្រឹត្តទៅចាប់ពីថ្ងៃនេះដល់ថ្ងៃទី១៦ ខែវិច្ឆិកា នៅរាជធានីភ្នំពេញ។
ការចែកជូននេះនឹងអមទៅដោយប័ណ្ណព័ត៌មានអប់រំសុខភាពពីមេរោគអេដស៍ និងជំងឺអេដស៍ ចំនួន ៤៥,៥០០ប័ណ្ណ, ថ្នាំបង្ការមុន និងក្រោយពេលប្រឈម ចំនួន ៣,០០០ឈុត, ការធ្វើតេស្តរកមេរោគអេដស៍ ផ្តល់ប្រឹក្សា និងព្យាបាលជំងឺអេដស៍និងកាមរោគ, កម្មវិធីសំណួរនិងចម្លើយផ្តល់វត្ថុអនុស្សាវីយ៍អាវយឺតចំនួន ៨០០អាវ ដែលនឹងរៀបចំឡើងនៅក្រុងរណបជ្រោយចង្វារ (OCIC)។ នេះបើតាមលោក ស៊ឹម ស៊ូយេង អនុរដ្ឋលេខាធិការក្រសួងសុខាភិបាល ដែលត្រូវបានសម្ភាសដោយសារព័ត៌មានហ្វ្រេសញូវ។
ការចែកជូននេះដើម្បីបន្តការពារការឆ្លងមេរោគអេដស៍ ខណៈដែលចំនួនអ្នកឆ្លងមេរោគអេដស៍នៅកម្ពុជាមាននិន្នាការថយចុះ។
ការសិក្សារបស់ UNAID ដែលបានផ្សព្វផ្សាយកាលពីខែកក្កដា បញ្ចាក់ថា នៅឆ្នាំ២០២៣ ករណីឆ្លងថ្មីមាន ១២០០ករណី ធ្លាក់ចុះពី ១,៣០០ករណីនៅឆ្នាំ២០២២។
នៅឆ្នាំ២០២៣ កម្ពុជាមានអ្នកផ្ទុកនិងអ្នកជំងឺអេដស៍មានចំនួនប្រមាណ ៧៦,០០០នាក់។
សម្រាប់ពិធីបុណ្យអុំទូកនៅភ្នំពេញដែរ ក្រសួសុខាភិបាលបានរៀបចំក្រុមគ្រូពេទ្យបម្រើការ ចំនួន៦០៧នាក់ក្នុងមួយថ្ងៃ និងរថយន្តគិលានុសង្រ្គោះប្រចាំការតាមគោលដៅចំនួន ៦០គ្រឿង រថយន្តគ្លីនិកចល័តចំនួន ២គ្រឿង និងជម្រកតង់ពិនិត្យសុខភាពដើម្បីផ្តល់សេវាសុខាភិបាលចំនួន ១៥កន្លែង ដែលផ្តល់សេវា ២៤ម៉ោងក្នុងរយៈពេល៣ថ្ងៃនេះ។ នេះបើតាមការបញ្ជាក់របស់ក្រសួងសុខាភិបាល៕
