លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស ក្នុងសន្និសីទសារព័ត៌មាន កាលពីកន្លងទៅ។ ហ្វ្រេសញូវ
រដ្ឋមន្ត្រីប្រតិភូអមនាយករដ្ឋមន្ត្រី ចាត់ទុកការធ្វើការទូតសេដ្ឋកិច្ចជាកត្តាចម្បង ជាពិសេសសម្រាប់ឆ្នាំ២០២៥ខាងមុខនេះ ដែលលោកព្យាករថាជាឆ្នាំដែលពិភពលោកកាន់តែមានភាពរញ៉េរញ៉ៃខ្លាំងជាងមុន។
ថ្លែងក្នុងសន្និសីទសារព័ត៌មានស្ដីពីវឌ្ឍនភាពនៃរាជរដ្ឋាភិបាលថ្មីដែលបានដឹកនាំប្រទេសជិត ១៥ខែ រៀបចំឡើងនៅថ្ងៃទី១៨ ខែវិច្ឆិកានេះ លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស លើកឡើងថា ចាប់តាំងពីពេលដែលលោក ដូណាល់ ត្រាំ ជាប់ឆ្នោតត្រឡប់មកដឹកនាំសហរដ្ឋអាមេរិកវិញ បញ្ហាប្រឈមរបស់ពិភពលោកចាប់ពីពេលនេះទៅគឺផលប្រយោជន៍ផ្នែកសេដ្ឋកិច្ចនិងពាណិជ្ជកម្ម។
លោកថ្លែងថា៖ «ឆ្នាំ២០២៤ ដែលជិតផុតទៅនេះ ជារបត់ប្រវត្តិសាស្ត្រមួយព្រោះឆ្នាំនេះប្រទេសធំៗជាច្រើននៅលើពិភពលោកបានរៀបចំការបោះឆ្នោត ដូចជានៅឥណ្ឌា នៅអឺរ៉ុប រុស្ស៊ី និងសហរដ្ឋអាមេរិក ហើយនៅអឺរ៉ុបក៏មាននិន្នាការបង្ហាញថា ស្ដាំនិយមជ្រុល ឬឆ្វេងនិយមជ្រុលបានលេចឡើង ដែលក្រុមនិយមជ្រុលនេះជាក្រុមដែលបែរខ្នងដាក់ពិភពលោក ហើយគាំពារតែប្រយោជន៍នៃប្រទេសរបស់គេនីមួយៗ»។
លោកបន្តថា៖ «តាមការវិភាគរបស់អ្នកជំនាញនានា នៅក្នុងឆ្នាំ២០២៥ខាងមុខនេះ ពិភពលោកអាចរញ៉េរញ៉ៃលើសដើម។ ម្ល៉ោះហើយ ភូមិសាស្ត្រនយោបាយពិភពលោកតានតឹង មិនអំណោយផលសោះឡើយដល់សេដ្ឋកិច្ចសកល។ ដូច្នេះហើយ សេដ្ឋកិច្ចពិភពលោកនឹងបន្តដុនដាបទៅមុខទៀត និងអាចមានភាពវឹកវរក្នុងសង្គមមួយចំនួន»។
សម្រាប់កម្ពុជា ដើម្បីទប់ទល់បញ្ហាប្រឈមនេះ ចាំបាច់ត្រូវធ្វើការទូតសេដ្ឋកិច្ច គឺការផ្សព្វផ្សាយពីសក្ដានុពលវិយោគ និង ទេសចរណ៍នៅកម្ពុជា។ លោកថា ការទូតសេដ្ឋកិច្ចនេះហើយដែលនឹងជួយឲ្យកម្ពុជាសម្រេចចក្ខុវិស័យរបស់ខ្លួនក្នុងការក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០២៣ និងក្លាយជាប្រទេសអ្នកមាននៅឆ្នាំ២០៥០។
លោកបន្តថា លោកនាយករដ្ឋមន្ត្រី ហ៊ុន ម៉ាណែត មិនដែលភ្លេចទេការលើកឡើងពីបរិយាកាសអំណោយផលនៃការវិនិយោគនៅកម្ពុជា ដែលមានកត្តាសន្តិសុខ សុវត្ថិភាព និងសន្តិភាព ជាពិសេស ស្ថិរភាពនៃម៉ាក្រូសេដ្ឋកិច្ច និងច្បាប់វិនិយោគអំណោយផល ដែលជាកត្តាចម្បង។
នៅក្នុងការទូតសេដ្ឋកិច្ចនេះ លោក ហ្សង់ ហ្វ្រង់ស័រ តាន់ ក៏លើកទឹកចិត្តឲ្យពលរដ្ឋកម្ពុជាប្រើប្រាស់គ្រប់បណ្ដាញសង្គមដើម្បីលើកមុខមាត់កម្ពុជា ជាពិសេសគោលដៅទេសចរណ៍ ដែលកម្ពុជាព្យាយាមទាក់ទាញភ្ញៀវទេសចរអន្តរជាតិឲ្យបានកម្រិតមុនកូវីដ១៩ ប្រមាណជាង ៦,៦លាននាក់។
លោកថា៖ «ម្នាក់ៗមានសិទ្ធិ មានកាតព្វកិច្ចប្រើប្រាស់ហ្វេសប៊ុក ទិកតុក អ៊ិនស្តាក្រាម គ្រប់បណ្ដាញសង្គមទាំងអស់ដើម្បីផ្សព្វផ្សាយការទូតសេដ្ឋកិច្ចរបស់រដ្ឋាភិបាល និងផ្សព្វផ្សាយមុខមាត់ដ៏ស្រស់បស់របស់ប្រទេសកម្ពុជា»។
លោក ប៉ែន បូណា អ្នកនាំពាក្យរាជរដ្ឋាភិបាល បានថ្លែងក្នុងសន្និសីទសារព័ត៌មានថា ការប្រែក្លាយកម្ពុជាឲ្យទៅជាប្រទេសមានប្រាក់ចំណូលខ្ពស់នៅឆ្នាំ២០៥០ ដាច់ខាតត្រូវតែការពារសន្តិភាព ហើយទិសដៅនេះមិនអាចមានអ្នកណាមករារាំងបានឡើយ៕
