ព្រះរាជពិធីបុណ្យអុំទូករយៈពេល ៣ថ្ងៃនៅរាជធានីភ្នំពេញ មានភ្ញៀវទេសចរជាតិ និងអន្ដរជាតិចូលរួមជាង ៦.២លាននាក់។ រូបថត STPM
ភ្នំពេញ៖ ព្រះរាជពិធីបុណ្យអុំទូករយៈពេល៣ថ្ងៃបានបញ្ចប់ទៅ ដោយបន្សល់នូវឧប្បត្ដិហេតុបញ្ហាសន្ដិសុខ សណ្ដាប់ធ្នាប់មួយចំនួន ដូចជា ការវាយតប់ ចោរកម្ម វង្វេងសាច់ញាតិ ដោយអំឡុងពិធីបុណ្យជាតិនេះទទួលស្វាគមន៍ភ្ញៀវទេសចរជាតិ និងអន្ដរជាតិជាង ៧.៨លាននាក់នៅទូទាំងប្រទេស។
យោងតាមអគ្គស្នងការដ្ឋាននគរបាលជាតិ បានឱ្យដឹងថា ក្នុងព្រះរាជពិធីបុណ្យអុំទូក ឆ្នាំ២០២៤នេះ មានអំពើហិង្សាដោយចេតនាមួយលើក បង្កដោយជនជាតិខ្មែរម្នាក់ និងជនជាតិកូរ៉េ ២នាក់ ត្រូវបានសមត្ថកិច្ចឃាត់ខ្លួនបញ្ជូនទៅប៉ុស្តិ៍នគរបាលរដ្ឋបាលជ័យជំនះ ខណ្ឌដូនពេញដើម្បីបន្តនីតិវិធី។
ដោយអះអាងពីការបិទបញ្ចប់ដោយជោគជ័យដែលមិនមានករណីធ្ងន់ធ្ងរកើតឡើង អគ្គស្នងការដ្ឋាននគរបាលជាតិបានបន្ដថា៖ «កម្លាំងការពារគោលដៅ បានរកឃើញករណីវង្វេងសាច់ញាតិចំនួន ១៧៦នាក់ (ជនជាតិឥណ្ឌាម្នាក់ មនុស្សចាស់៦នាក់ និងកុមា ១៦៩នាក់) ដោយបានធ្វើការប្រកាសផ្សព្វផ្សាយរកឃើញ និងប្រគល់ជូនសាច់ញាតិវិញដោយសុវត្ថិភាព»។
នៅរង្វល់មូលនាងមច្ឆា មានករណីលួចម៉ូតូមួយលើ ដែលសមត្ថកិច្ចកំពុងតែស្រាវជ្រាវ និងស៊ើបអង្កេត និងលួចទូរស័ព្ទ ៣ករណី។
ជាមួយវត្ដមានភ្ញៀវចូលរួមព្រះរាជពិធីបុណ្យអុំទូកនេះ របាយការណ៍ក្រសួងទេសចរណ៍ បានបង្ហាញថា ថ្ងៃទី១៤ដល់១៦ ខែវិច្ឆិកា ឆ្នាំ២០២៤ កម្ពុជាទទួលភ្ញៀវទេសចរសរុបជាង ៧.៨លាននាក់ ដោយរាជធានីភ្នំពេញស្រូបបានជាង ៦.២លាននាក់។
លោក ហួត ហាក់ រដ្ឋមន្ដ្រីក្រសួងទេសចរណ៍និយាយទៅកាន់ភ្ញៀវទេសចរអន្ដរជាតិអំឡុងពេលប្រារឰព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក។ រូបថត ក្រសួងទេសចរណ៍
របាយការណ៍បានបន្ដថា៖ «ក្នុងចំណោមភ្ញៀវទេសចរសរុបជា៧.៨លាននាក់ មានទេសចរជាតិចំនួន ៧.៧លាននាក់ កើនឡើង ២១,៤ភាគរយបើប្រៀបធៀបនឹងរយៈពេលដូចគ្នាឆ្នាំ២០២៣ ហើយភ្ញៀវទេសចរបរទេសមានចំនួន ៨៩២៩៦នាក់ កើនឡើង ២៨.៧ភាគរយ»។
រាជធានីភ្នំពេញមានភ្ញៀវទេសចរជាតិជាង ៦.២លាននាក់ និងភ្ញៀវអន្ដរជាតិ ៥២៤៩៨នាក់។ ខេត្តសៀមរាប ទទួលភ្ញៀវទេសចរជាតិជាង ៣៣ម៉ឺននាក់ និងភ្ញៀវអន្ដរជាតិចំនួន ១៣២២៩នាក់។ ខេត្តព្រះសីហនុ ទទួលភ្ញៀវទេសចរជាតិជាង ៣០ម៉ឺននាក់ និងអន្ដរជាតិជាង ៨ម៉ឺននាក់។
ភ្ញៀវទេសចរជាតិជាង ១៨ម៉ឺននាក់ និងអន្ដរជាតិជាង ៧ពាន់នាក់ទៅលេងខេត្ដប៉ៃលិន ខណៈខេត្ដកំពតទទួលភ្ញៀវជាតិជាង ១៣ម៉ឺននាក់ និងអន្ដរជាតិជាង ២ពាន់នាក់៕
