លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គ.ជ.ប.ជ ក្នុងកិច្ចប្រជុំ កាលពីថ្ងៃទី១៩ វិច្ឆិកា ២០២៤។ ក្រសួងមហាផ្ទៃ
ប្រទេសកម្ពុជាកំពុងដោះស្រាយភាពរងគ្រោះនៃបទល្មើសជួញដូរមនុស្សបង្កដោយជនបរទេស ដែលមានលក្ខណៈសាំញ៉ាំ ច្រើនទម្រង់និងប្រកបដោយល្បិចកល។ នេះជាការលើកឡើងរបស់មន្ត្រីជាន់ខ្ពស់នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ហៅកាត់ថា គ.ជ.ប.ជ. បានថ្លែងកាលពីថ្ងៃទី១៩ ខែវិច្ឆិកាថា បច្ចុប្បន្ននេះអំពើជួញដូរមនុស្ស ភាគច្រើនបង្កឡើងដោយជនបរទេសក្នុងទម្រង់ជាច្រើន និងប្លែកៗ។
លោកស្រីបន្តថា ករណីខ្លះជនបរទេសជាជនល្មើសធ្វើការបោកប្រាស់និងជួញដូរជនរងគ្រោះរស់នៅក្នុងប្រទេសកម្ពុជា និងករណីខ្លះទៀត ជនល្មើសសម្ងំរស់នៅក្នុងប្រទេសកម្ពុជា ប៉ុន្តែធ្វើការបោកប្រាស់ ឬអូសទាញជនរងគ្រោះនៅប្រទេសផ្សេងៗ។
ក្រសួងមហាផ្ទៃបានស្រង់សម្ដីលោកស្រី ជូ ប៊ុនអេង ដែលបានលើកឡើងថា៖ «បញ្ហាបទល្មើសជួញដូរមនុស្សនេះ ករណីខ្លះជនបរទេស ដែលជាជនល្មើសបោកប្រាស់ជនជាតិផ្សេងឬពលរដ្ឋខ្មែរ ហើយករណីខ្លះពួកគេបោកប្រាស់ជនជាតិដូចគ្នា ដោយបញ្ហាជួញដូរ ស្ថិតក្រោមរូបភាពច្រើនដូចជាការពពោះជំនួសការគំរាមកំហែង និងសកម្មភាពផ្សេងៗតាមអនឡាញ តាមទូរស័ព្ទ ឬជួបផ្ទាល់ ។
នៅឆ្នាំ២០២៣ កម្ពុជាបានបង្ក្រាបអំពើជួញដូរមនុស្ស និងអាជីវកម្មផ្លូវភេទសរុប ១៦៤ករណី ឃាត់ខ្លួនមនុស្ស ១៩៤នាក់។ ក្នុងនោះ ២៤ករណីជាអំពើជួញដូរមនុស្ស និង១៤០ជាករណីជូញដូរផ្លូវភេទ។ ក្នុងឆ្នាំដដែលនេះ ជនរងគ្រោះកម្ពុជា ដែលធ្វើមាតុភូមិនិវត្តន៍មកកម្ពុជាវិញមានចំនួន ៣៤២នាក់ ក្នុងនោះមកពីចិនមានចំនួន ៣២២នាក់។
សម្រាប់ ៦ខែ ឆ្នាំ២០២៤នេះ សមត្ថកិច្ចបានបង្ក្រាបអំពើជួញដូរមនុស្ស និងអាជីវកម្មផ្លូវភេទ ១០៤ ករណី ឃាត់ខ្លួនជនសង្ស័យ ១៣៤នាក់ និងសង្គ្រោះជនរងគ្រោះ ២៩០នាក់។
ក្នុងឆ្នាំ២០២៣ ដែរ កម្ពុជាបានឃាត់ខ្លួន និងបណ្ដេញចេញជនបរទេសដែលប្រព្រឹត្តបទល្មើសនៅកម្ពុជាចំនួន ២១៥៩នាក់ ក្នុង៥១២ករណី ដែលក្នុងនោះជនជាតិចិនមាន ១០១១នាក់។ នេះបើតាមរបាយការណ៍ប្រចាំឆ្នាំរបស់ គ.ជ.ប.ជ.។
ភ្នំពេញប៉ុស្តិ៍មិនអាចទាក់ទងលោកស្រី ជូ ប៊ុនអេង ដើម្បីសុំការអត្ថាធិប្បាយបន្ថែម បានទេ នៅថ្ងៃនេះ។
កាលពីឆ្នាំ២០២៣ របាយការណ៍ស្តីពីការជួញដូរមនុស្សនៃក្រសួងការបរទេសអាមេរិកបានដាក់ចំណាត់ថ្នាក់ទី៣ ដែលជាចំណាត់ថ្នាក់ទាបបំផុត ស្មើនឹងប្រទេសមីយ៉ាន់ម៉ា ទាបជាងឡាវ ថៃ និងវៀតណាមដែលនៅជិតខាង។
លោកស្រី ជូ ប៊ុនអេង នៅថ្ងៃទី១៩ វិច្ឆិកា បានអំពាវនាវដល់សមត្ថកិច្ចពាក់ព័ន្ធ ត្រូវខិតខំទប់ស្កាត់បទល្មើសជួញដូរមនុស្សដែលកំពុងកើតឡើង និងធ្វើឲ្យមានការព្រួយបារម្ភនៅទូទាំងពិភពលោកដែលករណីជាច្រើនកើតឡើងតាមរយៈប្រព័ន្ធអនឡាញ។
លោកស្រីថ្លែងថា៖ «សមត្ថកិច្ចពាក់ព័ន្ធក៏ត្រូវមានភាពឈឺចាប់នៅពេលដែលបរទេសបានដាក់ចំណាត់ថ្នាក់ប្រទេសកម្ពុជាក្នុងបញ្ជីជាប្រទេសមានចំណាត់ថ្នាក់ទាបពាក់ព័ន្ធនឹងការទប់ស្កាត់បទល្មើសជួញដូរមនុស្សដោយត្រូវចូលរួមប្រឹងប្រែងដោះស្រាយ កុំឱ្យមានការបណ្ដែតបណ្ដោយ»៕
