វេជ្ជបណ្ឌិតកំពុងវះកាត់ព្យាបាលកុមារម្នាក់នៅយកុមារអង្គរ។ AHC
មន្ទីរពេទ្យកុមារអង្គរបើកយុទ្ធនាការរៃអង្គាសថវិកា «រួមគ្នាដើម្បីព្យាបាលកុមាររងរបួសធ្ងន់ធ្ងរ» ដើម្បីលើកកម្ពស់ការយល់ដឹងអំពីសេវាកម្មរបស់មជ្ឈមណ្ឌលព្យាបាលជំងឺធ្ងន់ធ្ងរនិងរបួសប៉ះទង្គិចនៅមន្ទីរពេទ្យកុមារអង្គរ និងដើម្បីរៃអង្គាសថវិកា ចំនួន១៥០ ០០០ដុល្លារ ដើម្បីដំណើរការមជ្ឈមណ្ឌលទាំងមូល។
ព្រឹត្តិការណ៍នេះនឹងធ្វើឡើងពីថ្ងៃទី ២៥ ខែវិច្ឆិកា ឆ្នាំ២០២៤ ដល់ថ្ងៃទី១៩ ខែធ្នូ ឆ្នាំ ២០២៤។ នេះបើតាមការជូនដំណឹងរបស់មន្ទីរពេទ្យ។
លោកវេជ្ជបណ្ឌិត ឡេង ណារ៉ា ជំនាញផ្នែកវះកាត់នៃមន្ទីរពេទ្យកុមារអង្គរ ពន្យល់ថា ណៈភាព និងពិការភាពជាច្រើនអាចត្រូវបានចៀសវាងបាន ប្រសិនបើកុមារទទួលបានការថែទាំត្រឹមត្រូវនិងទាន់ពេលវេលា។
លោកបន្តថា៖ «កុមារដែលមកទទួលសេវានៅមន្ទីរពេទ្យកុមារអង្គរ ភាគច្រើនគ្មានកន្លែងណាទៀតត្រូវទៅនោះទេ។ យើងមិនអាចទុកពួកគេចោលបាននោះទេ។ យើងចាត់ទុកកុមារគ្រប់រូបដូចកូនៗរបស់យើង»។
មន្ទីរពេទ្យកុមារអង្គរបានកសាងមជ្ឈមណ្ឌលព្យាបាលជំងឺធ្ងន់ និងរបួសប៉ះទង្គិចដំបូងបង្អស់របស់ខ្លួននៅឆ្នាំ២០២៣ ដែលជាមជ្ឈមណ្ឌលឯកទេសផ្តល់ការថែទាំ និងវះកាត់យ៉ាងទូលំទូលាយសម្រាប់អ្នកដែលមានជំងឺធ្ងន់ធ្ងរ និងរបួសប៉ះទង្គិចនានា។
មជ្ឈមណ្ឌលផ្តល់ជូននូវសេវាជាច្រើនដូចជា ការសង្គ្រោះបន្ទាន់ ព្យាបាលជំងឺធ្ងន់ធ្ងរ ការវះកាត់ ការព្យាបាលដោយចលនា អាហារូបត្ថម្ភ និងសេវាសង្គមកិច្ចវេជ្ជសាស្ត្រ។
លោក ងួន ច័ន្ទភក្ត្រា នាយកមន្ទីរពេទ្យកុមារអង្គរ ថ្លែងក្នុងសន្និសីទសារព័ត៌មានអំពីយុទ្ធនាការរៃអង្គាស នៅថ្ងៃទី២៥ ខែវិច្ឆិកា។ AHC
លោកវេជ្ជបណ្ឌិត សរ វុទ្ធី ប្រធានផ្នែកវះកាត់របស់មន្ទីរពេទ្យកុមារអង្គរ ថ្លែងថា មជ្ឈមណ្ឌលនេះព្យាបាលរបួសប៉ះទង្គិច ឬជំងឺដែលគំរាមកំហែងដល់អាយុជីវិតកុមារ រួមមានគ្រោះថ្នាក់ដូចជាការដួល ធ្លាក់ពីទីខ្ពស់ គ្រោះថ្នាក់ចរាចរណ៍ និងរលាកធ្ងន់ធ្ងរ។
លោកបន្តថា នៅឆ្នាំ ២០២៤នេះ មជ្ឈមណ្ឌលនេះរំពឹងថានឹងផ្តល់សេវាព្យាបាល និងវះកាត់កុមារបានប្រហែល ១ ០៦៨នាក់ សង្គ្រោះជីវិតដល់កុមារដែលមានជំងឺធ្ងន់ធ្ងរ ចំនួន ១ ៤៧៨នាក់ និងសង្គ្រោះបន្ទាន់ដល់កុមារចំនួន ១ ៧២២នាក់”។
មន្ទីរពេទ្យកុមារអង្គរផ្ដោតសេវាឯកទេសវះកាត់ផ្ដោតជាពិសេសលើកុមារនិងវ័យជំទង់រហូតដល់អាយុ១៨ឆ្នាំ។
លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បានថ្លែងថា៖ «មន្ទីរពេទ្យកុមារអង្គរគឺជាមន្ទីរពេទ្យសម្រាប់កុមារគ្រប់ៗរូប និងជាអនាគតរបស់យើងទាំងអស់គ្នា។ យើងនឹងបន្តរួមចំណែក ដើម្បីអភិវឌ្ឍន៍ សេវាថែទាំសុខភាពដ៏មានសារៈសំខាន់ ជាមួយនឹងឧបករណ៍វេជ្ជសាស្ត្រត្រឹមត្រូវ ដើម្បីឱ្យកុមារគ្រប់រូប អាចទទួលបានការថែទាំសុខភាពប្រកបដោយគុណភាព»៕
