ភ្នំពេញៈ ការចុះឈ្មោះសិស្សចូលក្នុងកម្មវិធីអាហារូបករណ៍សិស្សក្រីក្រ នឹងចាប់ផ្តើមនៅសប្តាហ៍ក្រោយ ហើយការទទួលបានប្រាក់ឧបត្ថម្ភជាលើកដំបូងនាថ្ងៃទី៣០ ខែមករា ខាងមុខ ដើម្បីលើកទឹកចិត្តដល់កុមារឱ្យចុះឈ្មោះចូលរៀនបានទាន់ពេលវេលានិងបន្តការសិក្សារហូតដល់បញ្ចប់មធ្យមសិក្សានៅគ្រឹះស្ថានសិក្សា ចំណេះទូទៅសាធារណៈ។ នេះបើយោងតាមមូលនិធិជាតិជំនួយសង្គម។
កម្មវិធីអាហារូបករណ៍សិស្សក្រីក្រនេះគឺស្ថិតក្នុង “កម្មវិធីជាតិជំនួយសង្គមក្នុងកញ្ចប់គ្រួសារ” ដែលរាជរដ្ឋាភិបាលកម្ពុជាបានប្រកាសដាក់ឱ្យអនុវត្តជាផ្លូវការនាខែមេសា ឆ្នាំ ២០២៤។ ការឧបត្ថម្ភអាហារូបករណ៍សម្រាប់សិស្សក្រីក្រនៅបឋមសិក្សានិងមធ្យមសិក្សាចំណេះទូទៅគ្រោងដំណើរការអនុវត្តនៅខែមករា ឆ្នាំ២០២៥ ខាងមុខនេះ។
មូលនិធិជាតិជំនួយសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី២៧ ខែវិច្ឆិកាបានជូនដំណឹងដល់អាណាព្យាបាល ឬសិស្សានុសិស្ស ដែលស្ថិតក្នុងគ្រួសារមានបណ្ណសមធម៌ ក្រីក្រ១ និងក្រីក្រ២ ទៅធ្វើការចុះឈ្មោះចូលក្នុងកម្មវិធីជាតិជំនួយសង្គម ក្នុងកញ្ចប់គ្រួសារ ចាប់ពីថ្ងៃទី១ ខែធ្នូ ឆ្នាំ២០២៤តទៅ «ដើម្បីការអនុវត្តកម្មវិធីអាហារូបករណ៍សម្រាប់សិស្សក្រីក្រនៅបឋមសិក្សា និងមធ្យម សិក្សាចំណេះទូទៅ នៃកម្មវិធីជាតិជំនួយសង្គម ដំណើរការទាន់ពេលវេលា និងប្រកបដោយប្រសិទ្ធភាព»។
ក្នុងការចុះឈ្មោះនេះ សិស្សានុសិស្ស ត្រូវទៅជួបមន្ត្រីកម្មវិធីនៅតាមសាលារៀន ដែលខ្លួនកំពុងសិក្សា ដោយភ្ជាប់ទៅជាមួយបណ្ណ សមធម៌ច្បាប់ដើម នៅមានសុពលភាព និងលិខិតចុះឈ្មោះចូលរៀន ដើម្បីធ្វើការបញ្ជាក់ការចុះឈ្មោះចូលរៀន ក្នុងប្រព័ន្ធអែប (App) របស់កម្មវិធីជាតិជំនួយសង្គមក្នុងកញ្ចប់គ្រួសារ។ បន្ទាប់មកទៀត ត្រូវទៅជួបមន្ត្រីកម្មវិធីនៅសាលាឃុំសង្កាត់ ដោយភ្ជាប់ទៅជាមួយនូវបណ្ណសមធម៌ច្បាប់ដើម នៅមានសុពលភាព និងលិខិតចុះឈ្មោះចូលរៀន ដើម្បីចុះឈ្មោះចូលក្នុងកម្មវិធី។
មូលនិធិជាតិ ជំនួយសង្គម បានបញ្ជាក់ថា បើកផ្តល់ប្រាក់ឧបត្ថម្ភអាហារូបករណ៍សម្រាប់សិស្សក្រីក្រនៅបឋមសិក្សា និងមធ្យមសិក្សាចំណេះ ទូទៅ នៃកម្មវិធីជាតិជំនួយសង្គម លើកដំបូង គឺធ្វើឡើងនៅថ្ងៃទី៣០ ខែមករា ឆ្នាំ២០២៥។
សិក្សានុសិស្សនៅកម្រិតបឋមសិក្សា និងនៅមធ្យមសិក្សាបឋមភូមិ ទទួលបានប្រាក់ឧបត្ថម្ភចំនួន ២ម៉ឺនរៀល ក្នុង១ខែ និងនៅកម្រិតមធ្យមសិក្សាទុតិយភូមិ ទទួលបានចំនួន ៣ម៉ឺនរៀលក្នុង១ខែ។
មូលនិធិបានណែនាំថា សិស្សានុសិស្សត្រូវទៅធ្វើបច្ចុប្បន្នភាពនៅរៀងរាល់ដើមឆ្នាំសិក្សានៅសាលារៀន ដោយភ្ចាប់ជាមួយបណ្ណសមធម៌ ដែលមានសុពលភាព និងចូលរៀនឱ្យបាន ៨០ ភាគរយ នៃវត្តមាន ដើម្បីទទួលបានប្រាក់ឧបត្ថម្ភនាឆ្នាំបន្ទាប់។
កម្មវិធីជាតិជំនួយសង្គមក្នុងកញ្ចប់គ្រួសារ បានបង្កើត និងដាក់ឱ្យអនុវត្តចាប់ពីខែមេសា ឆ្នាំ២០២៤ ដែលជាការធ្វើសមាហរណកម្ម កម្មវិធីជាតិជំនួយសង្គមចំនួន៤។ ក្នុងនោះរួមមាន កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ ដែលបច្ចុប្បន្នមានអ្នកទទួលផលសរុបចំនួនប្រមាណ ៣៧ ម៉ឺននាក់ និងកម្មវិធីអាហារូបករណ៍សម្រាប់សិស្សក្រីក្រថ្នាក់បឋមសិក្សា និងមធ្យមសិក្សា មានសិស្សក្រីក្រ ដែលមានសិស្សទទួលផលសរុបជាង ២៦ ម៉ឺននាក់ ក្នុងឆ្នាំ២០២៤ និងត្រូវបានប៉ាន់ស្មានថា នឹងកើនដល់ចំនួនប្រមាណ ៤៥ ម៉ឺននាក់ ក្នុងឆ្នាំ២០២៥។
ក្រៅពីនោះ មានកម្មវិធីឧបត្ថម្ភសាច់ប្រាក់ជូនជនមានពីការភាព ដែលបច្ចុប្បន្ន មានអ្នកទទួលផលចំនួន ជាង ២ម៉ឺននាក់ និងចុងកក្រោយ កម្មវិធីឧបត្ថម្ភសាច់ប្រាក់ជូនជនចាស់ជរា (អាយុ ៦០ឆ្នាំឡើង) បច្ចុប្បន្ន មានអ្នកទទួលផល ចំនួនប្រមាណ ៣០ម៉ឺននាក់។
យោងតាមក្រុមប្រឹក្សាជាតិគាំការសង្គមបានឱ្យដឹងថា វិសាលភាព នៃការគ្របដណ្តប់របស់ប្រព័ន្ធគាំពារសង្គម បានរីកធំជាងមុនជាង ២ដង បើធៀបនឹងឆ្នាំ២០១៧ ដោយបច្ចុប្បន្ន បាននិងកំពុងគ្របដណ្តប់ពលរដ្ឋជាង ៧លាននាក់។
ការចំណាយថវិកាជាតិ ក៏បានកើនឡើងធំជាងមុន ជាង ៣ ដង ពោលគឺមានទំហំថវិកាចំណាយសរុបលើ ប្រព័ន្ធគាំពារសង្គម ចំនួនជាង ១៧, ៥ ទ្រីលានរៀល ឬសមមូលនឹង ៤,៣ ប៊ីលានដុល្លារអាម៉េរិក ចាប់ តាំងពីរាជរដ្ឋាភិបាលដាក់ចេញនូវក្របខណ្ឌគោលនយោបាយជាតិគាំពារសង្គម កាលពីឆ្នាំ២០១៧មក៕
