ភ្ញៀវទេសចរជាតិ និងអន្ដរជាតិផ្ដិតយករូបភាពកាំជ្រួញដ៏ស្រស់ស្អាតនៅមុខព្រះបរមរាជវាំងក្នុងឱកាសព្រះរាជពិធីបុណ្យអុំទូកកន្លងទៅ។ រូបភាព ភ្នំពេញប៉ុស្ដិ៍
ភ្នំពេញ៖ ក្រសួងទេសចរណ៍ជំរុញឱ្យប្រតិបត្តិករទេសចរណ៍ផ្សព្វផ្សាយព្រះរាជពិធីបុណ្យអុំទូកដល់ភ្ញៀវទេសចរអន្តរជាតិ និងអញ្ជើញពួកគេមកទទួលយកបទពិសោធន៍នៃព្រះរាជពិធីបុណ្យ ក៏ដូចជាស្វែងយល់ពីវប្បធម៌ខ្មែរ។
ក្រសួងបានឱ្យដឹងក្នុងសេចក្តីប្រកាសថា ជាមួយគណៈកម្មាធិការជាតិរៀបចំពិធីបុណ្យជាតិ និងអន្តរជាតិ ភ្ញៀវទេសចរអន្តរជាតិនឹងបានឃើញនូវវប្បធម៌ ប្រពៃណី និងទំនៀមទម្លាប់របស់ប្រទេសកម្ពុជា ដែលមានតាំងពីបុរាណកាលក្នុងពិធីបុណ្យចាប់ពីថ្ងៃទី ១៤ ដល់ថ្ងៃទី ១៦ ខែវិច្ឆិកា ឆ្នាំ ២០២៤ នៅលើទន្លេសាប ទល់មុខព្រះបរមរាជវាំង រាជធានីភ្នំពេញ។
ក្រសួងទេសចរណ៍បានប្រកាសថា៖ «ក្រសួងនឹងរៀបចំពន្លាទេសចរណ៍មួយកន្លែង ដែលស្ថិតនៅខាងជើងវេទិកាកិត្តិយសខាងមុខព្រះបរមរាជវាំង សម្រាប់ផ្តល់ជូនភ្ញៀវទេសចរអន្តរជាតិបានចូលរួមទស្សនាការប្រណាំងទូកក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក»។
ក្រសួងបន្ដថា៖ «ក្រសួងក៏ផ្ដល់នូវបដិសណ្ឋារកិច្ចជូនភ្ញៀវទេសចរអន្តរជាតិ មានដូចជា ការផ្តល់ជូនសេវាកម្មមគ្គុទ្ទេសក៍ទេសចរណ៍ និងការបំពាក់ទូរទស្សន៍ផ្សព្វផ្សាយអំពីតំបន់គោលដៅ សក្តានុពលទេសចរណ៍ផ្សេងៗ»។
លោក ញឹម សោភ័ណ ប្រធានស្ដីទីនាយកដ្ឋានជំរុញទេសចរណ៍ក្នុងស្រុក និងអប់រំ ការយល់ដឹងជាសាធារណៈ ក្រសួងទេសចរណ៍ បានឱ្យដឹងថា ក្រសួងទេសចរណ៍ សហការជាមួយគណៈកម្មាធិការជាតិរៀបចំបុណ្យជាតិ- អន្តរជាតិ លើកទឹកចិត្ដឱ្យភ្ញៀវបរទេសបានចូលរួមពិធីបុណ្យអុំទូក និងសិក្សាស្វែងយល់អំពីទំនៀមទម្លាប់ប្រពៃណីខ្មែរ។
លោក សោភ័ណ បានប្រាប់ភ្នំពេញប៉ុស្ដិ៍ថា៖ «គណៈកម្មាធិការជាតិរៀបចំបុណ្យជាតិ- អន្តរជាតិ បានផ្ដល់ពន្លាមួយដល់ក្រសួងទេសចរណ៍សម្រាប់ទទួលភ្ញៀវទេសចរបរទេសដោយឥគិតថ្លៃ រួមទាំងការផ្ដល់ជូនភេសជ្ជៈដល់ពួកគាត់ផងដែរ»។
លោកបានបន្ដថា៖ «យើងស្នើសុំដល់ប្រតិបត្ដិករទេសចរណ៍ចូលរួមដោយស្មារតីលើកស្ទួយវិស័យទេសចរណ៍។ ពេលខ្លះ ពួកគាត់មាន group tours មកទស្សនាចំថ្ងៃបុណ្យនេះ យើងអាចនាំភ្ញៀវមកទស្សនា ពីព្រោះឯកឧត្ដមរដ្ឋមន្ដ្រីលើកទឹកចិត្ដដល់ប្រតិបត្ដិករចូលរួមជំរុញវិស័យទេសចរណ៍យើង»។
ជាមួយការរៀបចំពន្លាសម្រាប់ភ្ញៀវបរទេសអង្គុយទស្សនាព្រឹត្ដិការណ៍ប្រណាំងទូកង លោក សោភណ្ឌ បានឱ្យដឹងថា ពន្លានេះមានការរៀបចំ ៣០០កៅអី ដែលមួយថ្ងៃៗ មានភ្ញៀវអង្គុយជាច្រើនរយនាក់។
ទិដ្ឋភាពក្រុមទូកងអុំឡើងទៅកាន់គោលដៅចេញដំណើរដើម្បីត្រៀមខ្លួនធ្វើការប្រកួតប្រជែង អបអរព្រះរាជពិធីបុណ្យអុំទូកនាឆ្នាំកន្លងមក។ រូបភាព ភ្នំពេញប៉ុស្ដិ៍
លោកបានឱ្យដឹងថា ជាធម្មតា ភ្ញៀវទេសចរមិនអាចអង្គុយជាប់រហូតនោះទេ ដោយពួកគេទស្សនាមួយរយៈពេល និងផ្លាស់ប្ដូរចេញ-ចូល។
លោក សោភ័ណ បានបញ្ជាក់ថា យោងតាមរបាយការណ៍ ក្នុងមួយថ្ងៃ ពន្លានេះទទួលភ្ញៀវបរទេសជាងពីរពាន់នាក់ ហើយអំឡុងព្រះរាជពិធីបុណ្យអុំទូក ៣ ថ្ងៃ មានភ្ញៀវចន្លោះពី ៨ពាន់ទៅជាង ៨ពាន់នាក់។
លោកបានបន្ដថា៖ «ចំនួនភ្ញៀវទេសចរបរទេសមានច្រើនជាងនេះ ដោយសារភ្ញៀវខ្លះ ពួកគាត់មិនអង្គុយនៅលើពន្លានោះទេ ដោយពួកគាត់ចង់ចូលរួមផ្ទាល់ជាមួយភ្ញៀវជាតិ និងផ្ដិតយករូបភាពព្រះរាជពិធីបានច្បាស់»។
ដើម្បីលើកស្ទួយវិស័យទេសចរណ៍ លោក សោភ័ណ្ឌ បានស្នើដល់ប្រព័ន្ធសារព័ត៌មានទាំងអស់ធ្វើការផ្សព្វផ្សាយពីសក្ដានុពលទេសចរណ៍ក្នុងស្រុក ប្រកបដោយភាពវិជ្ជមាន។
លោកបានថ្លែងថា៖ «ឯកឧត្ដមរដ្ឋមន្ដ្រីលើកទឹកចិត្ដ influencers និងអ្នកសារព័ត៌មានចូលរួមចំណែកដោយលើកយកតែចំណុចវិជ្ជមានក្នុងវិស័យទេសចរណ៍មកផ្សព្វផ្សាយដើម្បីទាក់ទាញភ្ញៀវទេសចរមកលេងកម្ពុជា ហើយយើងបិទបញ្ចប់រាល់ចំណុចអវិជ្ជមានផ្សេងៗដែលអ្នកនៅខាងក្រៅ ក៏ដូចជាសារព័ត៌មានមួយចំនួនតែងតែផ្សព្វផ្សាយ»។
លោក ជា ថុង ស្ថាបនិកក្រុមហ៊ុនទេសចរណ៍លក្ខណៈគ្រួសារ Vana Adventure Travel ដែលផ្ដល់សេវាកម្មជូនភ្ញៀវបែបផ្សងព្រេង និងសហគម ក្រុមហ៊ុនរបស់លោកមិនទាន់មានការរៀបចំកម្មវិធីពិសេសអ្វីដល់ភ្ញៀវទេសចរអំឡុងពេលបុណ្យអុំទូកនោះទេ។
ប៉ុន្ដែក្នុងនាមជាក្រុមហ៊ុនក្នុងស្រុកមួយ លោកមិនភ្លេចណែនាំឱកាសកម្សាន្ដក្នុងពិធីបុណ្យជាតិនេះដល់ប្រតិបត្ដិករដៃគូ ក៏ដូចជាភ្ញៀវអន្ដរជាតិផ្ទាល់ឱ្យចូលរួមព្រះរាជពិធីនេះ។
លោកបានប្រាប់ភ្នំពេញប៉ុស្ដិ៍ថា៖ «យើងណែនាំឱ្យពួកគាត់ចូលរួមបុណ្យអុំទូកនេះ ដោយកុំឱ្យពួកគាត់គិតថា វាមានការលំបាកដោយសារមានមនុស្សច្រើន ហើយខ្ញុំក៏បានណែនាំដល់ expats ធ្វើការក្នុងស្រុក ដែលចង់ធ្វើដំណើរទៅក្រៅ ឱ្យពួកគាត់នៅទទួលយកបទពិសោធបុណ្យជាតិធំនេះ ដោយមានការចូលរួមពីប្រជាពលរដ្ឋមកពីគ្រប់បណ្ដាខេត្ដ ដើម្បីស្វែងយល់ពីប្រពៃណីខ្មែរ»។
ចំពោះលោកផ្ទាល់ លោក ថុង បានបង្ហើបថា ក្នុងឱកាសបុណ្យឆ្លងឆ្នាំខាងមុខ លោកមានគម្រោងរៀបចំកម្មវិធី Phnom Penh Year End Birds Count ជាព្រឹត្ដិការណ៍ដំបូងបំផុតនៅភ្នំពេញ៕
