លោកនាយករដ្ឋមន្រ្តីហ៊ុន ម៉ាណែតថ្លែងក្នុងពិធី បើកការដ្ឋានសាងសង់ទីក្រុងមេគង្គឃី ស្ថិតនៅក្នុងក្រុងអរិយក្សត្រ ខេត្តកណ្តាល នាថ្ងៃទី១៧ ខែធ្នូនេះ។ រូបថត STPM
ភ្នំពេញៈ នៅមុនប្រារព្ឋទិវាសន្តិភាពលើកទី២៦ នាសប្តាហ៍ក្រោយនេះ ប្រមុខរដ្ឋាភិបាលបានអំពាវនាវឱ្យមានការចូលរួមថែរក្សាសន្តិភាពឱ្យបានគង់វង្សរាប់រយឆ្នាំតទៅទៀត សម្រាប់មនុស្សជំនាន់ក្រោយ ខណៈពេលដែលប្រទេសក្នុងតំបន់ និងសកលលោកខ្លះកំពុងតែដើរថយក្រោយ ដោយសារតែសង្រ្គាម។
ក្នុងពិធីបើក ការដ្ឋាន សាងសង់ គម្រោង ទីក្រុងមេគង្គឃី ស្ថិតនៅក្នុងក្រុងអរិយក្សត្រ ខេត្តកណ្តាល នាថ្ងៃទី១៧ ខែធ្នូនេះ លោកនាយករដ្ឋមន្រ្តី ហ៊ុន ម៉ាណែត បានលើកឡើងថានៅក្នុងយុគសម័យសន្តិភាព មិនត្រឹមតែហេដ្ឋារចនាសម្ព័ន្ធប៉ុណ្ណោះទេ ដែលអភិវឌ្ឍ ប៉ុន្តែជីវភាពរស់នៅរបស់ប្រជាពលរដ្ឋ កាន់តែកើនឡើងរីកចម្រើនឥតឈប់ឈផងដែរ។
លោកនាយករដ្ឋមន្រ្តីមានប្រសាសន៍ថា៖«នេះគឺជាអ្វី ដែលជាផលលាភសន្តិភាព ដែលយើងត្រូវថែរក្សា សន្តិភាព មិនត្រឹមតែ២៦ឆ្នាំ ឬ៣០ឆ្នាំ ឱ្យបានរាប់រយឆ្នាំតទៅទៀតទុកឱ្យកូនចៅ»។
កាលពីថ្ងៃទី១ មករា ២០២៤នេះ រាជរដ្ឋាភិបាលបានកំណត់យកថ្ងៃទី«២៩ ធ្នូ» (២៩ ធ្នូ ១៩៩៨-២៩ ធ្នូ ២០២៤) ជាថ្ងៃប្រារព្ឋ ទិវាសន្តិភាពនៅកម្ពុជា ដែលជាថ្ងៃបុណ្យជាតិ និងជាថ្ងៃឈប់សម្រាកប្រចាំឆ្នាំផងដែរ។
ប្រមុខរដ្ឋាភិបាលបានថ្លែងអបអរសាទរដូច្នេះថា៖«នៅសល់តែ១២ថ្ងៃទៀតទេ យើងដល់ខួបទី២៦ នៃទិវាសន្តិភាពកម្ពុជា អញ្ជឹងគឺជាថ្ងៃឈប់សម្រាកផង ជាថ្ងៃអបអរ ដែលយើង ទាំងអស់គ្នាបានរស់រានមានជីវិត ហើយមិនឮគ្រាប់ផ្លោងដូច នៅតាមបណ្តាប្រទេសមួយចំនួន។ សូម្បីតែនៅអាស៊ានយើង តែ១០ប្រទេសហ្នឹង ក៏មានប្រទេសដែលកំពុងតែវាយគ្នាដែរ»។
លោកនាយករដ្ឋមន្រ្តីបានឡើងថា សូមកុំមើលតែផល នៃសន្តិភាព ប៉ុន្តែសូមមើលផល នៃការបាត់បង់សន្តិភាពផងដែរ ទើបដឹងថា តម្លៃ នៃផលសន្តិភាព វាមានប៉ុណ្ណា។
លោកបានលើកឧទាហរណ៍ពីសង្រ្គាមនៅប្រទេសស៊ីរី និងនៅអ៊ុយក្រែនជាដើមថា កាលពី៤ឆ្នាំមុន ប្រទេសទាំងនេះកំពុងតែរីកចម្រើន ដោយសារតែអត់មានការវាយគ្នា។ ប៉ុន្តែ ឥលូវខេត្តក្រុងខ្លះត្រូវបំផ្លាញខ្ទិចខ្ទី ហើយមនុស្សស្លាប់ជាច្រើន។
លោកមានប្រសាសន៍ថា៖«និយាយរឿងសន្តិភាព អត់ធុញទេ។ និយាយរំលឹកហើយរំលឹកទៀត ព្រោះវាផុយស្រួយណាស់ យើងត្រូវរួមគ្នាចងចាំវា។ វាផុយស្រួយណាស់ នៅប្រទេសជិតខាងយើងមួយចំនួន ក៏កំពុងតែមានបញ្ហា ដែលប៉ុន្មានឆ្នាំមុនអត់មាន»។
លោកបន្តថា៖«នៅអឺរ៉ុប នៅអាហ្វ្រិក នៅអី កាលពីប៉ុន្មានឆ្នាំមុន អត់មានអី ឥលូវ ទៅបាត់។ តែកម្ពុជា យើងបាន២៦ឆ្នាំ ហើយកុំឱ្យមានទំនាយថា មួយចម្អិនកំពឹស កើតឡើងវិញនៅស្រុកខ្មែរ។ គេថា កម្ពុជាមិនបានសេចក្តីសុខយូរទេ។ ហើយ២៦ឆ្នាំនេះ បើក្នុងរយៈពេល ប្រវត្តិសាស្រ្ត៥០០ឆ្នាំ គឺ ជាសន្តិភាពដែលវែងជាងគេរួចទៅហើយ។ តែយើងមិនចង់បានត្រឹមតែ២៦ឆ្នាំនោះទេ»។
លោកបានរំលឹកថា នៅពេលដែល គ្មានសង្រ្គាម កម្ពុជាបានកសាងបានស្ពាន២ គឺស្ពានព្រះមុន្នីវង្ស និងស្ពានជ្រោយចង្វារ។ ប៉ុន្តែដល់ពេលបាត់បង់សន្តិភាពភ្លាម ការវាយគ្នាបានចាប់ផ្តើម ហើយស្ពានត្រូវបំផ្លាញ។ ដល់ពេល ដែលកម្ពុជា ឈប់វាយគ្នា ហើយធ្វើសមាហរណកម្ម កម្ពុជាបានចាប់ផ្តើមកសាងឡើងវិញ មិនត្រឹមតែស្ពាន២នោះទេ តែ ថែមទាំងស្ពានជាច្រើនខ្សែថែមទៀត។
លោកបញ្ជាក់ថា៖«សង្រ្គាមវាធ្វើឱ្យអគារ ដែលខ្ពស់បាក់បែកខ្ទិច ...អញ្ជឹងត្រូវចូលរួមធ្វើម៉េចកុំឱ្យយើងបាត់បង់នូវឱកាសនៃសន្តិភាព។ សូមរួមគ្នា ថែរក្សា សុខសន្តិភាព ដែលជាកត្តាសំខាន់»។
យោងតាមក្រសួងការពារជាតិបានឱ្យដឹងថា កម្លាំងចូលរួមជាង១ម៉ឺននាក់ ត្រូវបានរៀបចំត្រៀម សម្រាប់ប្រារព្ឋទិវានេះ ក្នុងរយៈពេល៣ថ្ងៃ ដែលរួមមានផងដែរ ពីការតាំងពិព័រណ៍ និងការបាញ់កាំជ្រួចជាដើម។
ការប្រារព្ឋទិវា សន្តិភាពនៅកម្ពុជា នេះ គឺដើម្បីឆ្លើយតបទៅនឹងបំណងប្រាថ្នាដ៏ពិសិដ្ឋរបស់ប្រជាជនកម្ពុជា ដែលស្រឡាញ់សន្តិភាព និងស្អប់ខ្ពើមសង្គ្រាម។
ក្រសួងបានលើកឡើងថា ការរៀបចំទិវា នាឆ្នាំ២០២៤នេះ គឺជាការដាស់តឿនក្រើនរំលឹកដល់ប្រជាជនកម្ពុជាគ្រប់ជំនាន់ ឱ្យចងចាំជានិច្ចអំពីមហាវិនាសកម្មរបស់ជាតិ និងទុក្ខសោកលំបាកវេទនារបស់ប្រជាជនកម្ពុជា ព្រមទាំងផលវិបាកនានា ដែលបង្កឡើងដោយសង្គ្រាម និងការបែកបាក់ជាតិ។
ក្រៅពីនោះ វាជាការបំផុសស្មារតីដល់ប្រជាជនកម្ពុជាគ្រប់ជំនាន់ ឱ្យស្អប់ខ្ពើមនូវសង្គ្រាម និងឱ្យយល់ដឹងច្បាស់អំពីគុណតម្លៃនៃសុខសន្តិភាព ហើយរួមគ្នាលើកកម្ពស់ វប្បធម៌សន្តិភាព នៅកម្ពុជា។
ពិសេស ការចូលរួមការពារ និងថែរក្សាឱ្យបានដាច់ខាតនូវសុខសន្តិភាព ដែលជាអាយុជីវិតរបស់ជាតិ និងជាគ្រឹះដ៏មានតម្លៃបំផុត សម្រាប់ការអភិវឌ្ឍប្រទេសជាតិ និងភាពសុខសាន្តរបស់ប្រជាជនកម្ពុជា ប្រកបដោយចីរភាព៕
