ខេត្ដព្រះសីហនុ៖ ក្រុងព្រះសីហនុ ជាទីក្រុងឆ្នេរសមុទ្រដ៏ស្ងប់ស្ងាត់មួយក្នុងប្រទេសកម្ពុជា បានក្លាយជាគោលដៅជជែកវែកញែកដ៏រសើបបំផុតស្ដីពីបញ្ហាជុំវិញឧក្រិដ្ឋកម្ម និងភាពចម្រូងចម្រាស ក៏ដូចជាចាត់ទុកជាមជ្ឈមណ្ឌលនៃការអភិវឌ្ឍន៍ និងសេដ្ឋកិច្ចដែលកំពុងរីកចម្រើន។
ចំពោះភាពចម្រូងចម្រាសលើការផ្សព្វផ្សាយនេះ លោក ម៉ាង ស៊ីណេត អភិបាលខេត្តព្រះសីហនុ ដែលថ្លែងវឌ្ឍនភាព និងសុវត្ថិភាព ដោយច្រានចោលនូវការផ្សព្វផ្សាយមិនពិតនៅលើប្រព័ន្ធផ្សព្វផ្សាយមួយចំនួន។
លោក ស៊ីណេត បានឱ្យដឹងថា ដោយសារខេត្ដព្រះសីហនុមានហេដ្ឋារចនាសម្ព័ន្ធគមនាគមន៍ទាំង ៣ ប្រភេទ គឺផ្លូវទឹក ផ្លូវគោក និងផ្លូវអាកាស ទើបរាជរដ្ឋាភិបាលជ្រើសរើសខេត្ដព្រះសីហនុនេះជាតំបន់សេដ្ឋកិច្ចពិសេសគំរូពហុបំណង។
លោកអភិបាលខេត្ដបានថ្លែងក្នុងបទសម្ភាសជាមួយស្ថាប័នសារព័ត៌មានជាង៣០កាលពីពេលថ្មីៗនេះថា៖ «ខេត្តព្រះសីហនុមិនត្រឹមតែមានសុវត្ថិភាពសម្រាប់ភ្ញៀវទេសចរ និងអ្នកវិនិយោគប៉ុណ្ណោះទេ ប៉ុន្តែសម្រាប់ប្រជាពលរដ្ឋយើងផងដែរ»។
ចំពោះបញ្ហាសុខសុវត្ថិភាពដល់ភ្ញៀវទេសចរ អ្នកវិនិយោគ និងប្រជាពលរដ្ឋ ខេត្ដព្រះសីហនុមានស្នងការនគរបាលខេត្ដ បញ្ហាការដ្ឋានកងរាជអាវុធខេត្ដ តំបន់ប្រតិបត្ដិការសឹករងខេត្ដ ក្រុង/ស្រុក និងឃុំ/សង្កាត់ ជាសេនាធិការ ដែលអនុវត្ដតួនាទី ភារកិច្ចរបស់ខ្លួនដោយទទួលខុសត្រូវខ្ពស់ ជាក់ស្ដែងភូមិ ឃុំ/សង្កាត់មានសុវត្ថិភាព។
កន្លងមក មានព័ត៌មានផ្សព្វផ្សាយថា មានករណីឧក្រិដ្ឋកម្មអាក្រក់ៗបានកើតឡើងជាច្រើន រួមទាំង ករណីបុរសជនជាតិចិនម្នាក់ ធ្វើជាទាសករឈាម ដោយក្រុមបោកប្រាស់តាមប្រព័ន្ធអ៊ីនធឺណែត ដែលលោកត្រូវបានបង្ហូរឈាម និងធ្វើទារុណកម្មជាច្រើនដង។
ហេតុការណ៍មួយទៀត ពាក់ព័ន្ធនឹងការចាប់ពង្រត់ និងសម្លាប់ជនរងគ្រោះជាជនជាតិចិន ដែលសាកសពត្រូវបានរកឃើញនៅក្នុងប្រឡាយទឹក ឈានទៅដល់ការចាប់ខ្លួនជនសង្ស័យចំនួន៧នាក់។
ឧក្រិដ្ឋកម្មទាំងនេះបង្ហាញពីភាពងងឹតបាំងបិទទីក្រុងឆ្នេរតារារះនៃទិសនីរតី ដោយរួមរឹតនឹងបញ្ហាចាក់ស្រេះ ដូចជា ឧក្រិដ្ឋកម្មបោកប្រាស់ ការលេងល្បែងតាមអ៊ីនធឺណិត ជាមួយនឹងរបាយការណ៍អំពីការជួញដូរមនុស្ស ពលកម្មដោយបង្ខំ និងអំពើកេងប្រវ័ញ្ច។
លោក ស៊ីណាត បានលើកឡើងថា៖ «ខេត្ដព្រះសីហនុក្នុងសារព័ត៌មានមួយចំនួនតូច និងខេត្ដព្រះសីហនុមានលក្ខណៈខុសគ្នា។ ជាក់ស្ដែង ជនជាតិចិនបានបង្កើតព័ត៌មានប្រឌិតទាសករឈាម ឬ Blood Slave ដែលតាមការពិត គាត់ជាជនឥន្ដោប្រវែសខុសច្បាប់ កើតជំងឺឈាមសស៊ីឈាមក្រហមរ៉ាំរ៉ៃ និងគ្មានការងារធ្វើដើម្បីរកប្រាក់ព្យាបាល»។
លោកអភិបាលខេត្ដបានលើកឡើងរឿងរ៉ាវមួយចំនួនទៀត ដែលទាក់ទងនឹងការចាប់ជំរិតវះកាត់សរីរាង្គរវាងជនជាតិថៃ និងជនជាតិ។ អគ្គស្នងការនគរបាលជាតិបានសហការជាមួយសមត្ថកិច្ចថៃបានធ្វើការចាប់ខ្លួននារីថៃ ដែលប្រឌិតរឿងនោះដាក់ទោសទៅតាមច្បាប់។
លោកអភិបាលខេត្ដបានលើកឡើងពីដើមចមនៃការលេចឮព័ត៌មានបង្ឃាំងមនុស្ស ដោយចាប់ផ្ដើមពីបញ្ហាវិបត្ដិកូវីដ ១៩ ដែលម្ចាស់អាជីវកម្មនីមួយៗការពារសុវត្ថិភាពបុគ្គលិក និងភ្ញៀវ។ បុគ្គលិកមិនត្រូវបានអនុញ្ញាតឱ្យចេញក្រៅបរិវេណកន្លែងធ្វើការ ដោយធ្វើការ និងស្នាក់នៅទីនោះតែម្ដង។
លោកបានបន្ដថា ទម្លាប់នេះបានបន្ដរហូតដល់ចប់កូវីដ ១៩ និងបើកប្រទេសឡើងវិញ។ ប៉ុន្ដែក្រោយមក តាមរយៈរដ្ឋបាលខេត្ដ អង្គភាពអាជីវកម្មទាំងអស់បើកចំហរសិទ្ធិសេរីភាពជូនដល់កម្មករ-កម្មការិនី និងបុគ្គលិកចេញក្រៅបាន។
ដើម្បីឆ្លើយតបនឹងសន្តិសុខ ខេត្តបានវិនិយោគយ៉ាងច្រើនលើបច្ចេកវិទ្យា ដើម្បីត្រួតពិនិត្យ និងលើកកម្ពស់សុវត្ថិភាពសាធារណៈ។លោក ស៊ីណេត បានឱ្យដឹងថា៖ «ក្រៅពីនេះ ខេត្ដព្រះសីហនុក៏មានបំពាក់កាមេរ៉ាសុវត្ថិភាពតាមដងផ្លូវចំនួន ៤៣៣ទីតាំង ឬ ៥៣៣គ្រាប់ ដែលស្ទើរតែគ្រប់តាមដងផ្លូវ រួមទាំងដំណើរការប្រព័ន្ធ Hotline សម្រាប់ទទួលបណ្ដឹងពីសាធារណជន មហាជន ភ្ញៀវទេសចរជាតិ និងអន្ដរជាតិ»។
លោកបានបញ្ជាក់ដោយមោទនភាពថា ខេត្តព្រះសីហនុត្រូវបានទទួលស្គាល់ចំពោះសមិទ្ធផលនានាក្នុងការថែរក្សាសណ្តាប់ធ្នាប់សាធារណៈ។លោកបានអះអាងថា ចំពោះពានរង្វាន់ភូមិ ឃុំ/សង្កាត់មានសុវត្ថិភាព ខេត្ដព្រះសីហនុទទួលបានចំណាត់ថ្នាក់លេខចំនួន ៨ លេខពីរ ចំនួន ១៥ និងលេខបី ទទួលបានចំនួន ៦ ដែលបញ្ជាក់ថា រាល់បទល្មើសបានកើតឡើង ដែលមានការថយចុះជាងឆ្នាំមុនៗ អាជ្ញាធរមានសមត្ថកិច្ចគ្រប់គ្រងបានទាំងអស់។
ឥទ្ធិពលនៃព័ត៌មានក្លែងក្លាយ
ទោះបីជាយ៉ាងណាក៏ដោយ ទន្ទឹមនឹងការរីកចម្រើននេះ ខេត្តព្រះសីហនុក៏កំពុងប្រយុទ្ធនឹងព័ត៌មានមិនពិត ពិសេសពីរឿងរ៉ាវដែលផ្សព្វផ្សាយនៅលើបណ្តាញសង្គម។
លោក ស៊ីណេត ទទួលស្គាល់ថា ព័ត៌មានប្រឌិតពិតជាមានអ្នកចូលមើលច្រើនរហូតដល់រាប់លានដងនៅលើបណ្ដាញសង្គម ខណៈវីដេអូបកស្រាយអំពីស្ថានភាពភូតកុហក់ ដែលរដ្ឋបាលខេត្ដព្រះសីហនុរកឃើញការពិត មានអ្នកចូលទស្សនាតិចតួចបំផុត។
អភិបាលខេត្ត បានបកស្រាយថា «ជនរងគ្រោះ» ដែលត្រូវបានអះអាងក្នុងរឿងនេះ គឺជាជនអន្តោប្រវេសន៍ខុសច្បាប់ ដែលមានជំងឺរ៉ាំរ៉ៃ ហើយមិនមែនជាជនរងគ្រោះនៃការកេងប្រវ័ញ្ចនោះទេ។
រឿងទាំងនេះ ត្រូវបានប្រឌិត និងពង្រីកដោយប្រព័ន្ធផ្សព្វផ្សាយបរទេស បានលាបពណ៌រូបភាពខុសឆ្គងនៃក្រុងព្រះសីហនុ។
លោក ស៊ីណាត បានពន្យល់ថា៖ «មានបរទេសគេសួរសំណួរមួយថា បើសិនជាខេត្ដព្រះសីហនុមានការអភិវឌ្ឍរីករាយ តើគេទទួលបានអ្វី? យើងគិតថា គេមិនចង់ឃើញយើងមានការអភិវឌ្ឍរីករាយជាងគេដែរ»។
ចក្ខុវិស័យសេដ្ឋកិច្ចសម្រាប់អនាគត
បើតាមអភិបាលខេត្ត បានឱ្យដឹងថា បើទោះជាមានការរំខានពីព័ត៌មានមិនពិតក៏ដោយ ប៉ុន្តែការពិតនៃការអភិវឌ្ឍន៍ខេត្តព្រះសីហនុនៅតែផ្តោតលើគោលដៅរយៈពេលវែង។
រដ្ឋាភិបាលខេត្តប្តេជ្ញាប្រែក្លាយក្រុងព្រះសីហនុទៅជាមជ្ឈមណ្ឌលពាណិជ្ជកម្ម និងឧស្សាហកម្មលំដាប់ពិភពលោក។លោកបានថ្លែងថា៖ «ការបង្កើតតំបន់សេដ្ឋកិច្ចគំរូពិសេសពហុបំណងខេត្ដព្រះសីហនុ មានគោលដៅសម្រាប់ការដឹកជញ្ជូន និងឧស្សាហកម្ម ជាមួយកំពង់ផែទឹកជ្រៅ ដែលរាជរដ្ឋាភិបាលនឹងអភិវឌ្ឍជម្រៅទឹករហូតដល់ ១៧,៥ម៉ែត្រនៅឆ្នា២០២៩ សម្រាប់នាវាស្ទើរតែគ្រប់ទាំងអស់ទូទាំងពិភពលោកអាចចូលចត ដែលមានសមត្ថភាពផ្ទុកទម្ងន់ ១៦ម៉ឺនតោន»។
លោក ស៊ីណាត បានបន្ដថា វាផ្ដោតលើការបែងចែកជាតំបន់ផ្សេងៗ ដូចជា ការបង្កើតក្រុងកំពង់សោម ជាទីក្រុងពាណិជ្ជកម្ម និងមជ្ឈមណ្ឌលហិរញ្ញវត្ថុអន្ដរជាតិ តំបន់ទេសចរណ៍ ដែលដែនកោះត្រូវបានប្រែក្លាយជាតំបន់ទេសចរណ៍។ លើសពីនេះ រដ្ឋាភិបាលមានគោលបំណងបង្កើតការងារ និងជំរុញកំណើនសេដ្ឋកិច្ចសម្រាប់ប្រជាជនក្នុងស្រុក៕
