អ្នកសារព័ត៌មានកំពុងសម្ភាសអតីតឯកអគ្គរដ្ឋទូតសហរដ្ឋអាមេរិក លោក Patrick Murphy នៅក្រៅតុលាការក្នុងភ្នំពេញ កាលពីឆ្នាំ២០២៣។ ភ្នំពេញប៉ុស្តិ៍
«រាជរដ្ឋាភិបាលកម្ពុជាត្រូវការសារព័ត៌មានដែលមានថាមពលប្រកបដោយការទទួលខុសត្រូវ និង មានភាពស្មោះត្រង់ចំពោះវិជ្ជាជីវៈ និងអ្នកសារព័ត៌មាន ដែលហ៊ាននិយាយការពិតនិងហ៊ានរិះគន់ក្នុងន័យស្ថាបនា ដើម្បីឆ្លុះបញ្ចាំងឱ្យឃើញនូវគ្រប់តថភាពសង្គម ដើម្បីជៀសវាងការផ្សព្វផ្សាយព័ត៌មានតែមួយជ្រុង ឬព័ត៌មានក្លែងក្លាយ»។
នេះជាផ្នែកមួយនៃសាររបស់លោកនាយករដ្ឋមន្ត្រី ហ៊ុន ម៉ាណែត សម្រាប់វេទិកានិពន្ធនាយកសារព័ត៌មានកម្ពុជា លើកទី២១ ដែលនឹងប្រព្រឹត្តទៅនៅថ្ងៃទី២១ ខែធ្នូខាងមុខនេះ ក្រោមប្រធានបទ «វិជ្ជាជីវៈសារព័ត៌មានការបញ្ចេញមតិ»។
នៅក្នុងលិខិតចំនួន ៣ ទំព័រ លោក ហ៊ុន ម៉ាណែត បានកោតសរសើរដល់សារព័ត៌មានដែលបានចូលរួមផ្សព្វផ្សាយព័ត៌មានពិតអំពីកម្ពុជា ដូចជាករណីគម្រោងព្រែកជីកហ្វូណនតេជោ កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម ការលើកកម្ពស់សក្ដានុពលទេសចរណ៍កម្ពុជា និងព្រឹត្តិការណ៍ប្រពៃណីវប្បធម៌ផ្សេងៗទៀត។
លោកថ្លែងថា៖ «ខ្ញុំសូមអះអាងថា ក្នុងដំណាក់កាលណាក៏ដោយ រាជរដ្ឋាភិបាលកម្ពុជាតែងតែយកចិត្តទុកដាក់ក្នុងការលើកតម្កើងសិទ្ធិសេរីភាពសារព័ត៌មាន និងសេរីភាពខាងការបញ្ចេញមតិ ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្តីពីរបបសារព័ត៌មាន»។
យ៉ាងណាក៏ដោយ លោកក៏សង្កេតផងដែរថា ការប្រើប្រាស់សិទ្ធិនៃការបញ្ចេញមតិហួសព្រំដែនច្បាប់ នៅតែកើតមាន ដែលបានបង្កនូវផលប៉ះពាល់ដល់សណ្តាប់ធ្នាប់សង្គម និងជះឥទ្ធិពលអវិជ្ជមានដល់ ប្រជាពលរដ្ឋ។ លោកលើកទឹកចិត្តឲ្យសារព័ត៌មានមិនត្រូវប្រើសិទ្ធិក្នុងរបបសារព័ត៌មាន ដែលធ្វើឲ្យ ប៉ះពាល់ដល់សេចក្តីថ្លៃថ្នូររបស់អ្នកដទៃ និងប៉ះពាល់ដល់ទំនៀមទម្លាប់សង្គម សណ្ដាប់ធ្នាប់ សាធារណៈ រួមទាំងសន្តិសុខជាតិនោះទេ។
លោក ហ៊ុន ម៉ាណែត បន្តថា រដ្ឋាភិបាល «ត្រូវការនូវការរួមចំណែកដើម្បីប្រឆាំងអំពើពុករលួយ ការកែទម្រង់ច្បាប់ និង ប្រព័ន្ធយុត្តិធម៌សង្គម ការកែទម្រង់រដ្ឋបាលសាធារណៈ ការលើកស្ទួយលទ្ធិប្រជាធិបតេយ្យ ការគោរពសិទ្ធិមនុស្ស ការកសាងសង្គមមួយប្រកបដោយភាពយុត្តិធម៌ សុខសន្តិភាព និងការអភិវឌ្ឍយូរអង្វែងដែលជាបំណងប្រាថ្នា និងជាចក្ខុវិស័យរបស់រាជរដ្ឋាភិបាលកម្ពុជា»។
លោកលើកទឹកចិត្តឲ្យសារព័ត៌មាន សហការដោះស្រាយការបំពានក្រមសីលធម៌វិជ្ជាជីវៈ ការផ្សព្វផ្សាយព័ត៌មានក្លែងក្លាយបំភ្លៃការពិត ការបញ្ចេញមតិដែលមានចរិតបំពុលសង្គម ការជេរប្រមាថ ការញុះញង់បង្កឱ្យកើតមានអរិភាព និងការបែកបាក់សាមគ្គីភាពជាតិ។ សារព័ត៌មានក៏ត្រូវចូលរួមថែរក្សាសុខសន្តិភាព ការអភិវឌ្ឍប្រទេសជាតិ និងពង្រឹងលទ្ធិប្រជាធិបតេយ្យផងដែរ។
ក្រៅពីជួយផ្សព្វផ្សាយគោលនយោបាយរបស់រដ្ឋាភិបាល លោកនាយករដ្ឋមន្ត្រី ចង់ឃើញសារព័ត៌មាន «ធ្វើជាកញ្ចក់ឆ្លុះបញ្ចាំងអំពីភាពពិតជាក់ស្តែង និងភាពអសកម្មនៅក្នុងសង្គមដើម្បីរាជរដ្ឋាភិបាល មានមូលដ្ឋានដោះស្រាយបញ្ហាចំគោលដៅ និងមានប្រសិទ្ធភាព»។
លោកក៏ស្នើឲ្យសារព័ត៌មាន ផ្សព្វផ្សាយអប់រំដល់ប្រជាពលរដ្ឋ អំពីវិធានការបង្ការគ្រោះថ្នាក់ចរាចរណ៍ គ្រោះថ្នាក់នៃការប្រើប្រាស់គ្រឿងញៀន ការជួញដូរមនុស្ស ហើយការផ្សព្វផ្សាយព័ត៌មាន ត្រូវប្រកាន់ខ្ជាប់នូវក្រមសីលធម៌វិជ្ជាជីវៈ ដោយឈរលើមូលដ្ឋាននៃតុល្យភាព និងភាពគ្រប់ជ្រុងជ្រោយនៃព័ត៌មាន និងការផ្សព្វផ្សាយដែលធ្វើឱ្យខូចផលប្រយោជន៍ជាតិ និងបាត់បង់ទំនុកចិត្តពីសាធារណជន។
ក្លិបអ្នកកាសែតកម្ពុជា នឹងរៀបចំវេទិកានិពន្ធនាយកសារព័ត៌មាននៅថ្ងៃទី២១ ខែធ្នូនេះ ដោយមានវត្តមានរបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងថ្នាក់ដឹកនាំ និងតំណាងស្ថាប័នសារព័ត៌មានជាង១០០នាក់។
ក្លិបអ្នកកាសែតកម្ពុជាបានថ្លែងថា បច្ចុប្បន្ននេះ អ្នកសារព័ត៌មានមួយចំនួននៅតែមិនទាន់បានអនុវត្តវិជ្ជាជីវៈ និងការបញ្ចេញមតិ បានត្រឹមត្រូវនៅឡើយ ដែលធ្វើឲ្យពួកគេងាយប្រឈមនឹងផ្លូវច្បាប់ និងធ្វើឲ្យប៉ះពាល់ដល់វិស័យសារព័ត៌មាននៅកម្ពុជា»។
លោក ណុប វី នាយកប្រតិបត្តិ សមាគមសម្ព័ន្ធអ្នកសារព័ត៌មានកម្ពុជា បានថ្លែងថា បន្ថែមទៅលើការខ្លឹមសារដូចមាននៅក្នុងសាររបស់លោកនាយករដ្ឋមន្ត្រី រដ្ឋាភិបាលគួរអនុវត្តជាក់ស្ដែងពាក់ព័ន្ធនឹងការធ្វើឲ្យប្រសើរឡើងដល់លំហនៃស្ថាប័នសារព័ត៌មានឯករាជ្យ ដែលលោកយល់ថាកំពុងថយចុះ។ បន្ថែមទៅលើនេះ លោកថា និទណ្ឌភាពទៅលើករណីដែលមានអ្នកសារព័ត៌មានជាជនរងគ្រោះគួរតែត្រូវបានពន្លឿនក្នុងនីតិវិធីច្បាប់។
លោកក៏លើកទឹកចិត្តឲ្យពន្លឿនការធ្វើគោលនយោបាយពាក់ព័ន្ធនឹងវិស័យសារព័ត៌មានដូចជាច្បាប់វិសោធនកម្មច្បាប់ស្ដីពីរបបសារព័ត៌មាន និងច្បាប់ទទួលបានព័ត៌មាន។
លោកថ្លែងថា៖ «រឿងដែលកាន់តែសំខាន់ថែមទៀតនោះគឺសន្តិសុខសម្រាប់អ្នកសារព័ត៌មាន។ យើងឃើញថាថ្មីៗនេះអ្នកសារព័ត៌មាននៅខេត្តសៀមរាប ត្រូវបានគេបាញ់សម្លាប់ដោយសារតែគាត់បានចុះយកព័ត៌មាន និងរាយការណ៍ព័ត៌មានច្រើនទាក់ទងនឹងបទល្មើសព្រៃឈើនៅសហគមន៍ជនជាតិដើម»។
លោកបន្ត អ្នកសារព័ត៌មានមិនគួរត្រូវបានសម្លាប់ដោយសារតែការបំពេញការងារ ហើយប្រសិនបើមានករណីក្ដីក្ដាំងណាមួយ តុលាការគួរប្រើច្បាប់របបសារព័ត៌មានសម្រាប់ដោះស្រាយ៕
