លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ប្រគល់ពានរង្វាន់ឌីជីថលកម្ពុជាឆ្នាំ២០២៤ សម្រាប់គំនិតផ្តួចផ្តើមគំរូចំនួន៦។ រូបថត សហការី
ភ្នំពេញ៖ ពានរង្វាន់ឌីជីថលកម្ពុជាឆ្នាំ២០២៤ បានបង្ហាញពីការចាប់អារម្មណ៍លើអ្នកច្នៃប្រឌិតឌីជីថលរបស់ប្រទេស ខណៈពេលផែនការមហិច្ឆិតាក្នុងការផ្លាស់ប្តូរទិដ្ឋភាពឌីជីថលរបស់កម្ពុជាកាន់តែខិតជិតមកដល់។
រៀបចំឡើងដោយក្រសួងប្រៃសណីយ៍ និងទូរគមនាគមន៍ (ក.ប.ទ.) ក្រោមប្រធានបទ គាំទ្រដល់ពលរដ្ឋកម្ពុជាក្នុងការប្រើប្រាស់បច្ចេកវិទ្យាឌីជីថលដើម្បីអនាគតកាន់តែល្អ» ព្រឹត្តិការណ៍នេះបានប្រារព្ធឡើងនូវសមិទ្ធផលឆ្នើមក្នុងការច្នៃប្រឌិតឌីជីថលលើគ្រប់វិស័យ។
ជាអធិបតីក្នុងពិធីនេះ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានប្រកាសផែនការនាំយកអ៊ីនធឺណេតល្បឿនលឿនទៅកាន់ឃុំចំនួន ១៦០០នៅឆ្នាំ ២០២៧ ជាផ្នែកមួយនៃការជំរុញដ៏ទូលំទូលាយរបស់រដ្ឋាភិបាលសម្រាប់ការផ្លាស់ប្តូរឌីជីថល។
ដោយបានកត់សម្គាល់ដោយសង្កត់ធ្ងន់លើសារៈសំខាន់នៃការផ្សារភ្ជាប់ការបែងចែកទីក្រុង-ជនបទ លោកបានថ្លែងថា៖ «ការតភ្ជាប់បណ្ដាញអ៊ីនធឺណិតមិនមែនគ្រាន់តែជាសមិទ្ធផលបច្ចេកទេសប៉ុណ្ណោះទេ វាជាខ្សែជីវិតសម្រាប់ការអប់រំ ការថែទាំសុខភាព និងឱកាសសេដ្ឋកិច្ច»។
បន្ថែមពីលើការផ្តល់ពានរង្វាន់ដល់គំនិតផ្តួចផ្តើមគំរូចំនួនប្រាំមួយ ព្រឹត្តិការណ៍នេះបានលើកឡើងពីតួនាទីនៃហេដ្ឋារចនាសម្ព័ន្ធឌីជីថល ការអភិវឌ្ឍន៍ជំនាញ និងការច្នៃប្រឌិតក្នុងការកសាងប្រទេសកម្ពុជាដែលមានទំនាក់ទំនងកាន់តែច្រើន។
ក្រសួងក៏មានគម្រោងបណ្តុះបណ្តាលប្រជាជនកម្ពុជាដែលមានជំនាញឌីជីថលចំនួន ១០ម៉ឺននាក់នៅឆ្នាំ ២០៣០ ដោយផ្តោតលើវិស័យកម្រិតខ្ពស់ ដូចជា សន្តិសុខតាមអ៊ីនធឺណិត វិទ្យាសាស្ត្រទិន្នន័យ និងបញ្ញាសិប្បនិម្មិត។
ផែនទីបង្ហាញផ្លូវអភិវឌ្ឍន៍ជំនាញឌីជីថល ២០២៤-២០៣៥ នឹងបម្រើជាមគ្គុទ្ទេសក៍ដើម្បីបំពាក់ជូនប្រជាពលរដ្ឋនូវឧបករណ៍ដែលត្រូវការដើម្បីរីកចម្រើនក្នុងសេដ្ឋកិច្ចឌីជីថល។
ផ្នែកសំខាន់នៃយុទ្ធសាស្ត្រគឺការធានានូវអក្ខរកម្មឌីជីថល ១០០ភាគរយ ក្នុងចំណោមនិស្សិតបញ្ចប់វិទ្យាល័យនៅឆ្នាំ ២០៣០ និងបង្កើនអក្ខរកម្មឌីជីថលរបស់ប្រជាជនទូទៅដល់ ៥០ភាគរយ។
ក្រុមនិស្សិតបណ្ឌិត្យសភាបច្ចេកវិទ្យាឌីជីថលកម្ពុជា ធ្វើបទបង្ហាញងំពីផលិតផលម៉ាស៊ីនបកប្រែភាសាពិការភ្នែក។ រូបថត ហុង រស្មី
នេះរួមបញ្ចូលទាំងបរិយាប័ន្ននៃការអប់រំឌីជីថលទៅក្នុងកម្មវិធីសិក្សា និងបំពាក់សាលារៀនជាមួយនឹងបច្ចេកវិទ្យាសំខាន់ៗ។សាលធំនៃ Hyatt Regency Phnom Penh បានបង្កើតជាសំឡេងលាន់រំពង ខណៈមានការប្រកាសម្ចាស់ពានរង្វាន់ឌីជីថលកម្ពុជាឆ្នាំ២០២៤ ជាព្រឹត្តិការណ៍ប្រចាំឆ្នាំដែលបានធ្វើឡើងនៅថ្ងៃទី ២៩ ខែវិច្ឆិកា ឆ្នាំ ២០២៤ ដែលផ្តល់កិត្តិយសដល់អ្នកត្រួសត្រាយផ្នែកឌីជីថលរបស់ប្រទេស។
លោករដ្ឋមន្ត្រី ជា វ៉ាន់ដេត បានថ្លែងក្នុងកម្មវិធីនោះថា៖ «កម្មវិធី ពានរង្វាន់ឌីជីថលកម្ពុជា ត្រូវបានរៀបចំឡើងក្នុងគោលបំណងលើកកម្ពស់ការផ្លាស់ប្តូរឌីជីថលតាមរបៀបវិជ្ជមាន តាមរយៈការលើកទឹកចិត្តដល់ការប្រើប្រាស់បច្ចេកវិទ្យាឌីជីថល និងការច្នៃប្រឌិតនៅកម្ពុជា»។
លោកបានបន្ដថា៖ «ខ្ញុំសូមថ្លែងអំណរគុណយ៉ាងជ្រាលជ្រៅចំពោះការខិតខំប្រឹងប្រែង និងការសហការគ្នារបស់អ្នកពាក់ព័ន្ធទាំងអស់ ជាពិសេសថ្នាក់ដឹកនាំ និងអង្គភាពក្រោមឱវាទរបស់ក្រសួង ក្រុមការងាររៀបចំកម្មវិធី និងអ្នកឧបត្ថម្ភរបស់យើង»។
លោក វ៉ាន់ដេត បានលើកឡើងពីការបោះជំហានទៅមុខរបស់កម្ពុជាក្នុងការច្នៃប្រឌិតឌីជីថល រួមទាំងការអភិវឌ្ឍន៍ហេដ្ឋារចនាសម្ព័ន្ធអ៊ីនធឺណិត កម្មវិធីអក្ខរកម្មឌីជីថល និងការខិតខំប្រឹងប្រែងក្នុងការរួមបញ្ចូលបញ្ញាសិប្បនិម្មិត។
លោកក៏បានគូសបញ្ជាក់ផងដែរអំពីលក្ខណៈរួមបញ្ចូលនៃពានរង្វាន់ ដែលទទួលស្គាល់សមិទ្ធផលនានានៅទូទាំងស្ថាប័នរដ្ឋាភិបាល ក្រុមហ៊ុនឯកជន និងការចាប់ផ្តើមអាជីវកម្ម ខណៈពេលដែលជើងឯកស្ត្រីក្នុងវិស័យបច្ចេកវិទ្យា។
ពិធីនៅឆ្នាំនេះ គឺជាខួបលើកទី១០ នៃពានរង្វាន់ឌីជីថលកម្ពុជា ជាដំណើរដ៏វែងឆ្ងាយមួយទសវត្សរ៍ ដែលជំរុញឱ្យមានការបង្កើតថ្មី និងភាពជាសហគ្រិន។ នេះបើយោងតាមលោក សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន ក្រសួងប្រៃសណីយ៍ និងទូរគមនាគមន៍។
លោក សិទ្ធិសេរី បានឱ្យដឹងថា៖ «ឆ្នាំនេះ យើងមិនត្រឹមតែប្រារព្ធខួបលើកទី ១០ របស់យើងប៉ុណ្ណោះទេ ប៉ុន្តែក៏មានការគាំទ្រខ្លាំងបំផុតផងដែរ។ យើងមានបេក្ខជនឆ្នើមចំនួន ៦៤ នាក់ ដែលធ្វើឱ្យវាពិបាកសម្រាប់ចៅក្រមរបស់យើងក្នុងការជ្រើសរើសអ្នកឈ្នះ»។
ជាងនេះទៅទៀត រង្វាន់ទទួលបាន ៣ម៉ឺនដុល្លារ កើនឡើងពាក់កណ្ដាលធៀបនឹងឆ្នាំមុន ដោយសារការរួមចំណែករបស់លោករដ្ឋមន្ត្រី។ នៅក្នុងកម្មវិធីប្រកាសពានរង្វាន់នេះ លោក វ៉ាន់ដេត បានប្រកាសពីគំនិតផ្តួចផ្តើមសំខាន់ៗ ដើម្បីជំរុញការផ្លាស់ប្តូរឌីជីថលរបស់ប្រទេសជាតិ គោលបំណងលើកកម្ពស់ហេដ្ឋារចនាសម្ព័ន្ធឌីជីថល អភិវឌ្ឍកម្លាំងពលកម្មជំនាញ និងជំរុញចំណេះដឹងផ្នែកឌីជីថលទូទាំងប្រទេស។
លោកមរដ្ឋមន្ត្រីក៏បានសង្កត់ធ្ងន់ទៅលើ Tenbox ជាអ្នកឈ្នះពានរង្វាន់កាលពីឆ្នាំមុន ដែលជាសក្ខីភាពនៃឥទ្ធិពលរបស់កម្មវិធីទៅលើអ្នកច្នៃប្រឌិតក្នុងស្រុក។
ចាប់តាំងពីការឈ្នះរបស់ខ្លួន Tenbox បានប្រកួតប្រជែងនៅឯកិច្ចប្រជុំកំពូលវិនិយោគ SelectUSA នៅវ៉ាស៊ីនតោនឌីស៊ី និង Francotech 2024 នៅទីក្រុងប៉ារីស។ វាក៏បានក្លាយជាបេក្ខភាពចុងក្រោយសម្រាប់ពានរង្វាន់ ASEAN Digital Awards 2025 ដែលពង្រឹងកេរ្តិ៍ឈ្មោះរបស់ខ្លួនក្នុងនាមជាអ្នកនាំមុខគេក្នុងការច្នៃប្រឌិត។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ប្រគល់ពានរង្វាន់ឌីជីថលកម្ពុជាឆ្នាំ២០២៤ ដល់បណ្ឌិត្យសភាបច្ចេកវិទ្យាឌីជីថលកម្ពុជា សម្រាប់ផលិតផលម៉ាស៊ីនបកប្រែភាសាពិការភ្នែក។ រូបថត សហការី
ជ័យលាភីទាំង ៦ប្រភេទពានរង្វាន់ និងប្រាក់រង្វាន់សម្រាប់ជ័យលាភី នៅឆ្នាំនេះរួមមាន៖
១. ស្ថាប័នឯកជនល្អបំផុតប្រចាំឆ្នាំ ជាមួយនឹងប្រាក់រង្វាន់ចំនួន ២៥០០ ដុល្លារ បានឈ្នះទៅលើក្រុមហ៊ុន Wing Inter Logistics Technologies Co., Ltd សម្រាប់ផលិតផល Wingagri។
២. បរិយាបន្នឌីជីថលល្អបំផុតប្រចាំឆ្នាំ ជាមួយនឹងប្រាក់រង្វាន់ចំនួន ២៥០០ ដុល្លារ ត្រូវបានផ្តល់ឱ្យក្រុមហ៊ុន Solar Green Energy (Cambodia) Co., Ltd សម្រាប់ផលិតផល Solar Smart Irrigation System, Solar Irrigation Station។
៣. មាតិកាឌីជីថលល្អបំផុតប្រចាំឆ្នាំ ជាមួយនឹងប្រាក់រង្វាន់ចំនួន ២៥០០ ដុល្លារ ត្រូវបានប្រគល់ឱ្យក្រុមហ៊ុន 606 Digital សម្រាប់ផលិតផល Sampi TV។
៤. ពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ ជាមួយនឹងប្រាក់រង្វាន់ចំនួន ១៥០០០ ដុល្លារ បានឈ្នះទៅលើក្រុមហ៊ុន Jalat Logistics សម្រាប់ផលិតផល Jalat Logistics។
៥. ពានរង្វាន់ការស្រាវជ្រាវ និងនវានុវត្តន៍ឌីជីថលល្អបំផុតប្រចាំឆ្នាំ ជាមួយនឹងប្រាក់រង្វាន់ចំនួន ៧៥០០ដុល្លារអាម៉េរិក ត្រូវបានផ្តល់ឱ្យបណ្ឌិត្យសភាបច្ចេកវិទ្យាឌីជីថលកម្ពុជា សម្រាប់ផលិតផលម៉ាស៊ីនបកប្រែភាសាពិការភ្នែក។
៦. ពានរង្វាន់កិត្តិយសស្ត្រីឆ្នើមបច្ចេកវិទ្យាប្រចាំឆ្នាំ បានឈ្នះទៅលើអ្នកស្រី រស់ ពេជ្រហេមី មកពីក្រុមហ៊ុនមេនូឡាយហ្វ៍ ខេមបូឌា៕
