លោក ហ៊ុន ម៉ាណែត ថ្លែងក្នុងពិធីប្រគល់សញ្ញាប័ត្រដល់និស្សិតសាកលវិទ្យាល័យធនធានមនុស្ស នៅថ្ងៃទី២៦ ខែធ្នូ ឆ្នាំ២០២៤។ AKP
លោកនាយករដ្ឋមន្ត្រី ហ៊ុន ម៉ាណែត អះអាងថា ទោះបីមិនឃើញរដ្ឋាភិបាលឆ្លើយឆ្លងតាមហ្វេសប៊ុករឿងកោះគុតក៏ដោយ ក៏រដ្ឋាភិបាលមិននៅស្ងៀមនោះទេ ពាក់ព័ន្ធនឹងការការពារបូរណភាពទឹកដីកម្ពុជា ខណៈដែលក្រុមអ្នកប្រឆាំងត្រៀមធ្វើបាតុកម្មនៅសហរដ្ឋអាមេរិកនៅថ្ងៃទី១៩ ខែមករា ករណីកោះគុត។
លោក ហ៊ុន ម៉ាណែត ថ្លែងនៅក្នុងពិធីប្រគល់សញ្ញាប័ត្រដល់និស្សិតនៃសាកលវិទ្យាល័យធនធានមនុស្សនៅថ្ងៃទី២៦ ខែធ្នូនេះថា មានអ្នករិះគន់ថារដ្ឋាមិនឃើញឆ្លើយតបនៅពេលមានការចោទប្រកាន់រឿងបាត់ដី។
លោកថា៖ «ខ្ញុំឆ្លើយតែមួយម៉ាត់ទេ រដ្ឋាភិបាលមិនឆ្លើយឆ្លងតាមហ្វេសប៊ុកមិនមែនបានន័យថា រដ្ឋាភិបាលមិនធ្វើការដើម្បីការពារ កសាង ពង្រឹងបូរណភាពទឹកដី និងជំរុញការអភិវឌ្ឍប្រទេសរបស់យើងលើកកម្ពស់ជាតិយើងលើឆាកអន្តរជាតិនោះទេ យើងធ្វើរាល់ថ្ងៃ»។
លោកបន្តថា៖ «យើងមិនចាំបាច់មួយថ្ងៃៗលើកគ្រវីទង់ជ័យហើយស្រែក ហើយលើកគ្នាប្រឆាំងនេះប្រឆាំងនោះ មិនបាច់ទេ គឺយើងលើកគ្នាធ្វើការ»។
ការលើកឡើងរបស់លោក ហ៊ុន ម៉ាណែត ឆ្លើយតបទៅនឹងការរិះគន់ជាបន្តបន្ទាប់ ជាពិសេសពីសំណាក់ក្រុមអ្នកដែលប្រឆាំងមានមូលដ្ឋាននៅក្រៅប្រទេស លើបញ្ហាអធិបតេយ្យភាពនៃកោះគុត ដែលភាគីកម្ពុជានឹងថៃទាមទារអធិបតេយ្យភាព ជាពិសេសនៅពេលមានការចុះផ្សាយថា ភាគីថៃអះអាងថា កោះនេះជារបស់ខ្លួន។
ក្រុមអ្នកប្រឆាំងនៅសហរដ្ឋអាមេរិក គ្រោងធ្វើបាតុកម្ម«ការពារកោះគុត» នៅទីក្រុងឡងប៊ិច រដ្ឋកាលីហ្វ័រញ៉ា នៅថ្ងៃទី១៩ ខែមករា ខាងមុខនេះ ដើម្បីទាមទារឲ្យរដ្ឋាភិបាលកម្ពុជាបញ្ជាក់ថា «មួយផ្នែកនៃកោះគុតជាកម្មសិទ្ធិរបស់ខ្មែរ» ព្រមទាំងចង់ឲ្យកម្ពុជាយកបញ្ហានេះឡើងទៅតុលាការអន្តរជាតិ ICJ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា យល់ឃើញថា បញ្ហាព្រំដែននិងទឹកដីគឺជាបញ្ហាក្ដៅទាំងសម្រាប់ពលរដ្ឋខ្មែរ និងសម្រាប់ពលរដ្ឋថៃ ដូច្នេះពលរដ្ឋតែងតែបារម្ភ ហើយបញ្ចេញមតិនានា។ លោកថា អ្វីដែលរដ្ឋាភិបាលគួរធ្វើគឺបញ្ជាក់ពីភាពច្បាស់លាស់ បង្ហាញពីវិធីសាស្ត្រក្នុងការដោះស្រាយបញ្ហានេះ ដោយបង្ហាញពីពេលវេលា និងដំណើរការនៃការចរចា និងធ្វើបច្ចុប្បន្នភាពអំពីបញ្ហានេះឲ្យពលរដ្ឋអស់មន្ទិល។
លោកថ្លែងថា៖ «ខ្ញុំមើលឃើញមេរៀនពីរឿង CLV-DTA ដែលរដ្ឋាភិបាលបានប្រើប្រាស់យន្តការផ្ដល់ព័ត៌មានជាបន្តបន្ទាប់រួមមានដូចជា កិច្ចព្រមព្រៀង និងដំណើរការនៃកិច្ចសហប្រតិបត្តិការអំពីគម្រោងនោះដល់ប្រជាជន និងមានកម្មវិធីដំណើរកម្សាន្តឲ្យពលរដ្ឋបានឃើញតំបន់ព្រំដែនដែលជាកម្មវត្ថុនៃការសង្ស័យរបស់ពលរដ្ឋ»។
លោកបន្តថា៖ «សម្រាប់ករណីកោះគុត វិញ ការខ្វះព័ត៌មានគឺជាចំណែកដែលធ្វើឲ្យពលរដ្ឋមានមន្ទិលសង្ស័យ មានការបារម្ភ។ ដូច្នេះ រដ្ឋាភិបាលគួរតែមានការផ្សព្វផ្សាយឲ្យបានទូលំទូលាយ ដើម្បីឲ្យពលរដ្ឋបានដឹង។ បើថា កោះគុត ជាតំបន់ត្រួតស៊ីគ្នា តើរដ្ឋាភិបាលអាចបើកឲ្យពលរដ្ឋធ្វើដំណើរទៅលេងតំបន់នោះបានដែរឬអត់។ បើថៃទៅបាន តើប្រជាពលរដ្ឋខ្មែរទៅបានឬអត់ ព្រោះកោះនោះនៅតែជាតំបន់មិនទាន់ដាច់ស្រេច»។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា យល់ថា ទោះបីជាពលរដ្ឋ ឬ ក្រុមអ្នកប្រឆាំងមានទឹកចិត្តស្នេហាជាតិយ៉ាងណាក៏ដោយ ក៏មិនគួរធ្វើអ្វីជ្រុលដែលធ្វើឲ្យប៉ះពាល់ដល់ប្រយោជន៍កម្ពុជានោះទេ។ លោកលើកទឹកចិត្តឲ្យភាគីទាំងអស់ស្រាវជ្រាវលើឯកសារពាក់ព័ន្ធនានា ដើម្បីកុំឲ្យការធ្វើអត្ថាធិប្បាយណាមួយខាតប្រយោជន៍។
លោកថ្លែងថា៖ «រឿងទឹកដី គ្រប់ពលរដ្ឋកម្ពុជាត្រូវតម្កល់ប្រយោជន៍ជាតិរួម។ ទោះអស់លោកមួយចំនួនប្រឆាំងរដ្ឋាភិបាលក្ដី ឬនៅក្នុងរដ្ឋាភិបាលក្ដី បើរឿងហ្នឹងប៉ះពាល់ដល់ប្រយោជន៍ជាតិខ្មែរទាំងមូល គួរតែកុំធ្វើលក្ខណៈដោយឡែក។ សូមគិតថា បញ្ហាទឹកដី អធិបតេយ្យភាព ត្រូវតែមានទស្សនឯកភាពគ្នាក្នុងនាមជាជាតិសាសន៍មួយដើម្បីតទល់នឹងជាតិសាសន៍ផ្សេងទៀត»។
លោកស្នើថា រាល់ការចូលរួមក្នុងកិច្ចការពារទឹកដី ត្រូវមានភាពវ័យឆ្លាត និងបត់បែន ចៀសវាងការចូលរួមតាមបែបមួយដែលជាការហុចដងដាវទៅឲ្យដៃគូ ឬសត្រូវ ឬឲ្យអ្នកនយោបាយណាម្នាក់ ដែលធ្វើឲ្យខូចប្រយោជន៍របស់ខ្មែរ៕
