លោកនាយករដ្ឋមន្រ្តីហ៊ុន ម៉ាណែត បានចេញបទបញ្ជាជាថ្មីដល់អភិបាល ស្នងការនគរបាលរាជធានីខេត្ត នគរបាលជាតិ និងកម្លាំងអាវុធហត្ថឱ្យបង្រ្កាបក្មេងទំនើងឱ្យអស់ និងមិនត្រូវដោះលែងពួកគេនោះទេ។ រូបថត STPM
ភ្នំពេញៈ ប្រមុខរដ្ឋាភិបាលបានណែនាំឱ្យអាជ្ញាធរមានសមត្ថកិច្ចបន្តបង្រ្កាបក្រុមក្មេងទំនើងឱ្យអស់ ហើយមិនត្រូវដោះលែង តែត្រូវដាក់ទោសពួកគេឱ្យបានធ្ងន់ធ្ងរ ដើម្បីកុំឱ្យមហាជនអស់ជំនឿទៅលើអាជ្ញាធរ ក៏ដូចជារាជរដ្ឋាភិបាល។
លោកនាយករដ្ឋមន្រ្តីហ៊ុន ម៉ាណែត បានចេញបទបញ្ជាជាថ្មីដល់អភិបាល ស្នងការនគរបាលរាជធានីខេត្ត នគរបាលជាតិ និងកម្លាំងអាវុធហត្ថជាដើមនេះ គឺបន្ទាប់ពីសកម្មភាពក្រុមក្មេងទំនើងបានកក្រើកឡើងវិញ ជាពិសេសនៅក្នុងរាជធានីភ្នំពេញ និងខេត្តតាកែវ ក្រោយពីមានការបង្រ្កាបបានជាង៣ពាន់នាក់ ដែលធ្វើឱ្យបញ្ហានេះ ស្ងប់ស្ងាត់បានមួយរយៈប៉ុណ្ណោះ។
ក្នុងពិធីប្រគល់សញ្ញាបត្រដល់និស្សិតនាថ្ងៃទី២៦ខែធ្នូនេះ ប្រមុខរដ្ឋាភិបាលបានលើកឡើងថា ដោយសារតែមិនសូវមានការផ្សព្វផ្សាយច្រើនពីការបង្រ្កាបក្រុមក្មេងទំនើងនោះ ប្រជាពលរដ្ឋជាច្រើនបានគិតថា ក្មេងទំនើងទាំងនោះត្រូវបានដោះលែងទៅវិញអស់ហើយ។
លោកមានប្រសាសន៍ថា៖«ដូចវែកចក ប៉ុន្តែចកនេះ វែកហើយកុំទុកនៅក្នុងបឹង យកចេញទាំងអស់ ដាក់ម្តុំ។ នៅសល់ប៉ុន្មានទៀត ចាប់ផ្តើម វែកបន្តៗ យូរទៅ គង់តែអស់ទេ តែកុំបន្ធូដៃ»។
លោកបានណែនាំឱ្យមានការដាក់ទោសក្មេងទំនើងទំាងនោះឱ្យបានធ្ងន់ធ្ងរ ដើម្បីកុំឱ្យពួកគេខូចអនាគត ព្រោះថា បើគ្រាន់តែធ្វើការអប់រំណែនាំ ហើយដោះលែងទៅវិញនោះ ពួកគេមិនរាងចាលនោះទេ ដែលនេះនឹងធ្វើឱ្យអ្នកផ្សេងទៀតក៏មិនខ្លាច ហើយនឹងប្រព្រឹត្តដូចគ្នានេះដែរ។
លើសពីនោះ មិនត្រូវមានការដោះលែងអ្នកដែលជាប់ឃុំទាំងជាង២ពាន់នាក់នោះទេ។
ក្រសួងយុត្តិធម៌ កាលពីថ្ងៃពុធ ទី២៥ ខែធ្នូនេះ បានធ្វើសន្និសីទសារព័ត៌មានបង្ហាញលទ្ធផល នៃការបង្រ្កាបលើក្រុមក្មេងទំនើងទៅតាមបញ្ជារបស់លោកនាយករដ្ឋមន្រ្តី កាលពីថ្ងៃទី២៣ ខែឧសភាកន្លងមក។
ជាលទ្ធផល ក្នុងរយៈពេលជាង៧ខែមកនេះ តុលាការរាជធានីខេត្តបានចាត់ការសំណុំរឿងក្មេងទំនើងចំនួន២ ១១៥ករណី ដែលក្មេងទំនើងចំនួន៣ ៣០០នាក់ត្រូវបានឃាត់ខ្លួន។ ក្នុងនោះ ក្មេងទំនើងចំនួន២ ៨៤៩នាក់ត្រូវបានឃុំខ្លួននៅពន្ធនាគារផងដែរ។
លោកនាយករដ្ឋមន្រ្តីបានណែនាំឱ្យមានការចាត់វិធានការទៅលើអ្នកដែលដាក់ដាវសំាម៉ូរ៉ៃតាមម៉ូតូផងដែរ ដោយមិនចាំបាច់ទាល់តែពួកគេធ្វើសកម្មភាពកាប់គ្នានោះទេ។ ជាពិសេសគឺនៅក្នុងរាជធានីភ្នំពេញ ដែលសកម្មភាពនេះ វាស្មើនឹងការកាន់កាប់អាវុធខុសច្បាប់។
លោកថ្លែងដូច្នេះថា៖«កុំចាំតែកាប់គ្នាហើយ បានប្រមូល អាដាក់ដាវសំាម៉ូរ៉ៃតាមម៉ូតូហ្នឹង ព្រោះវាអត់មានត្រូវការដាក់ដាវសំាម៉ូរ៉ៃសម្រាប់ឆ្ការព្រៃនៅក្រុងភ្នំពេញទេ។ បើដាក់សំាម៉ូរ៉ៃតាមម៉ូតូជិះទៅរៀនហើយ គ្មានយកទៅឆ្ការព្រៃក្នុងសាលាទេ។ គ្មានសាលាណាមានព្រៃទៀតទេ។ អញ្ជឹងយើងចាំគាត់ដកដាវកាប់គេទេ? ឬមួយក៏បង្ការឱ្យហើយ»។
នគរបាលកំពុងតែស្រាវជ្រាវរកឃាត់ខ្លួនក្មេងទំនើងម្នាក់នេះ ដើម្បីចាត់ការទៅតាមផ្លូវច្បាប់។ រូបថត ស្នងការដ្ឋាននគរបាលខេត្តកំពត
ម្យ៉ាងវិញទៀត ក៏ត្រូវមានវិធានការចំពោះក្រុមក្មេង ដែលអួតដាវ ហើយបបួលកាប់គ្នា នៅតាមបណ្តាញសង្គមហ្វេសប៊ុកផងដែរ ដែលទង្វើនេះអាចជាការគំរាមប្រមាថជីវិតអ្នកដទៃ។
លោកបានស្នើឱ្យក្រសួងយុត្តិធម៌ពិនិត្យមើលផ្លូវច្បាប់ចំពោះ សកម្មភាពនេះ ហើយអាចធ្វើវិសោធនកម្មច្បាប់ ប្រសិនបើកម្រិតទោសនៅស្រាល ក្នុងការដាក់ទោសពួកគេ។
លោកប្រមុខរដ្ឋាភិបាលមានប្រសាសន៍ថា៖«ទាញដាវមកអួតកន្លែងខ្លះ បបួលគ្នាកាប់ តើអាហ្នឹងស្មើនឹងគំរាមប្រមាថជីវិតទេ? អញ្ជឹងខ្ញុំឱ្យពិនិត្យមើលច្បាប់ឱ្យមែនទែន ហើយបើច្បាប់នៅស្រាលពេក សូមឱ្យធ្វើវិសោធនកម្ម ដើម្បីដាក់មុខព្រួយនេះ ឱ្យកាន់តែខ្លាំងតែម្តង។ ទាល់តែដាក់គាត់ខ្លាំង។ បើគ្រាន់តែអប់រំគាត់ យើងអាណិតគាត់ម្នាក់ឯង តែយើងមិនបានអាណិតឪពុកម្តាយគាត់ ដែលកូនមិនរាង កូនចេញទៅកាន់តែអឿលើសដើម...ចេញទៅ ថ្ងៃណាមួយស្លាប់បាត់ ដាច់ដៃដាច់ជើង»។
លោកណែនាំថា៖«អញ្ជឹងឱ្យមើលអ្នកដែលពូកែអួតតាមហ្វេសប៊ុក ដាវសំាម៉ូរ៉ៃអីហ្នឹងណា។ ខំបញ្ចេញមកក្មួយអើយ ស្រួល ព្រោះតាមហ្វេសប៊ុក គេស្រាវជ្រាវ ទៅណា រត់មិនរួចទេ។
ខ្ញុំថា ល្អក្មួយអើយ កុំអួតគ្នារឿងហ្នឹង អាណិតឪពុកម្តាយ តែបើយើងអនុវត្តច្បាប់តឹងរឹង យើងបង្ការ យើងជួយទាំងក្មួយហ្នឹង យើងជួយទាំងឪពុកម្តាយ ជួយទាំងប្រជាពលរដ្ឋ»។
លោកលើកឡើងថា ការចាប់ក្មេងជាង២ពាន់នាក់ដាក់ពន្ធនាគារនោះ គឺមិនមែនជារឿងមួយសប្បាយចិត្តនោះទេ ប៉ុន្តែ បើមិនដាក់វិធានការបែបនេះទេ មនុស្សរាប់ម៉ឺននាក់ផ្សេងទៀត អាចនឹងរងគ្រោះ ដោយសារតែពួកគេ។
ការដែលដកហូតម៉ូតូយកទៅរក្សាទុករយៈពេល៣ខែ និងការហាមឃាត់កូនមិនឱ្យជិះម៉ូតូ ក៏ជួយបង្ការបញ្ហាបង្ហោះម៉ូតូបានផងដែរ។
ប្រមុខរដ្ឋាភិបាលសង្ឃឹមថា មហាជន ព្រមទាំងឪពុកម្តាយ មានការគាំទ្រ ពេលឃើញអាជ្ញាធរអនុវត្តច្បាប់ ព្រោះវិធានការនេះ មិនមែនបំផ្លាញអនាគតកូនរបស់ពួកគាត់នោះទេ។
ប៉ុន្តែ វាជួយការពារកូនទាំងនោះទៅវិញ ដើម្បីឱ្យពួកគេកុំជ្រុលខ្លួន ត្រូវគេកាប់ ឬកាប់គេ ដែលធ្វើឱ្យជាប់ពន្ធនាគារ ឬស្លាប់ខ្លួនឯង។
លោកបានអំពាវនាវដល់ឪពុកម្តាយដូច្នេះថា៖«សូមចាត់ទុកថា យកទៅអប់រំមួយរយៈ កុំឱ្យខូចអនាគតរយៈពេលវែង។ អ្នកប្រព្រឹត្តមិនច្រើនទេ តែវាបំពុលធ្វើឱ្យប៉ះពាល់ទាំងអស់»។
លោកនាយករដ្ឋមន្រ្តីក៏បានណែនាំ ដល់អភិបាល ស្នងការនគរបាលរាជធានីខេត្ត និងអាជ្ញាធរមានសមត្ថកិច្ចពាក់ព័ន្ធទាំងអស់ តាមរយៈសារសំលេងកាលពីថ្ងៃទី២៥ ខែធ្នូផងដែរ ឱ្យធ្វើការស្រាវជ្រាវតាមរកមុខសញ្ញា ហើយត្រូវតែចាត់វិធានការភ្លាមៗតែម្តង ដោយកុំចាំតែបទបញ្ជា ឬមានការរិះគន់ពីប្រជាពលរដ្ឋ។ បង្រ្កាបក្រុមក្មេងទំនើងនេះ គឺវាមិន ខុសជាមួយឪពុកម្តាយ ប្រជាជន និងអត់ខុសជាមួយច្បាប់នោះទេ។
លោកបានបញ្ជាថា៖«សូមចាត់ចែងរឿងនេះឱ្យបាន កុំឱ្យប្រជាជនធុញទ្រាន់ បាត់ជំនឿលើយើង ដដែលជាដដែល ដាក់បានបន្តិចងើបៗ។ បើរឿងអីផ្សេងពិបាកធ្វើ វាស្ងាត់ អារឿងគ្រឿងញៀន ដូចអំពិលអំពេក តែពួកអាក្មេងស្ទាវកាប់ដាវនេះ ដូចជាមិនលំបាកធ្វើទេ តាមមុខសញ្ញវាឱ្យជាប់»។
លោកនាយករដ្ឋមន្រ្តីបន្តថា៖«មុខសញ្ញា ស្រាវជ្រាវយកទៅ។ អាពួកជេរ ពួកអី យើងស្រាវជ្រាវរកឃើញ ដល់អាពួកអានេះចេញមកកាប់ពេញភូមិ យើងរកវាមិនឃើញម៉េច? ហើយបង្ការធ្វើម៉េចអាពួកផ្សេងៗកុំឱ្យវាចេញមកទៀត។ បើអាពួកផ្សេងទៀត វានៅគឃ្លើន ចាត់ចែងវាទៅ កុំទុក កុំចាំខ្ញុំស្រែក កុំចាំមហាជនស្រែកតាមហ្វេសប៊ុក។ ងើបមួយ ដាក់មួយ ពួកអាអស់ហ្នឹង»។
ប្រមុខរដ្ឋាភិបាលក៏បានឆ្ងល់ដែរថា ចំពោះការបង្រ្កាបក្រុមក្មេងទំនើងមិនអស់នោះ ខណៈដែលអាជ្ញាធរមានទាំងកម្លាំង និងថវិកាសម្រាប់ចាត់ចែងធ្វើការងារនោះ។
លោកថ្លែងដូច្នេះថា៖«យើងមានកម្លាំងក្នុងដៃ មានលុយក្នុងដៃ មានមនុស្សក្នុងដៃ ធ្វើពួកអាក្មេងៗហ្នឹងមិនបែក យើងធ្វើម៉េចឥលូវ? ដាក់ឱ្យស្មើដៃតែម្តង កុំទម្លាក់ដៃ។ តាមរាជធានីខេត្តរឿងអាក្មេងទំនើងកាប់ចាក់គ្នានេះ រាប់សិបឆ្នាំហើយធ្វើមិនចប់ម៉េច។ ខ្ញុំឆ្ងល់ដែរ»។
ក្រសួងយុត្តិធម៌ក៏បានឱ្យដឹងផងដែរថា រាជធានីភ្នំពេញមានករណីក្មេងទំនើងច្រើនជាងគេ ខណៈដែលខេត្តស្ទឹងត្រែងគ្មានករណីក្មេងទំនើងនេះសោះ ក្នុងរយៈពេលជាង៧ខែចុងក្រោយនេះ។
អភិបាលរង និងជាអ្នកនាំពាក្យសាលារាជធានីភ្នំពេញ លោកកើត ឆែបានឱ្យដឹងថា អភិបាលរាជធានីភ្នំពេញ លោកឃួង ស្រេងនឹងដឹកនាំកិច្ចប្រជុំមួយជាមួយនឹងគណៈបញ្ជាការឯកភាព ដើម្បីអនុវត្តប្រសាសន៍ណែនាំរបស់ប្រមុខរដ្ឋាភិបាល ដើម្បីធ្វើយ៉ាងណា ឱ្យប្រតិបត្តិការណ៍បង្រ្កាបនេះ មានប្រសិទ្ធភាព និងត្រូវបានធ្វើឡើងជាប្រចាំ ដូចភ្លៀងរលឹមតែម្តង។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកសំ វិច្ឆិកាវិញ ក៏បានឱ្យដឹងផងដែរថា លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ តែងតែប្រជុំដាក់ផែនការបង្រ្កាបក្រុមក្មេងទំនើងជាបន្តបន្ទាប់នាពេលកន្លងមក។
លោកបញ្ជាក់ថា៖« ជំនាញ និងអធិការដ្ឋាន ទទួលផែនការបង្រ្កាបទប់ស្កាត់ក្មេងទំនើងទៅតាមបទបញ្ជារបស់រដ្ឋាភិបាល។
ការងារនេះយើងនឹងបន្តពង្រឹងលើផែនការចាស់ និងអនុវត្តសកម្មភាពថ្មី ដែលប្រើវិធានការសរុប មធ្យោបាយសរុប និងកម្លាំងសរុប ដើម្បីបន្តស្រាវជ្រាវ និងបង្រ្កាបក្មេងទំនើង ជាពិសេស ក្មេងទំនើង ដែលបង្ហោះដាវ កាំបិត អីនេះតាមបណ្តាញសង្គម»៕
