ប្រភេទរថយន្តធុនធ្ងន់ ដែលរដ្ឋបាលរាជធានីភ្នំពេញបានធ្វើការណែនាំ ក្នុងការ ធ្វើចរាចរ ចេញ-ចូល ក្នុងភូមិសាស្រ្តរាជធានីភ្នំពេញ។ រូបថត រដ្ឋបាលរាជធានីភ្នំពេញ
ភ្នំពេញៈ រដ្ឋបាលរាជធានីភ្នំពេញ បានកែសម្រួលការធ្វើចរាចររបស់រថយន្តដឹកជញ្ជូនធុនធ្ងន់គ្រប់ប្រភេទចេញ-ចូលរាជធានីភ្នំពេញ និងបានព្រមានឃាត់ទុក ដោយគ្មានកាលកំណត់ ដើម្បីអប់រំណែនាំដល់ម្ចាស់រថយន្តណា ដែល មិនអនុវត្តតាមការកែសម្រួលនេះ។
សេចក្តីណែនាំរបស់រដ្ឋបាលរាជធានីភ្នំពេញចុះថ្ងៃទី២ ខែធ្នូបានលើកឡើងថា កន្លងមករដ្ឋបាលរាជធានីភ្នំពេញ បានដាក់ចេញនូវគោលការណ៍ណែនាំជាបន្តបន្ទាប់។
ក្នុងនោះបានកំណត់តម្រាយផ្លូវ និងពេលវេលាធ្វើចរាចរសម្រាប់រថយន្តដឹកជញ្ជូនធុនធ្ងន់គ្រប់ប្រភេទ ចេញ-ចូលក្នុងរាជធានីភ្នំពេញ ដើម្បីធានា និងរក្សាបាននូវសណ្តាប់ធ្នាប់របៀប រៀបរយសាធារណៈ កាត់បន្ថយនូវការកកស្ទះ និងគ្រោះថ្នាក់ចរាចរណ៍នៅតាមដងផ្លូវ ។
រដ្ឋបាលរាជធានីភ្នំពេញ បញ្ជាក់ថា៖«ផ្អែកតាមស្ថានភាពបច្ចុប្បន្ននេះ ចំនួនប្រជាពលរដ្ឋក៏ដូចជាបរិមាណយានយន្តក្នុងរាជធានីភ្នំពេញ មានការកើនឡើងខ្ពស់គួរឱ្យកត់សម្គាល់។ នេះធ្វើឱ្យតំបន់មួយចំនួន និងតម្រាយផ្លូវនៅក្នុង ភូមិសាស្ត្រជាយរាជធានីភ្នំពេញ ដែលពីមុនមានសភាពស្ងប់ស្ងាត់ ចរាចរមិនសូវមមាញឹក ក៏បានប្រែក្លាយទៅជាតំបន់មាន ពលរដ្ឋរស់នៅច្រើនកុះករ ហើយការធ្វើដំណើរលើដងផ្លូវមាន ការកកស្ទះ និងកើតមាននូវគ្រោះថ្នាក់ចរាចរជាញឹកញាប់ ដែលភាគច្រើនបង្កឡើងដោយរថយន្ត ធុនធ្ងន់»។
ដើម្បីដោះស្រាយបញ្ហាប្រឈមនេះ រដ្ឋបាលរាជធានីភ្នំពេញ ចាំបាច់ត្រូវធ្វើការកែ សម្រួលឡើងវិញ នូវតម្រាយផ្លូវ ពេលវេលា និងប្រភេទរថយន្តដឹកជញ្ជូនធុនធ្ងន់ចេញ-ចូលក្នុង ភូមិសាស្រ្តរាជធានីភ្នំពេញ។
សេចក្តីណែនាំបានសរសេរថា រថយន្តដឹកជញ្ជូនធុនធ្ងន់ត្រូវបានកំណត់ជា ២ ប្រភេទ។ ប្រភេទទី១ គឺ រថយន្តដឹកជញ្ជូនធុនធ្ងន់ ដែលមានភ្លៅ២ កម្រិតទម្ងន់សរុបអនុញ្ញាត អតិបរមារបស់រថយន្តកំណត់ត្រឹម១៦តោន អាចធ្វើចរាចរចេញ-ចូលរាជធានីភ្នំពេញ បាននៅពេលថ្ងៃ និងពេលយប់។
ប៉ុន្តែត្រូវហាមការធ្វើដំណើរនៅវេលាម៉ោង ៥:០០ ដល់៩:០០ព្រឹក និង១៦:០០ ដល២១:០០ល្ងាច ក្នុងខណ្ឌដូនពេញ ចំការមន ៧មករា ទួលគោក និងបឹងកេងកង។
ប្រភេទទី២ គឺ រថយន្តដឹកជញ្ជូនធុនធ្ងន់ដែលមានភ្លៅ៣ ឡើងទៅ កម្រិតទម្ងន់សរុបអនុញ្ញាតអតិបរមារបស់រថយន្តកំណត់ចាប់ពី២១តោន ឡើងទៅ ត្រូវបានអនុញ្ញាតឱ្យធ្វើចរាចរបានពេលថ្ងៃ និងពេលយប់នៅលើផ្លូវក្រវាត់ក្រុងទី៣ និងអាចធ្វើចរាចរចេញ-ចូលរាជធានីភ្នំពេញនៅ ពេលយប់ចាប់ពីម៉ោង ០៩:០០ នាទីយប់ រហូតដល់ ម៉ោង ០៥:០០ នាទីព្រឹក។
ប៉ុន្តែហាមធ្វើចរាចរ ទាំងថ្ងៃ និងយប់ក្នុងភូមិសាស្ត្រខណ្ឌដូនពេញ ៧មករា ចំការមន បឹងកេងកង និងទួលគោក ព្រមទាំងផ្លូវ និងស្ពានមួយចំនួនទៀត ក្នុងរាជធានីភ្នំពេញ។
សេចក្តីណែនាំបានបន្តថា ដោយឡែកចំពោះរថយន្តដឹកជញ្ជូនផ្គត់ផ្គង់ការដ្ឋានសំណង់ និងការដ្ឋានជួសជុលស្ថាបនា ផ្លូវ លូ រួមមាន រថយន្តដឹកខ្សាច់ ដី ថ្ម និងបេតុង រដ្ឋបាលរាជធានីភ្នំពេញ នឹងផ្ដល់លិខិតអនុញ្ញតជាអាទិភាពដោយឡែក ដោយមានការកំណត់ពេលវេលា និងតម្រាយផ្លូវឆ្ពោះទៅកាន់ការដ្ឋាននីមួយៗ ដែលម្ចាស់យានយន្តបានស្នើសុំមករដ្ឋបាលរាជធានីភ្នំពេញ ។
ក្រៅពីនោះ សម្រាប់រថយន្តក្រុងដឹកអ្នកដំណើរ (Bus) គ្រប់ប្រភេទ រដ្ឋបាលរាជធានីភ្នំពេញនឹងធ្វើការ ណែនាំអំពីម៉ោងពេល និងតម្រាយផ្លូវក្នុងរាជធានីភ្នំពេញដោយឡែក។
ចំពោះរថយន្ត ដែលត្រូវធ្វើចរាចរចូល និងឆ្លងកាត់រាជធានីភ្នំពេញ ហើយស្ថិតនៅក្នុងម៉ោង ហាមឃាត់ត្រូវចូលសំចតរង់ចាំនៅទីតាំងសមស្របណាមួយ ឬចំណតជាយរាជធានីភ្នំពេញដែល មានស្រាប់ស្ថិតនៅគ្រប់ច្រកចេញ-ចូលផ្លូវជាតិទាំង៦ (ផ្លូវជាតិលេខ១, លេខ២, លេខ៣, លេខ៤, លេខ៥ និងលេខ៦) និងហាមដាច់ខាតការឈប់សំចតរង់ចាំនៅតាមដងផ្លូវ។
រដ្ឋបាលរាជធានីភ្នំពេញបានព្រមានដូច្នេះថា៖«ក្នុងករណីមិនអនុវត្តតាមខ្លឹមសារនៃសេចក្តីណែនាំនេះ រថយន្តនឹងទទួលរងនូវការឃាត់ទុកដោយគ្មានកាលកំណត់ ដើម្បីអប់រំណែនាំម្ចាស់រថយន្ត អំពីការធ្វើចរាចរដឹកជញ្ជូនក្នុង រាជធានីភ្នំពេញ»។
អនុរដ្ឋលេខាធិការ និង ជាអ្នកនាំពាក្យ ក្រសួងសាធារណការ និង ដឹកជញ្ជូន លោក ផន រឹមបានឱ្យដឹងថា យានជំនិះ ដែលត្រូវបានចុះបញ្ជីសរុបចាប់តាំងពីឆ្នាំ១៩៩០មក មានជាង៧,៥គ្រឿង។ ក្នុងនោះរួមមានម៉ូតូចំនួន៦ ៤៤៣ ៦៩៤ រថយន្តធុនស្រាល ៨៤២ ៥៦៥ និងរថយន្តធុនធ្ងន់មានចំនួន៣០០ ២៥៣គ្រឿងផងដែរ៕
