ស្ត្រីជនជាតិហ្វីលីពីន ១៣នាក់ (បិទមុខ) បានត្រឡប់ទៅដល់ហ្វីលីពីនវិញហើយកាលពីថ្ងៃទី២៩ ខែធ្នូ ឆ្នាំ២០២៤។ ក្រសួងសង្គមកិច្ចហ្វីលីពីន
ស្ត្រីជនជាតិហ្វីលីពីន ១៣ នាក់ដែលត្រូវបានកាត់ទោសពាក់ព័ន្ធរឿងស៊ីឈ្នួលពពោះនៅកម្ពុជា បានត្រឡប់ទៅដល់ហ្វីលីពីនវិញហើយកាលពីថ្ងៃទី២៩ ខែធ្នូ ក្រោយពេលព្រះមហាក្សត្រ បានលើកលែងទោសតាមការស្នើសុំ។ ស្ត្រី ៣នាក់ក្នុងចំណោមពួកគេបានសម្រាលកូនរួចហើយ។
យោងតាមសេចក្ដីប្រកាសព័ត៌មានរបស់ក្រសួងសង្គមកិច្ចនិងអភិវឌ្ឍន៍ហ្វីលីពីន ស្ត្រីទាំង ១៣ រូប កំពុងស្ថិតនៅក្នុងមជ្ឈមណ្ឌលសង្គ្រោះអ្នករងគ្រោះដោយអំពើជួញដូរមនុស្ស ដើម្បីទទួលបានការថែទាំ។
ស្ត្រីទាំង ១៣ រូប ត្រូវបានឃាត់ខ្លួនកាលពីដើមខែតុលា នៅឃុំព្រែកអញ្ចាញ ស្រុកមុខកំពូល ខេត្តកណ្ដាល ហើយត្រូវបានតុលាការកាត់ទោសកាលពីដើមខែធ្នូ ដោយដាក់ពន្ធនាគារកំណត់ពេល ៤ឆ្នាំ ប៉ុន្តែ ត្រូវអនុវត្តទោស ២ ឆ្នាំ ខណៈទោស ២ឆ្នាំទៀត ត្រូវបានព្យួរ ពាក់ព័ន្ធនឹងការប៉ុនប៉ងជួញដូរមនុស្សឆ្លងដែន ដែលជាអំពើល្មើសច្បាប់កម្ពុជា។
ពួកគេត្រូវបានលើកលែងទោសដោយព្រះមហាក្សត្រ តាមការស្នើសុំរបស់ស្ថានទូតហ្វីលីពីននៅ កម្ពុជា តាមរយៈគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។
ក្រសួងការបរទេសហ្វីលីពីន បានថ្លែងនៅក្នុងសេចក្ដីប្រកាសព័ត៌មាននៅថ្ងៃទី២៩ ខែធ្នូថា៖ «ការត្រឡប់មកដល់ផ្ទះវិញដោយសុវត្ថិភាពរបស់ពួកគេបង្ហាញពីសក្ខីភាពនៃទំនាក់ទំនងមិត្តភាពយូរអង្វែងរវាងហ្វីលីពីន និងកម្ពុជា និងការប្ដេជ្ញាចិត្តយ៉ាងមុតមាំនៃរដ្ឋាភិបាលទាំងពីរក្នុងករប្រយុទ្ធប្រឆាំងអំពើជួញដូរមនុស្ស និងឧក្រិដ្ឋកម្មឆ្លងដែន»។
ក្រសួងដដែលក៏បានក្រើនរំលឹកដល់ពលរដ្ឋហ្វីលីពីនទាំងអស់ថា «អំពើស៊ីឈ្នួលពពោះ គឺជាអំពើខុសច្បាប់នៅកម្ពុជា ហើយសកម្មភាពនេះអាចនឹងត្រូវកាត់ទោសតាមច្បាប់កម្ពុជា»៕
