មន្ត្រីនគរបាលទេសចរណ៍ ជូនភ្ញៀវទេសចរអន្តរជាតិឆ្លងព្រំដែន តាមច្រកទ្វារព្រំដែនអន្តរជាតិប៉ោយប៉ែត នៅថ្ងៃទី២៩ ខែធ្នូ ឆ្នាំ២០២៤។ អង្គភាពនគបាលទេសចរណ៍ប្រចាំច្រកទ្វារព្រំដែនអន្តរជាតិប៉ោយប៉ែត
ទោះបីជារាជរដ្ឋាភិបាលបញ្ចុះតម្លៃទិដ្ឋាការប្រភេទទេសចរណ៍និងធម្មតា វិស័យឯកជនយល់ឃើញថា ការដកតម្លៃទិដ្ឋាការទាំងស្រុងសម្រាប់គ្រប់ប្រទេស ឬសម្រាប់គោលដៅទេសចរណ៍សំខាន់ៗនឹងជំរុញដល់កំណើនភ្ញៀវទេសចរមកកម្ពុជា។
កាលពីថ្ងៃទី២៨ ខែធ្នូ កន្លងទៅ រាជរដ្ឋាភិបាលកម្ពុជាបានប្រកាសថា ចាប់ពីថ្ងៃទី១ ខែមករា ឆ្នាំ២០២៥ តទៅ កម្ពុជានឹងការបញ្ចុះតម្លៃទិដ្ឋាការ ប្រភេទ e-Visa T (ទេសចរណ៍) ពី ៣៦ ដុល្លារ មកនៅត្រឹម ៣០ ដុល្លារ ខណៈដែល e-Visa E (ធម្មតា) នឹងត្រូវបញ្ចុះពី ៤២ ដុល្លារ មកនៅត្រឹម ៣៥ ដុល្លារ។
ទោះបីជានេះជាការលើកទឹកចិត្តមួយក៏ដោយ ក៏វិស័យឯកជនក្នុងវិស័យទេសចរណ៍នៅតែលើកទឹកចិត្តឲ្យរដ្ឋាភិបាលពិចារណាលើកលែងទិដ្ឋាការសម្រាប់ភ្ញៀវទេសចរណ៍ដូចនៅប្រទេសជិតខាងខ្លះ ដើម្បីលើកកម្ពស់ភាពប្រកួតប្រជែង និងជំរុញកំណើនភ្ញៀវទេសចរអន្តរជាតិ។
ទិន្នន័យរបស់ក្រសួងទេសចរណ៍ដែលទើបចេញផ្សាយ បានបង្ហាញថា ពីខែមករា-ខែវិច្ឆិកា ឆ្នាំ ២០២៤ ភ្ញៀវបរទេសដែលចូលមកប្រទេសកម្ពុជា មានចំនួនសរុប ៦ លាននាក់ កើនឡើង ២២ ភាគរយបើធៀបនឹងរយៈពេលដូចគ្នាឆ្នាំ ២០២៣ ដែលមាន ៤, ៩២ លាននាក់។
នៅប្រទេសថៃ ចំនួនភ្ញៀវទេសចរណ៍អន្តរជាតិ បានកើនលើសពីគោលដៅ ៣៥លាននាក់នៅឆ្នាំ២០២៤ដែលអាជ្ញាធរថៃបានដាក់ចេញ បង្កើតប្រាក់ចំណូលជាង ៥២ពាន់លានដុល្លារ។
ប្រទេសថៃ បានលើកលែងទិដ្ឋាការសម្រាប់ប្រទេសសរុបចំនួន ៩៣ ដែលអញ្ញាតឲ្យទេសចរបរទេសស្នាក់នៅរហូតដល់រយៈពេល ៦០ថ្ងៃ។ នេះបើតាមអាជ្ញាធរទេសចរណ៍ថៃ ដោយបានបញ្ជាក់ថា ការលើកលែងទិដ្ឋាការនេះដើរតួនាទីសំខាន់ក្នុងការជំរុញកំណើនភ្ញៀវទេសចរនេះ។
នៅប្រទេសវៀតណាម ភ្ញៀវទេសចរណ៍ត្រឹម១១ខែឆ្នាំ២០២៤នេះ មានចំនួនជាង ១៥,៨លាននាក់ កើនឡើងជាង ៤១ភាគរយប្រៀបធៀបនឹងរយៈពេលដូចគ្នាឆ្នាំ២០២៣។ វៀតណាមរំពឹងថា នឹងទទួលបានភ្ញៀវទេសចរអន្តរជាតិពី១៧ ទៅ១៨លាននាក់តាមផែនការនៅឆ្នាំ២០២៤នេះ។
ការកើនឡើងនេះ ក៏រួមចំណែកពីការលើកលែងទិដ្ឋាការផងដែរ ដែលក្រៅពីការលើកលែងទិដ្ឋាការសម្រាប់ប្រទេសអាស៊ាន វៀតណាមក៏លើកលែងទិដ្ឋាការសម្រាប់ភ្ញៀវទេសចរពីតំបន់អឺរ៉ុបរយៈពេល ៤៥ថ្ងៃ។ នេះបើតាមការចុះផ្សាយរបស់សារព័ត៌មាន VnEconomy។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក PATA យល់ឃើញថា ការបញ្ចុះថ្លៃទិដ្ឋាការរបស់កម្ពុជា គឺជាតថភាពសាមញ្ញ ហើយមិនអាចធ្វើឲ្យមានការចាប់អារម្មណ៍ខ្លាំងពីភ្ញៀវទេសចរណ៍អន្តរជាតិនោះទេ។
លោកលើកទឹកចិត្តឲ្យរដ្ឋាភិបាលលើកលែងតម្លៃទិដ្ឋាការសម្រាប់ភ្ញៀវទេសចរអន្តរជាតិ យ៉ាងហោចណាស់សម្រាប់ប្រភពទេសចរណ៍សំខាន់ៗ ដើម្បីជាការលើកទឹកចិត្ត។
លោកទទួលស្គាល់ថា ស្ថានភាពសេដ្ឋកិច្ចប្រទេសជិតខាងពិតជាប្រសើរជាងកម្ពុជា ដែលពួកគេអាចលើកលែងទិដ្ឋាការបែបនេះបាន ប៉ុន្តែ វាជារឿងចាំបាច់ដែលកម្ពុជាគួរពិចារណាធ្វើអ្វីដែលអាចធ្វើបានដើម្បីបង្កើនការប្រកួតប្រជែង។ លោករំពឹងថា ការបញ្ចុះតម្លៃខាងលើនេះគ្រាន់តែជាការអនុវត្តដំណាក់កាលដំបូងប៉ុណ្ណោះ។
លោស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានយល់ឃើញថា ការបញ្ចុះតម្លៃទិដ្ឋាការនេះអាចទាក់ទាញការចាប់អារម្មណ៍តិចតួចដែរពីសំណាក់ភ្ញៀវទេសចរអន្តរជាតិ។
លោកស្រីថ្លែងថា៖ «ការបញ្ចុះតម្លៃនេះវាទាក់ទាញដែរ តែទាក់ទាញតិចតួច បើបញ្ចុះឲ្យអស់តែម្ដង វាអាចទាក់ទាញខ្លាំង ព្រោះអីសម័យនេះ គេចង់ធ្វើអ្វីដែលងាយស្រួល មិនត្រឹមតែលុយប៉ុណ្ណោះទេ វាបូករួមទាំងពេលវេលា និងការងារបន្ថែមដែលពួកគេត្រូវចំណាយក្នុងការសុំទិដ្ឋាការ»។
កាលពីខែវិច្ឆិកា ឆ្នាំ២០២៣ លោកនាយករដ្ឋមន្ត្រី ហ៊ុន ម៉ាណែត បានបញ្ជាក់ថា វាមិនទាល់ដល់ពេលវេលាសមស្របដែលកម្ពុជាអាចលើកលែងទិដ្ឋាការទាំងស្រុងបានទេ ពីព្រោះកម្រៃទទួលបានពីទិដ្ឋាការគឺជាប្រភពចំណូលចម្បងមួយរបស់កម្ពុជា។
បុគ្គលិកបម្រើការនៅភ្នាក់ងារទេសចរណ៍ម្នាក់នៅខេត្តសៀមរាប ដែលសុំមិនបញ្ចេញឈ្មោះ បានឲ្យដឹងថា កន្លងមកលោកមិនបានសួរពីចំណាប់អារម្មណ៍របស់ភ្ញៀវទេសចរអន្តរជាតិអំពីតម្លៃទិដ្ឋាការព្រោះជាការរៀបចំពីក្រៅប្រទេស ហើយភ្ញៀវក៏មិនដែលបង្ហាញការត្អូញត្អែរពីតម្លៃទិដ្ឋាការដែរ។
យ៉ាងណាក៏ដោយ លោកបានលើកឡើងពីការមិនពេញចិត្តរបស់ភ្ញៀវអន្តរជាតិដែលចូលមកកម្ពុជាតាមច្រកផ្លូវគោក ដោយសារតែការធ្វើប្រតិបត្តិការយឺតយ៉ាវនៅពេលចូលមកកម្ពុជា ដែលពេលខ្លះរហូតដល់ទៅ២ម៉ោង។
លោកបន្តថា ដើម្បីឲ្យការឆ្លងកាត់ព្រំដែនមកកម្ពុជាបានលឿន ជាពិសេសនៅច្រកទ្វារជាមួយប្រទេសថៃ ដូចជាច្រកទ្វារអន្តរជាតិប៉ោយប៉ែត និងតាមច្រកនៅខេត្តប៉ៃលិន និងច្រកបាវិត ខេត្តស្វាយរៀង លោកត្រូវបង់ប្រាក់បន្ថែមទៅមន្ត្រីច្រកព្រំដែន ដែលក្នុងភ្ញៀវម្នាក់ត្រូវចំណាយ ៥ដុល្លារ។
លោកនិយាយថា៖ «សម្រាប់ខ្ញុំ យើងមានភ្ញៀវច្រើន មួយក្រុមពី ២០ ទៅ ៣០នាក់។ យើងមិនអាចឲ្យភ្ញៀវយើងដែលចាស់ៗឈរចាំ តម្រង់ជួរ យូរបានទេ។ អីចឹង យើងត្រូវបង្ខំចិត្តដាក់លុយថែមទៅខាងប៉ូលិសច្រកឲ្យគាត់ជួយសម្រួលធ្វើម៉េចឲ្យបានលឿន។ ខាងខ្ញុំ ច្រកចេញចូលសំខាន់ជាងគេ គឺបាវិត និងប៉ៃលិន។ សម្រាប់ប៉ោយប៉ែត យើងព្យាយាមពង្វាងភ្ញៀវមិនឲ្យចូលប៉ោយប៉ែតទេ ដោយសារតែស្មុគស្មាញពេក»។
លោកស្នើឲ្យក្រសួងពាក់ព័ន្ធពិនិត្យមើលលើករណីនេះ ដើម្បីសម្រួលដល់ភ្ញៀវទេសចរអន្តរជាតិ ដែលចូលរួមដល់ការទាក់ទាញភ្ញៀវទេសចរអន្តរជាតិមកទស្សនាប្រទេសកម្ពុជាកាន់តែច្រើន។
ភ្នំពេញប៉ុស្តិ៍មិនទាន់អាចសុំការឆ្លើយតបពីលោក ទូច សុខៈ អ្នកនាំពាក្យក្រសួងមហាផ្ទៃ ពាក់ព័ន្ធនឹងការលើកឡើងពីដំណើរការយឺតយ៉ាវនៃការឆ្លងកាត់ច្រកព្រំដែនគោកសម្រាប់ភ្ញៀវទេសចរអន្តរជាតិ ដូចការលើកឡើងទេ នៅថ្ងៃទី៣០ ខែធ្នូ ឆ្នាំ២០២៥នេះ៕
