ក្រុមមន្ត្រី ACU ចុះផ្សព្វផ្សាយទិវា ៩ធ្នូ នៅទីប្រជុំជនផ្សារបឹងកេងកង និងវិទ្យាល័យទឹកល្អក់ រាជធានីភ្នំពេញ។Post Staff
ភ្នំពេញៈ ដើម្បីអាចសម្រេចទៅបាន នូវការផ្តល់សេវាសាធារណៈល្អ ប្រកបដោយប្រសិទ្ធភាព គឺត្រូវការ ចាំបាច់នូវរដ្ឋ បាលសាធារណៈ ដែលស្អាតស្អំ បម្រើរាស្ត្រ និងបម្រើរដ្ឋ ប្រកបដោយមនសិការ និងការយកចិត្តទុកដាក់ ទទួលខុសត្រូវ ក៏ដូចជាការចូលរួមពីគ្រប់ភាគីទាំងអស់ផងដែរ។ នេះជាការលើកឡើងរបស់ប្រមុខរដ្ឋាភិបាល ក្នុងសារលិខិតអបអរសាទរទិវាជាតិ និងអន្តរជាតិ ប្រយុទ្ធប្រឆាំងអំពើពុករលួយ ៩ធ្នូ។
ទិវាជាតិប្រយុទ្ធប្រឆាំងអំពើពុករលួយឆ្នាំនេះ គឺផ្តោតលើការផ្តល់សេវាសាធារណៈល្អ ក្រោមប្រធានបទ “សេវាសាធារណៈល្អ រាស្ត្រស្រលាញ់គាំទ្រ”។ ការជ្រើសរើសប្រធានបទនេះ គឺសំដៅលើ ការលើកកម្ពស់ស្មារតី ពង្រឹងយន្តការគ្រប់គ្រង និង ផ្តល់សេវាសាធារណៈ ប្រកបដោយលក្ខណៈទំនើប និងតម្លាភាព ចៀសវាងនូវអំពើពុករលួយ ការបំពានក្រមសីលធម៌វិជ្ជាជីវៈ ឬបំពានអំណាចក្នុងការអនុវត្តតួនាទី និងភារកិច្ច។
សារលិខិតបានសរសេរថា ការអបអរសាទរទិវា ជាតិប្រយុទ្ធប្រឆាំងអំពើពុករលួយ ៩ធ្នូ គឺ« ដើម្បីលើកកម្ពស់ស្មារតីប្រយុទ្ធប្រឆាំងអំពើពុករលួយគ្រប់រូបភាព គ្រប់វិស័យ និងគ្រប់ ជាន់ថ្នាក់ សំដៅចូលរួមពង្រឹងអភិបាលកិច្ចល្អ និងនីតិរដ្ឋនៅក្នុងការដឹកនាំ និងការគ្រប់គ្រងរដ្ឋ ដែលជាមូលដ្ឋានចាំបាច់ក្នុងការ អភិវឌ្ឍសង្គមជាតិ»។
សារលិខិតបានរំលេចថា រាជរដ្ឋាភិបាលកម្ពុជា នីតិកាលទី៧ បានដាក់ចេញនូវ យុទ្ធសាស្ត្រ បញ្ចកោណ ដើម្បី កំណើន ការងារ សមធម៌ ប្រសិទ្ធភាព និងចីរភាព។ ក្នុងនោះ មានការលើកកម្ពស់ការអនុវត្តអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ និងអភិក្រម ជីវភាព នៃប្រព័ន្ធតួអង្គតែមួយ ពោលគឺការអភិវឌ្ឍស្ថាប័ន ការពង្រឹង អភិបាលកិច្ចល្អ និងការពង្រីកប្រសិទ្ធភាពការងារក្នុងវិស័យសាធារណៈ។
រាជរដ្ឋាភិបាលកម្ពុជា សម្រេចបាននូវលទ្ធផលធំៗ ដូចជា ការរក្សាបាននូវកំណើនសេដ្ឋកិច្ច ការជំរុញ និងកៀរគរធុរជន និងការវិនិយោគ ការលើកកម្ពស់សុខុមាលភាពរបស់ប្រជាពលរដ្ឋ និងមន្ត្រីរាជការ ព្រមទាំងការធ្វើ កំណែទម្រង់គ្រប់វិស័យ។
ក្នុងនោះរួមមាន ការគ្រប់គ្រងហិរញ្ញវត្ថុសាធារណៈ យុត្តិធម៌ និងតុលាការ និងការគ្រប់គ្រងរដ្ឋបាលសាធារណៈ ដែលផ្តោតសំខាន់លើការចាក់គ្រឹះឱ្យកាន់តែរឹងមាំនៃគុណភាព ប្រសិទ្ធភាព ទំនើបកម្ម និងការអភិវឌ្ឍដោយចីរភាពយូរអង្វែង។
លោកនាយករដ្ឋមន្រ្តីហ៊ុន ម៉ាណែតបញ្ជាក់ថា៖«រាជរដ្ឋាភិបាលក៏បានពង្រឹងការអនុវត្ត និងពង្រីកក្របខ័ណ្ឌច្បាប់ រួមមានការពង្រឹងការប្រយុទ្ធប្រឆាំងអំពើពុករលួយ ដោយឆន្ទៈមុតស្រួច និងការប្តេជ្ញាខ្ពស់តាមរយៈវិធានការស្នូលទាំង ៣ គឺការអប់រំ បង្ការទប់ស្កាត់ និងការអនុវត្តច្បាប់ប្រឆាំងអំពើ ពុករលួយ ការលើកកម្ពស់អភិបាលកិច្ចល្អ និងការត្រួតពិនិត្យផ្ទៃក្នុង ព្រមទាំងការចូលរួមជាមួយសហគមន៍អន្តរជាតិ បំពេញ កាតព្វកិច្ចដែលកម្ពុជាមានប្រកបដោយការទទួលខុសត្រូវ និងមោទនៈ»។
ទោះបីជាយ៉ាងណាក៏ដោយ នៅក្នុងបរិការណ៍នៃការ លំបាក និងដុនដាបសេដ្ឋកិច្ចរបស់ពិភពលោក និងស្ថានភាពមិននឹងនរនៃស្ថិរភាព និងសន្តិភាពពិភពលោក នាពេលបច្ចុប្បន្ននេះ រាជរដ្ឋាភិបាល នៅមានការងារ និងឧបសគ្គជាច្រើន ដែលត្រូវបន្តប្រឹងប្រែងជម្នះ ដើម្បីសម្រេចឱ្យបាន នាំនាវាកម្ពុជាដើរឆ្ពោះទៅកាន់ការអភិវឌ្ឍបន្ថែម និងការកសាងថ្មីៗ ដែលបម្រើ ជាពិសេស ដល់ជីវភាពរស់នៅរបស់ពលរដ្ឋគ្រប់ជាន់ថ្នាក់ ឱ្យកាន់តែល្អប្រសើរ។
លោកនាយករដ្ឋមន្រ្តី មានជំនឿយ៉ាងមុតមាំថា៖«ដរាបណាយើងទាំងអស់គ្នា ទាំងរដ្ឋ ឯកជន និងមហាជនទូទៅ រួបរួមគ្នាប្រឹងប្រែងក្រោម ម្លប់តែមួយនៃ ជាតិ សាសនា ព្រះមហាក្សត្រ នៃយើង នោះយើងនឹងសម្រេចបាននូវគោលដៅរួម ដែលយើងទាំងអស់គ្នា ប៉ងប្រាថ្នាចង់បាននាពេលអនាគត»។
ប្រមុខរដ្ឋាភិបាលក៏បានស្នើដល់អង្គភាពប្រឆាំងអំពើពុករលួយ ស្ថាប័ន និងតួអង្គពាក់ព័ន្ធ ចូលរួមអនុវត្តនូវសកម្មភាពគន្លឹះៗមួយចំនួន ដែលគាំទ្រដល់កិច្ចប្រឹងប្រែងរួមគ្នា។
ក្នុងនោះរួមមាន ពង្រឹងការអប់រំស្តីពីការប្រឆាំងអំពើពុករលួយឱ្យមានវិសាលភាពគ្របដណ្តប់បានកាន់តែទូលាយ ចូលកាន់តែជ្រៅទៅ ក្នុងស្រទាប់សង្គម ទាំងក្នុងសាលា-ក្រៅសាលា ទាំងក្នុងស្ថាប័នសាធារណៈ ឯកជន និងសង្គមស៊ីវិល ទាំងមុនចេញធ្វើការ និងក្នុងពេលធ្វើការ។
លោកនាយករដ្ឋមន្រ្តីបានស្នើដូច្នេះថា៖«ជំរុញការបង្ការទប់ស្កាត់ក្នុងរដ្ឋបាលសាធារណៈ រួមមានការផ្តល់សេវាសាធារណៈបានកាន់តែមានតម្លាភាព និង គណនេយ្យភាព ការគ្រប់គ្រងទំនាស់ផលប្រយោជន៍ ការការពារបុគ្គលរាយការណ៍ ការដាក់វិន័យ និងទោសទណ្ឌ -ល-»។
ក្រៅពីនោះ ក៏ត្រូវពង្រឹងកិច្ចសហប្រតិបត្តិការរវាងស្ថាប័នប្រឆាំងអំពើពុករលួយ និងដៃគូពាក់ព័ន្ធទាំងអស់ ទាំងស្ថាប័នសាធារណៈ ក្រុមជនបង្គោលប្រឆាំងអំពើពុករលួយ ស្ថាប័ននីតិប្បញ្ញត្តិ វិស័យឯកជន សង្គមស៊ីវិល ផ្នែកសិក្សាធិការ និងប្រព័ន្ធ ផ្សព្វផ្សាយ សំដៅពង្រឹង និងពង្រីកការងារអប់រំ និងបង្ការទប់ស្កាត់ឱ្យបានកាន់តែរលូន និងមានប្រសិទ្ធភាព។
ប្រមុខរដ្ឋាភិបាលក៏បានលើកឡើងផងដែរថា ការងារប្រឆាំងអំពើពុករលួយ ត្រូវការការរួមគ្នាពីគ្រប់ភាគី ហើយភាពស្អាតស្អំ ត្រូវតែកើតចេញពីផ្ទះ នៃភាគីនីមួយៗ និង ស្ថាប័ននីមួយៗ។
អង្គភាពប្រឆាំងអំពើពុករលួយ ដែលជាសេនាធិការរបស់រាជរដ្ឋាភិបាល ត្រូវដើរតួនាទី ជំរុញ និង សម្របសម្រួលចំពោះកិច្ចសហប្រតិបត្តិការចាំបាច់នានា ទាំងក្នុងការងារអប់រំ និងបង្ការទប់ស្កាត់ជាមួយដៃគូទាំងអស់។ ក្នុងនោះ ត្រូវផ្តោតជាពិសេស ទៅលើការអនុវត្តគោលនយោបាយ និងផែនការអភិវឌ្ឍជាតិរបស់រាជរដ្ឋាភិបាល និង ស្របជាមួយផែនការយុទ្ធសាស្ត្រជាតិប្រឆាំងអំពើពុករលួយ ដែលដាក់ចេញដោយក្រុមប្រឹក្សាជាតិប្រឆាំងអំពើពុករលួយ។
ក្នុងរយៈពេល៣ឆ្នាំចុងក្រោយនេះ អង្គភាពប្រឆាំងពើពុករលួយ (អ.ប.ព)បានកំពុងតែបង្កើនសកម្មភាពចុះអប់រំផ្សព្វផ្សាយ ដើម្បីបញ្រ្ជាបសារ ប្រឆាំងអំពើពុករលួយ ដោយប្រើវិធីសាស្រ្ត ប្រហាក់ប្រហែលគ្នា ជាពិសេសគឺ នៅមុនពេល ទិវាជាតិ និងអន្តរជាតិ ប្រយុទ្ធប្រឆាំងអំពើពុករលួយ ៩ធ្នូ។
អ្នកនាំពាក្យ អ.ប.ព លោកសយ ច័ន្ទវិចិត្តបានឱ្យដឹងថា ក្រុមការងាររបស់អ.ប.ពចំនួន៧ក្រុម ដែលមាន៦៧រូបបានចុះផ្សព្វផ្សាយយ៉ាងផុសផុល នៅតាមគោលដៅផ្សេងៗ ទាំង១៤ខណ្ឌ ក្នុងរាជធានីភ្នំពេញ ព្រមទាំងខេត្តកំពង់ស្ពឺ តាកែវ និងស្វាយរៀង។
គោលដៅទាំងនោះមានដូចជា តាមសាលារៀន សាកលវិទ្យាល័យ ទីផ្សារ ច្រកចេញចូលតែមួយ អធិការដ្ឋាននគរបាល និងរោងចក្រ ជាដើម។ លើសពីនោះ ក៏មានការប្រគុំតន្រ្តីខ្នាតធំមួយផ្សេងទៀតផងដែរ។
លោកបញ្ជាក់ថា៖«យើងបានបញ្រ្ជាបសារទៅសាធារណជន ដែលបានលទ្ធផលកាន់តែប្រសើរ។ សាធារណជនទទួលបានព័ត៌មានពីទិវានេះ ហើយបើចង់ចូលរួមប្រយុទ្ធប្រឆាំងនឹងអំពើពុករលួយ គាត់ដឹងថា អាចទៅតាមផ្លូវណា។ ការបញ្រ្ជាបសារចូលរួមប្រយុទ្ធប្រឆាំងនឹងអំពើពុករលួយ គឺទី១ ខ្លួនឯងហ្នឹងត្រូវតាំងចិត្តថា មិនប្រព្រឹត្តអំពើពុករលួយទេ។ ក្រៅហ្នឹង បើគាត់ឃើញមានអំពើពុករលួយ គាត់អាចផ្តល់ជាដំណឹង ឬដាក់ពាក្យបណ្តឹងទៅតាមយន្តការ ដែលអង្គភាពយើងជម្រាបជូនគាត់ ពេលចុះផ្សព្វផ្សាយនោះ»៕
