លោក ហ៊ុន សែន (ឆ្វេង) និងលោក ស៊ី ជីនពីង (ស្ដាំ) ក្នុងជំនួបនៅទីក្រុងប៉េកាំង កាលពីថ្ងៃទី៣ ខែធ្នូ ឆ្នាំ២០២៤។ SHS
លោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានស្នើប្រធានាធិបតីចិន លោក ស៊ី ជីនពីង ឲ្យបន្តពង្រឹងកិច្ចសហប្រតិបត្តិការសន្តិសុខ ការឆបោក ល្បែងអនឡាញ, ពង្រឹងទំនាក់ទំនងបក្សនិងបក្ស និងទំនាក់ទំនងកិច្ចការបរទេស ខណៈប្រទេសទាំងពីរប្ដេជ្ញាពង្រឹងមិត្តភាពដែកថែប។
លោក ហ៊ុន សែន បានជួបពិភាក្សាការងារជាមួយលោក ស៊ី ជីនពីង នៅទីក្រុងប៉េកាំង កាលពីថ្ងៃទី៣ ខែធ្នូ ក្នុងដំណើរទស្សនកិច្ច៣ថ្ងៃរបស់លោកទៅកាន់ប្រទេសចិន ដើម្បីពង្រឹងទំនាក់ទំនងមិត្តភាពដែកថែប និងកិច្ចសហប្រតិបត្តិការ។
ទំព័រហ្វេសប៊ុករបស់លោក បានបញ្ជាក់ថា ក្រៅពីការស្នើសុំចិនបន្តផ្តល់ជំនួយឥតសំណង និងកម្ចីឥណទានសម្រាប់ជំរុញការវិនិយោគ លោក ហ៊ុន សែន បានស្នើសុំចិនពង្រឹងសហប្រតិបត្តិការសន្តិសុខ ប្រយុទ្ធប្រឆាំងឧក្រិដ្ឋកម្មឆ្លងដែន ការឆបោក ការបង្ក្រាបបទល្មើសល្បែងអនឡាញ។
លោកស្នើឲ្យភាគីទាំងពីរបន្តពង្រឹងទំនាក់ទំនងរវាងបក្ស និងបក្ស ជាពិសេសទំនាក់ទំនងរវាងចលនាមហាជន និងគណៈទាក់ទងបរទេស និងពង្រឹងទំនាក់ទំនងកិច្ចការបរទេស ជាពិសេសក្នុងវេទិកាតំបន់ និងអន្តរជាតិ។
ទោះបីជាមិនមានការលើកឡើងលម្អិតអំពីគម្រោងព្រែកជីកហ្វូណនតេជោ ក៏ដោយ ទំព័រហ្វេសប៊ុករបស់លោកបានបញ្ជាក់ថា លោក ហ៊ុន សែន ក៏បានថ្លែងអំណរគុណដល់ លោក ស៊ី ជីនពីង ផងដែរចំពោះការគាំទ្ររបស់លោកលើគម្រោងព្រែកជីកនេះ។
លោក ស៊ី ជីនពីង លើកឡើងថា ចិននិងកម្ពុជា តែងតែរួមគ្នាការពារផលប្រយោជន៍រួម ក្នុងស្ថានការណ៍អន្តរជាតិដែលមានការប្រែប្រួលយ៉ាងលឿននិងស្មុគស្មាញ។ ចិននឹងបន្តគាំទ្រកម្ពុជា កសាងសហគមន៍ជោគវាសនារួមចិន-កម្ពុជា ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និង ស្តង់ដាខ្ពស់។
លោកបន្តថា ប្រទេសទាំងពីរ «ត្រូវចាប់យកឱកាសពង្រឹងកិច្ចសហប្រតិបត្តិការឈ្នះ-ឈ្នះថ្មី នៅក្នុងក្របខ័ណ្ឌនៃកំណែទម្រង់ និងអភិវឌ្ឍបែបថ្មីនៃការសម្រេចការកសាងសហគមន៍ជោគវាសនារួម ការអនុវត្ត កិច្ចសហប្រតិបត្តិការត្បូងពេជ្រ ការកសាងច្រករបៀងឧស្សាហកម្ម និងបច្ចេកវិទ្យា និងច្រករបៀងមច្ឆានិងអង្ករ»។
ប្រធានាធិបតីចិន ក៏បានជំរុញការបន្ស៊ីគ្នារវាងគំនិតផ្តួចផ្តើមខ្សែក្រវាត់ និងផ្លូវ និងយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិថ្មី។
ទំព័រហ្វេសប៊ុកលោក ហ៊ុន សែន បញ្ជាក់ថា៖ «លោកស៊ី ជីនពីង មានក្តីសប្បាយរីករាយ ដែលកម្ពុជាសម្រេចបានការអភិវឌ្ឍយ៉ាងឆាប់រហ័ស លើកកម្ពស់ជីវភាពរស់នៅរបស់ប្រជាជន។ ជាមួយគ្នានេះដែរ កម្ពុជា-ចិន នឹងបន្តការផ្លាស់ប្តូរប្រជាជនឱ្យកាន់តែជិតស្និទ្ធ ដោយកម្ពុជាជាគោលដៅពេញនិយមសម្រាប់ទេសចរចិន»
លោក ហ៊ុន សែន បានថ្លែងអំណរគុណចិនដែលបានធ្លាប់បានជួយដល់កម្ពុជាកាលពីកន្លងទៅ ដូចជា អំណោយពហុកីឡដ្ឋានមរតកតេជោ ការផ្ដល់វ៉ាក់សាំងកាលពីពេលរីករាលដាលនៃជំងឺកូវីដ១៩ និងជំនួយផ្សេងៗទៀត៕
