ក្រសួងបរិស្ថាន បានលើកឡើងថា ភាពវិជ្ជមាននៃកំណើនកាត់បន្ថយការប្រើប្រាស់ប្លាស្ទិកបានលេចឡើងជាបន្តបន្ទាប់ រាប់ចាប់ពីសិស្សានុសិស្ស លោកគ្រូ អ្នកគ្រូ អាជ្ញាធរមូលដ្ឋាន ប្រជាសហគមន៍ ព្រះសង្ឃ ប្រជាពលរដ្ឋ និងកម្មករកម្មការិនី និងបានបន្តដល់អាជ្ញាធរជាតិអប្សរា ដោយថ្មីៗនេះ អាជ្ញាធរជាតិអប្សរា បានប្រកាសព្យាយាមកាត់បន្ថយការប្រើប្រាស់ប្លាស្ទិក តាមរយៈការប្រើរបងឫស្សីហ៊ុមព័ទ្ធតាមការដ្ឋានជួសជុលជំនួសឱ្យការប្រើប្លាស្ទិកគ្រប។
គួរជម្រាបថា អាជ្ញាធរជាតិអប្សរា កាលពីថ្ងៃទី ៩ ខែកុម្ភៈ បានប្រកាសព្យាយាមកាត់បន្ថយការប្រើប្រាស់ប្លាស្ទិកមួយជំហានម្តងៗ នៅក្នុងរមណីយដ្ឋានអង្គរ ដើម្បីរួមចំណែកក្នុងការជួយដល់បរិស្ថានឱ្យកាន់តែប្រសើរ។
បច្ចុប្បន្ននេះ ក្រុមការងារ នៃអាជ្ញាធរជាតិអប្សរា កំពុងងាកមកប្រើប្រាស់វត្ថុធាតុដើមធម្មជាតិដូចជា ឫស្សី ដែលនឹងផ្តល់ការងារកាន់តែច្រើនដល់ប្រជាពលរដ្ឋក្នុងមូលដ្ឋាន និងធ្វើឱ្យបរិស្ថាននៅតាមការដ្ឋានក្នុងឧទ្យានអង្គរកាន់តែប្រសើរឡើង។
ជាមួយគ្នានេះ អាជ្ញាធរជាតិអប្សរា បានកែសម្រួលរោង និងរបងហ៊ុមព័ទ្ធនៅតាមការដ្ឋានជួសជុលនានាក្នុងតំបន់អង្គរ ដោយកាត់បន្ថយការប្រើប្រាស់ប្លាស្ទិកជាតង់ ឬស្បៃមួយជំហានម្តងៗ ដោយប្រើប្រាស់វត្ថុធាតុដើមធម្មជាតិដូចជា ឫស្សីជំនួសវិញ។
ពាក់ព័ន្ធការប្រកាសនេះ ប្រជាពលរដ្ឋអ្នកស្រឡាញ់បរិស្ថាន បានគាំទ្រយ៉ាងខ្លាំងចំពោះការអនុវត្តបែបនេះរបស់អាជ្ញាធរជាតិអប្សរា ហើយពួកគាត់យល់ឃើញថា ការផ្តើមជាគំរូស្អាតចេញពីតំបន់រមណីយដ្ឋានអង្គរ នឹងធ្វើឱ្យកេរ្តិ៍ឈ្មោះប្រាសាទអង្គរវត្តខ្មែរកាន់តែល្បីរន្ទឺឡើង។
គួរជម្រាបថា យុទ្ធនាការកាត់បន្ថយការប្រើប្រាស់ប្លាស្ទិក ដែលដាក់ចេញដោយក្រសួងបរិស្ថានកន្លងទៅ គិតត្រឹមថ្ងៃទី ៨ ខែកុម្ភៈ ឆ្នាំ ២០២៤ បានអនុវត្តក្នុងរាជធានី-ខេត្ត ចំនួន ១៥ រួមមាន ខេត្តកំពង់ស្ពឺ ព្រៃវែង ស្វាយរៀង កំពង់ឆ្នាំង ត្បូងឃ្មុំ កំពង់ចាម ក្រចេះ កំពង់ធំ សៀមរាប ស្ទឹងត្រែង បន្ទាយមានជ័យ បាត់ដំបង មណ្ឌលគិរី រតនគិរី និងខេត្តកែប៕
