លោកស្រី Devyani Khobragade ឯកអគ្គរដ្ឋទូតសាធារណរដ្ឋឥណ្ឌាប្រចាំនៅកម្ពុជា បានបង្ហាញការប្ដេជ្ញាចិត្តក្នុងការពង្រឹងទំនាក់ទំនង និងកិច្ចសហប្រតិបត្តិការអនុវត្តច្បាប់ជាមួយក្រសួងមហាផ្ទៃកម្ពុជា តាមរយៈការបន្តផ្ដល់វគ្គបណ្ដុះបណ្ដាល និងជំនួយសម្ភារផ្សេងៗដល់មន្ត្រីនគរបាលជាតិកម្ពុជា។
ការបង្ហាញជំហររបស់លោកស្រី Devyani Khobragade បានលើកឡើងនៅក្នុងជំនួបពិក្សាការងារជាមួយ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី ៩ ខែកុម្ភៈ ឆ្នាំ ២០២៤ នៅទីស្តីការក្រសួងមហាផ្ទៃ។ នេះបើតាមការផ្សព្វផ្សាយនៅលើទំព័រហ្វេសប៊ុករបស់ក្រសួងមហាផ្ទៃ។
ក្នុងឱកាសនោះ លោក ស សុខា បានសម្ដែងការអបអរសាទរចំពោះកិច្ចសហប្រតិបត្តិការយ៉ាងជិតស្និទ្ធរវាងក្រសួងមហាផ្ទៃ និងរដ្ឋាភិបាលឥណ្ឌា និងថ្លែងអំណរគុណជ្រាលជ្រៅចំពោះភាគីឥណ្ឌា ដែលតែងតែយកចិត្តទុកដាក់ក្នុងកិច្ចសហប្រតិបត្តិការបណ្ដុះបណ្ដាល តាមរយៈការផ្ដល់អាហារូបករណ៍រយៈពេលខ្លី-វែង ទៅសិក្សាជំនាញផ្សេងៗនៅប្រទេសឥណ្ឌាជូនមន្ត្រីនគរបាលកម្ពុជា។
លោកក៏បានស្នើភាគីឥណ្ឌា ពិនិត្យលទ្ធភាពក្នុងការបង្កើតយន្តការទំនាក់ទំនងផ្តល់ព័ត៌មានទៅវិញទៅមកពាក់ព័ន្ធមុខសញ្ញាសង្ស័យ ឬខ្សែរយៈបណ្តាញឱ្យបានទាន់ពេលវេលា និងច្បាស់លាស់ដើម្បីធានាដល់ការចាត់វិធានការបង្ក្រាបមានប្រសិទ្ធភាព និងទាន់ពេលវេលា។
លោករដ្ឋមន្ត្រី ក៏បានជំរុញឱ្យមានការលើកកម្ពស់សមត្ថភាពមន្ត្រីនគរបាលជាតិកម្ពុជា តាមរយៈការផ្តល់អាហារូបករណ៍បញ្ជូនទៅបណ្តុះបណ្តាលលើមុខជំនាញបច្ចេកវិទ្យាទំនើប ដើម្បីឆ្លើយតបទៅនឹងបទល្មើសឆបោកតាមប្រព័ន្ធអនឡាញ។
ជាការឆ្លើយតប លោកស្រី Devyani Khobragade បានថ្លែងកោតសរសើរចំណាត់ការប្រកបដោយប្រសិទ្ធភាពរបស់ក្រសួងមហាផ្ទៃ ក្នុងការបង្ក្រាបបទល្មើសផ្សេងៗ រួមទាំងឧក្រិដ្ឋកម្មឆ្លងដែន សំដៅថែរក្សាសន្តិសុខ សណ្ដាប់ធ្នាប់ ជាពិសេសបង្កើនទំនុកចិត្តដល់អ្នកវិនិយោគទុន និងភ្ញៀវទេសចរមកប្រទេសកម្ពុជា។
បន្ថែមពីនេះលោកស្រីថា ឥណ្ឌា សន្យាបន្តគាំទ្រការបណ្ដុះបណ្ដាលនគរបាលជាតិ និងផ្ដល់ជំនួយសម្ភារបន្ថែមទៀតដល់ក្រសួងមហាផ្ទៃកម្ពុជា។
ជាមួយគ្នានោះ លោកស្រីឯកអគ្គរដ្ឋទូតឥណ្ឌា បានសម្តែងនូវការកោតសរសើរ និងថ្លែងអំណរគុណចំពោះអគ្គស្នងការដ្ឋាននគរបាលជាតិ ដែលបានផ្តល់កិច្ចសហការបានយ៉ាងល្អជាមួយនឹងតំណាងស្ថានទូតឥណ្ឌាប្រចាំព្រះរាជាណាចក្រកម្ពុជា ក្នុងការជួយសង្គ្រោះប្រជាពលរដ្ឋឥណ្ឌា ដែលរងគ្រោះដោយអំពើឆបោកជាច្រើននាក់ក្នុងពេលកន្លងមក។
ជាពិសេសលោកស្រីក៏បានថ្លែងអំណរគុណ ដល់រាជរដ្ឋាភិបាលកម្ពុជា ក្រសួងមហាផ្ទៃ ក៏ដូចជាអគ្គនាយកដ្ឋានចំណុះ ដែលបានជួយសម្រួលដល់ពលរដ្ឋឥណ្ឌាបានធ្វើមាតុភូមិនិវត្តន៍ទៅកាន់ប្រទេសកំណើតវិញដោយគ្មានការផាកពិន័យ ពាក់ព័ន្ធនឹងការស្នាក់នៅលើសទិដ្ឋការ៕
