រូបតំណាងអគារធនាគារឈាមដែលកំពុងដំណើរការសាងសង់នៅខេត្តព្រះវិហារ។ រូបថត រដ្ឋបាលខេត្តព្រះវិហារ
ព្រះវិហារៈ ខេត្តព្រះវិហារ នឹងមានអគារធនាគារឈាមជាលើកដំបូង ដែលមានស្ដង់ដាគំរូដូចអគារមជ្ឈមណ្ឌលជាតិផ្ដល់ឈាម ដើម្បីប្រើប្រាស់សម្រាប់ទុកដាក់ឈាមជួយសង្គ្រោះជីវិតអ្នកជំងឺ និងទទួលឈាមពីអ្នកបរិច្ចាគ ដោយអគារនេះទទួលបានថវិកាឧបត្ថម្ភសាងសង់ដោយអភិបាលខេត្តព្រះវិហារលោក គីម រិទ្ធី។
លោក គួង ឡូ ប្រធានមន្ទីរសុខាភិបាលខេត្តព្រះវិហារ បានប្រាប់ឱ្យដឹងនៅថ្ងៃទី១១ ខែកុម្ភៈថា កន្លងមកកន្លែងស្ដុកទុកឈាម ដែលបានមកពីការបរិច្ចាគរបស់យុវជន ប្រជាពលរដ្ឋនៅក្នុងខេត្ត ត្រូវរៀបចំទុកដាក់នៅក្នុងមន្ទីរពិសោធន៍ ដែលមានភាពចង្អៀតណែន។
ឥឡូវនេះក្រោមការឧបត្ថម្ភថវិកាពីអភិបាលខេត្ត អគារធនាគារឈាមនឹងចាប់ផ្តើមសាងសង់ឡើង ដែលអគារនេះស្ថិតនៅដាច់ដោយឡែកពីមន្ទីរពិសោធន៍ ប៉ុន្តែស្ថិតនៅក្នុងបរិវេណមន្ទីរពេទ្យបង្អែកខេត្ត ១៦មករា ជាមួយគ្នាដដែល ដើម្បីឱ្យប្រជាពលរដ្ឋនៅពេលស្ម័គ្រចិត្តផ្ដល់ឈាម គឺមានកន្លែងងាយស្រួលសម្រាប់រៀបចំទទួលប្រជាពលរដ្ឋស្ម័គ្រចិត្ត។
អគារធនាគារឈាម ដែលកំពុងសាងសង់នេះមានទំហំ ៨ម៉ែត្រ×១៦ម៉ែត្រ ដោយយកគំរូតាមប្លង់អគារមជ្ឈមណ្ឌលជាតិផ្ដល់ឈាម ដែលមានបន្ទប់សម្រាប់ស្ដុកឈាម មានបន្ទប់រង់ចាំសម្រាប់ប្រជាពលរដ្ឋដែលស្ម័គ្រចិត្តផ្ដល់ឈាម ក៏ដូចជាមានកន្លែងសម្រាប់អ្នកស្ម័គ្រចិត្តផ្តល់ឈាមអាចថតរូបជាអនុស្សាវរីយ៍ និងមានកន្លែងសម្រាក ផ្ដល់អាហារសម្រន់ដល់អ្នកបរិច្ចាគឈាមរួចរាល់ហើយផងដែរ។
លោកលោក គួង ឡូ បានថ្លែងបញ្ជាក់ថា៖ «ធនាគារឈាម ឬមជ្ឈមណ្ឌលផ្ដល់ឈាមហ្នឹង គឺជាកន្លែងមួយដែលមានសារៈសំខាន់សម្រាប់ស្ដុកឈាមជួយសង្គ្រោះអាយុជីវិតអ្នកជំងឺដែលត្រូវការឈាមនៅមន្ទីរពេទ្យ ហើយនិងមួយទៀតវាជាកន្លែងសម្រាប់ឱ្យបងប្អូនប្រជាពលរដ្ឋយើងដែលស្ម័គ្រចិត្តផ្ដល់ឈាម ពួកគាត់កាន់តែងាយស្រួលផ្ដល់ឈាមនៅទីនោះបានទៀត»។
លោក គួង ឡូ ក៏បានលើកឡើងដែរថាដោយសារអគារធនាគារឈាមដែលកំពុងសាងសង់នេះ ស្ថិតក្រោមការឧបត្ថម្ភថវិការបស់អភិបាលខេត្ត ដូច្នេះលោកមិនទាន់អាចបញ្ជាក់ពីថវិកាចំនួនប៉ុន្មានដែលត្រូវចំណាយទេ ក៏ប៉ុន្តែគ្រាន់តែដឹងថា អគារធនាគារឈាមដែលកំពុងសាងសង់នេះ តាមការគ្រោងទុក នឹងត្រូវបញ្ចប់ការសាងសង់រួចរាល់នៅដើមខែឧសភា ឆ្នាំ២០២៤។
លោកបានប្រាប់ថា៖ «ដូច្នេះនៅពេលអគារធនាគារឈាមបានសាងសង់ហើយ ឈាមដែលយើងប្រមូលបានពីអ្នកស្ម័គ្រចិត្ត គឺនឹងយកទៅទុកនៅទីនោះ។ អ៊ីចឹង យើងលែងបារម្ភរឿងខ្វះខាតឈាមសម្រាប់ជួយសង្គ្រោះជីវិតពលរដ្ឋយើងទៀតហើយ ដោយសារយើងមានកន្លែងទុកដាក់រក្សាឈាមបានត្រឹមត្រូវ»។
បច្ចុប្បន្ននេះ ខេត្តព្រះវិហារតែងតែចុះប្រមូលឈាមពីយុវជន និងប្រជាពលរដ្ឋស្ម័គ្រចិត្តនៅតាមក្រុង-ស្រុកនីមួយៗនៅទូទាំងខេត្តព្រះវិហារ ខណៈដែលជារៀងរាល់ខែ មន្ទីរពេទ្យបានទទួលឈាមបរិច្ចាគពីយុវជន និងប្រជាពលរដ្ឋនៅតាមក្រុង-ស្រុកនីមួយៗ ក្នុងទំហំប្រមាណ ១០០ប្លោក។ នេះបើតាមលោក គួង ឡូ។
សូមបញ្ជាក់ថា លោក គីម រិទ្ធី អភិបាលខេត្តព្រះវិហារ ជាមួយនិងមន្ត្រីថ្នាក់ក្រោមដែលពាក់ព័ន្ធជាច្រើនរូប បានរៀបចំពិធីបញ្ចុះបឋមសិលាសាងសង់ អគារធនាគារឈាម នៃមន្ទីរពេទ្យបង្អែកខេត្ត ១៦មករា កាលពីថ្ងៃទី៥ ខែកុម្ភៈ ឆ្នាំ២០២៤។
នាយកមជ្ឈមណ្ឌលជាតិផ្តល់ឈាមលោកសុខ ប៉ូបានលើកឡើងកាលពីថ្ងៃទី៣ ខែកុម្ភៈ ក្នុងកម្មវិធីផ្តល់ឈាម ក្រោមប្រធានបទ «ឈាមខ្ញុំជារបស់អ្នក ឈាមអ្នកជារបស់ខ្ញុំ»ថា រៀងរាល់៥នាទីម្តងកម្ពុជាត្រូវការឈាម ១ប្លោក ក្នុងនោះនៅរាជធានីភ្នំពេញមានតម្រូវការឈាមប្រមាណពី៣០០ទៅ៤០០ប្លោក ក្នុង ១ថ្ងៃខណៈតម្រូវការឈាមនេះនៅទូទាំងប្រទេសមានប្រមាណ ១៤ម៉ឺនប្លោកក្នុង ១ឆ្នាំ។
នាឱកាសនោះដែរលោកសុខ ប៉ូបានអំពាវនាវឱ្យមានការចូលរួមបរិច្ចាគឈាមឱ្យបានគ្រប់ៗគ្នាព្រោះការផ្តល់ឈាមមិនមានគ្រោះថ្នាក់ដល់សុខភាពទេតែវាបានផ្តល់អត្ថប្រយោជន៍យ៉ាងច្រើនដល់សុខភាពផ្ទាល់ខ្លួនរបស់អ្នកផ្តល់៕
