លោក កើត រិទ្ធ និងលោក ជា វ៉ាន់ដេត ក្នុងពីធីចុះអនុស្សរណៈថ្ងៃទី១២ កុម្ភៈ ។ រូបថត ក្រសួងប្រៃសណីយ៍
ភ្នំពេញៈ ក្រសួងយុត្តិធម៌ និងក្រសួងប្រៃសណីយ៍ និងទូរគមនាគមន៍បានចុះអនុស្សរណៈយោគយល់គ្នា(MoU) ដើម្បីសហការជំរុញដំណើរការដ្ឋបាលឌីជីថលក្នុងក្រសួងយុត្តិធម៌ តួយ៉ាងការប្រើថ្នាលផ្ទៀងផ្ទាត់ឯកសារ verify.gov.kh ការរៀបចំហេដ្ឋារចនាសម្ព័ន្ធ និងតភ្ជាប់អ៊ីនធឺណិត។
ក្នុងនោះក៏មានការរៀបចំវគ្គបណ្តុះបណ្តាលជំនាញឌីជីថលដល់មន្ត្រីក្រសួងយុត្តិធម៌ដែលជាការបោះជំហានក្នុងការធ្វើទំនើបកម្មវិស័យយុត្តិធម៌ដោយប្រើប្រាស់បច្ចេកវិទ្យា និងដើម្បីបង្កើនប្រសិទ្ធភាពការងារក្រសួងយុត្តិធម៌ផងដែរ។
ការចុះ MoU រវាងក្រសួងទាំង២នេះ ធ្វើឡើងក្រោមអធិបតីភាព លោកឧបនាយករដ្ឋមន្ត្រី កើត
រិទ្ធ រដ្ឋមន្ត្រីក្រសួងយុត្តិធម៌ និងលោកជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នៅថ្ងៃទី១២ ខែកុម្ភៈ ឆ្នាំ២០២៤។នេះបើតាមសេចក្តីប្រកាសព័ត៌មានរួមរបស់ក្រសួងទាំង២។
ក្នុងឱកាសនោះ លោកកើត រិទ្ធ បានកោតសរសើរដល់គណៈកម្មាធិការរដ្ឋាភិបាលឌីជីថលនិងក្រសួងប្រៃសណីយ៍ ដែលបានខិតខំប្រឹងប្រែងសម្រេចសមិទ្ធផលនានាជាអាទិភាពជាច្រើនក្នុងវិស័យឌីជីថល ជាពិសេសការបង្កើតថ្នាលនិងសេវារដ្ឋាភិបាលឌីជីថលថ្មីៗសម្រាប់បម្រើសេចក្តីត្រូវការក្នុងវិស័យសេវាសាធារណៈដែលស្របតាមយុទ្ធសាស្ត្របញ្ចកោណដំណាក់កាលទី១ របស់រដ្ឋាភិបាលអាណត្តិថ្មីនេះ។
លោកបានបញ្ជាក់ថា៖ «ការចុះអនុស្សរណៈយោគយល់នាថ្ងៃនេះ ជាការបោះជំហានថ្មីមួយបន្ថែមទៀតក្នុងកិច្ចខិតខំប្រឹងប្រែងក្នុងការធ្វើទំនើបកម្មវិស័យយុត្តិធម៌ដោយប្រើប្រាស់បច្ចេកវិទ្យា សំដៅម្យ៉ាងដើម្បីលើកកម្ពស់គុណភាព និងប្រសិទ្ធភាពការងារក្នុងវិស័យយុត្តិធម៌ ក៏ដូចជាលើកកម្ពស់ប្រសិទ្ធភាពនៃការគ្រប់គ្រងទិន្នន័យ និងអភិវឌ្ឍខ្លួនឱ្យទាន់ដំណើរវិវត្តន៍នៃសម័យបច្ចេកវិទ្យាក្នុងសង្គមសម័យទំនើប»។
ទន្ទឹមគ្នានេះ លោកជា វ៉ាន់ដេត ក៏បានលើកឡើងដែរថា ការចុះនេះនឹងជំរុញល្បឿននៃការធ្វើបរិវត្តកម្មឌីជីថលក្នុងវិស័យយុត្តិធម៌ បង្កើនជំនឿទុកចិត្តនិងបង្កើនភាពងាយស្រួលដល់ពលដ្ឋ ដែលត្រូវទទួលសេវាសាធារណៈក្រោមសមត្ថកិច្ចក្រសួងយុត្តិធម៌ ជួយពង្រឹងសមត្ថភាពមន្ត្រីក្រសួងយុត្តិធម៌លើជំនាញឌីជីថល ស្របតាមគោលនយោបាយ និងយុទ្ធសាស្ត្ររាជរដ្ឋាភិបាល។
លោកជិន ម៉ាលីន អ្នកនាំពាក្យក្រសួងយុត្តិធម៌លើកឡើងថា កិច្ចសហការរវាងក្រសួងទាំង២ នឹងចូលរួមចំណែកធ្វើទំនើបកម្មរដ្ឋបាលក្រសួងយុត្តិធម៌ និងលើកកម្ពស់សេវាយុត្តិធម៌ តាមរយៈប្រព័ន្ធឌីជីថល តួយ៉ាងការសម្រួលការធ្វើចរាចរណ៍ឯកសារផ្ទៃក្នុង ដោយកាត់បន្ថយការប្រើក្រដាសស្នាម ធ្វើទំនើបកម្មលើការធ្វើលិខិតថ្កោលទោស និងការគ្រប់គ្រងសំណុំរឿងតាមប្រព័ន្ធឌីជីថល។
លោកសង្កត់ធ្ងន់ថា៖ «ការចុះ MOU នេះនឹងជំរុញការធ្វើទំនើបកម្មរដ្ឋបាលរបស់ក្រសួងនិងសេវាយុត្តិធម៌តាមប្រព័ន្ធឌីជីថល ដើម្បីឆ្លើយតបនឹងសេចក្តីត្រូវការជាក់ស្តែងរបស់ប្រជាពលរដ្ឋ»។
ជុំវិញរឿងនេះដែរ លោកយង់ ពៅ អគ្គលេខាធិការនៃរាជបណ្ឌិត្យសភាកមម្ពុជា បានប្រាប់ថា ការចុះ MoU នេះជាការពង្រឹងសមត្ថភាពឌីជីថលរបស់រាជរដ្ឋាភិបាលកម្ពុជាដែលបានដាក់ជាអាទិភាពក្នុងយុទ្ធសាស្ត្រនយោបាយ និងជាដំណើរវិវត្ដន៍សំខាន់ក្នុងទំនោរសកលដែលកំពុងបោះពួយលើផ្នែកបច្ចេកវិទ្យាទំនើប ខណៈក្រសួងប្រៃសណីយ៍ជាសេនាធិការរបស់រាជរដ្ឋាភិបាលក្នុងការជំរុញឌីជីថលសម្រាប់គ្រប់ក្រសួងរួមទាំងក្រសួងយុត្តិធម៌ផង។
លោកបានថ្លែងថា៖ «សមត្ថភាពឌីជីថលសម្រាប់មន្ត្រីរដ្ឋាភិបាល ក៏ដូចជាមន្ត្រីក្រសួងយុត្តិធម៌មានសារៈសំខាន់ណាស់ដើម្បីជំរុញការផលិតនិងបញ្ជូនឯកសាររបស់រដ្ឋាភិបាល ផ្តល់សេវាជូនពលរដ្ឋទាន់ពេលវេលា ផ្សព្វផ្សាយច្បាប់ទាន់ពេលវេលា ដែលឌីជីថលប្រៀបដូចជាអាហារប្រចាំថ្ងៃ ខណៈប្រព័ន្ធព័ត៌មានវិទ្យានៅតែជាមួយមនុស្សជាប្រចាំថ្ងៃទៅហើយ»។
លោកក៏បានផ្តល់ជាអនុសាសន៍ឱ្យរាជរដ្ឋាភិបាលពង្រឹងសុវត្ថិភាពឌីជីថលនៅចំពោះមុខការអភិវឌ្ឍរដ្ឋបាលឌីជីថល ក៏ដូចជាគិតគូរអភិក្រម យន្តការច្បាស់លាស់ក្នុងការគ្រប់គ្រងប្រព័ន្ធឌីជីថល ចៀសវាងកើតមានបញ្ហាប្រឈមនានា តួយ៉ាងការវាយប្រហារព័ត៌មានវិទ្យាឬហេក(hack)យកព័ត៌មាននានា ក៏ដូចជាការប្រើប្រាស់ខុសគោលការណ៍ជាដើម។
សូមបញ្ជាក់ថា ក្រសួងទាំង២ បានចុះMoU ក្នុងគោលដៅ៤ សំខាន់ៗ រួមមាន ទី១-ការដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ verify.gov.kh សម្រាប់ផ្ទៀងផ្ទាត់ឯកសារនានាក្នុងវិស័យយុត្តិធម៌។ទី២-ការដាក់ឱ្យប្រើប្រាស់ថ្នាលឬសេវារដ្ឋាភិបាលឌីជីថល(Digital Government Products/DGPs)ក្នុងក្រសួងយុត្តិធម៌។ ទី៣-រៀបចំហេដ្ឋារចនាសម្ព័ន្ធ និងតភ្ជាប់អ៊ីនធឺណិតសម្រាប់ការប្រើប្រាស់ក្នុងក្រសួងយុត្តិធម៌ និងទី៤-រៀបចំវគ្គបណ្តុះបណ្តាលជំនាញឌីជីថលជូនដល់មន្ត្រីរាជការក្រសួងយុត្តិធម៌៕
