លោកស្រី សឿង រដ្ឋចាវី ក្នុងជំនួបជាមួយលោកសាយ ឈុំ កាលពីថ្ងៃទី១២ខែកុម្ភៈ។ រូបថត ព្រឹទ្ធសភា
ភ្នំពេញៈ ប្រធានព្រឹទ្ធសភាលោក សាយ ឈុំ បានណែនាំដល់ឯកអគ្គរាជទូតកម្ពុជាប្រចាំប្រទេសចិន ដែលទើបតែងតាំងថ្មីឱ្យខិតខំផ្សព្វផ្សាយ និងបកស្រាយសភាពការណ៍ពិតរបស់កម្ពុជា ទៅកាន់មតិអន្តរជាតិ និងនៅប្រទេសចិនផ្ទាល់ ជាពិសេសខិតខំទាក់ទាញវិនិយោគិន និងអ្នកទេសចរចិនមកកាន់កម្ពុជាឱ្យបានកាន់តែច្រើនបន្ថែមទៀត។
ការណែនាំរបស់ប្រធានព្រឹទ្ធសភាបែបនេះ ធ្វើឡើងនាជំនួបសម្តែងការគួរសម រវាងលោកនិងលោកស្រី សឿង រដ្ឋចាវី ឯកអគ្គរាជទូតកម្ពុជា ប្រចាំសាធារណរដ្ឋប្រជាមានិតចិន នាវិមានព្រឹទ្ធសភា កាលពីថ្ងៃទី១២ ខែកុម្ភៈ មុនពេលលោកស្រីចេញដំណើរទៅបំពេញបេសកកម្មថ្មីនេះ។ នេះបើយោងតាមប្រភពពីនាយកដ្ឋានព័ត៌មានព្រឹទ្ធសភា។
លោកសាយ ឈុំ បានណែនាំដល់លោកស្រី សឿង រដ្ឋចាវី ថា ត្រូវព្យាយាមផ្សព្វផ្សយ និងបកស្រាយសភាពការណ៍ពិត និងការអនុវត្តលទ្ធិប្រជាធិបតេយ្យនៅកម្ពុជា ដល់សាធារណៈមតិជាតិ និងអន្តរជាតិ ក៏ដូចជានៅប្រទេសកំពុងបំពេញភារកិច្ចពោលគឺប្រទេសចិនផ្ទាល់។
លោក សាយ ឈុំ មានប្រសាសន៍ថា៖ «ត្រូវផ្តល់ព័ត៌មានឱ្យបានរហ័សចំពោះសភាពការណ៍ជាក់ស្តែងរបស់កម្ពុជា និងត្រូវយកចិត្តទុកដាក់ផ្សព្វផ្សាយក្នុងការទាក់ទាញវិនិយោគិន និងភ្ញៀវទេសចរចិនមកទស្សនាកម្ពុជាឱ្យបានកាន់តែច្រើន ព្រមទាំងសកម្មភាពផ្សព្វផ្សាយពីវប្បធម៌ ប្រពៃណី និងទំនៀមទម្លាប់ដ៏ល្អរបស់កម្ពុជាយើង»។
ជាការឆ្លើយតប លោកស្រី សឿង រដ្ឋចាវី ប្តេជ្ញាចិត្តខិតខំបំពេញភារកិច្ចការទូតដោយទំនួលខុសត្រូវ ស័ក្តិសមជាតំណាងកម្ពុជាលើឆាកអន្តរជាតិ ហើយខិតខំអនុវត្តតាមអនុសាសន៍របស់លោក សាយ ឈុំ ក្នុងការផ្សព្វផ្សាយពីវឌ្ឍនភាព ការរីកចម្រើនរបស់ជាតិ និងពង្រឹងទំនាក់ទំនងនិងកិច្ចសហប្រតិបត្តិការជាមួយប្រទេសចិន ឯកអគ្គរាជទូត និងឯកអគ្គរដ្ឋទូតនៃបណ្តាប្រទេសផ្សេងៗទៀត។
លោកស្រីថា នឹងខិតខំទាក់ទាញវិនិយោគិន និងអ្នកទេសចរឱ្យមកកម្ពុជាបានកាន់តែច្រើន ដើម្បីរួមចំណែកអភិវឌ្ឍប្រទេសជាតិ និងលើកកម្ពស់កិត្យានុភាពជាតិនៅក្នុងក្របខ័ណ្ឌតំបន់ និងលើពិភពលោក។
លោកស៊ឺន សម អ្នកជំនាញផ្នែកទំនាក់ទំនងអន្តរជាតិនៃរាជបណ្ឌិត្យសភាកម្ពុជា លើកឡើងដោយសុទិដ្ឋិនិយមចំពោះសមាសភាពឯកអគ្គរាជទូតកម្ពុជាប្រចាំប្រទេសចិនថ្មីនេះថា កម្ពុជានិងចិនត្រូវតែបន្តថែរក្សានិងជំរុញទំនាក់ទំនងល្អក្នុងក្របខ័ណ្ឌត្បូងពេជ្រនេះជាបន្តទៀត ដើម្បីផលប្រយោជន៍ប្រទេសទាំងសងខាង។
លោកបន្តថា៖ «ការតែងតាំងលោកស្រីសឿង រដ្ឋចាវី ដែលជាអតីតរដ្ឋលេខាធិការក្រសួងការបរទេសកម្ពុជាជាឯកអគ្គរាជទូតថ្មីនេះជារឿងល្អដើម្បីបង្ហាញពីការប្តេជ្ញាចិត្តបន្តទំនាក់ទំនងល្អជាមួយភាគីចិន ហើយនឹងអាចជំរុញដល់កិច្ចសហប្រតិបត្តិការផ្សេងទៀតដែលនឹងអាស្រ័យការវិវឌ្ឍ និងអាស្រ័យលើកាលៈទេសៈជាក់ស្តែង ខណៈទំនាក់ទំនងប្រទេសទាំង២ ល្អូកល្អឺននឹងគ្នាស្រាប់ទៅហើយ»។
លោក ស៊ឺន សម មានសុទិដ្ឋិនិយមជាខ្លាំងចំពោះការបន្តពង្រឹងទំនាក់ទំនងរវាងកម្ពុជានិងចិន ដោយឯកអគ្គរាជទូតថ្មីជាអ្នកការទូត១រូបដែលយល់ច្បាស់ ដែលលោកយល់ថា លោកស្រីសឿង រដ្ឋចាវី នឹងខិតខំបំពេញការប្តេជ្ញាចិត្ត ក៏ដូចជាអនុវត្តកិច្ចព្រមព្រៀង ការឯកភាពគ្នា រវាងកម្ពុជានិងចិនកន្លងមក ឱ្យចេញជាសកម្មភាពជាក់ស្តែង ជាពិសេសការពង្រឹងការផ្លាស់ប្តូររវាងប្រជាជននិងប្រជាជន។
សូមជម្រាបថា លោកស្រីសឿង រដ្ឋចាវី ក្នុងវ័យ៦៥ឆ្នាំ ធ្លាប់បម្រើការជារដ្ឋលេខាធិការក្រសួងការបរទេសទទួលបន្ទុកកិច្ចការអាស៊ីប៉ាស៊ីហ្វិក ត្រូវបានតែងតាំងជាឯកអគ្គរាជទូតកម្ពុជាប្រចាំប្រទេសចិន និងម៉ុងហ្គោលលីថ្មី តាមរយៈព្រះរាជក្រឹត្យរបស់ព្រះមហាក្សត្រ ចុះថ្ងៃទី២៩ ខែធ្នូ ឆ្នាំ២០២៣ ជំនួសលោកស្រីខែក កៃមាលី ស៊ីសូដា ដែលបានកាន់តួនាទីជាឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជា ប្រចាំប្រទេសចិន អស់រយៈពេលជាង ១៧ឆ្នាំមកហើយ ចាប់តាំងពីឆ្នាំ២០០៧ មក៕
