កូនឈើ ត្រៀមចែកពលរដ្ឋដាំស្តារព្រៃឈើឡើងវិញ។ ក្រសួងបរិស្ថាន
ភ្នំពេញៈ លោក ខ្វៃ អាទិត្យា អ្នកនាំពាក្យក្រសួងបរិស្ថានបានឱ្យដឹងថា គិតត្រឹមថ្ងៃទី ១០ ខែកុម្ភៈ ឆ្នាំ ២០២៤ ក្រសួងបរិស្ថាន តាមរយៈមន្ត្រីឧទ្យានុរក្សនៃមន្ទីរបរិស្ថានរាជធានី-ខេត្តនានា បានបណ្តុះកូនឈើបានចំនួន ៤១៦-១៦៣ ដើម សម្រាប់យុទ្ធនាការ ១០ តុលា របស់ក្រសួងស្តីពីការចែកជូនកូនឈើជាង ១ លានដើមជារៀងរាល់ឆ្នាំ ជូនប្រជាពលរដ្ឋដាំដើម្បីស្តារព្រៃឈើឡើងវិញឱ្យបានជាង ៦០% នៅឆ្នាំ ២០៥០។
លោក ខ្វៃ អាទិត្យា បានថ្លែងនៅថ្ងៃទី ១២ ខែកុម្ភៈថា រហូតមកទល់ពេលនេះ ក្រសួងមានកូនឈើជាង ៧០ ម៉ឺនដើមក្នុងដៃ ដែលក្នុងនោះកូនឈើពីមន្ទីរបរិស្ថាននានាជាង ៤០ ម៉ឺនដើម និងកូនដើមត្នោតដែលផ្តល់ដោយរដ្ឋមន្ត្រីក្រសួងបរិស្ថាន លោក អ៊ាង សុផល្លែត ចំនួនជាង ៣០ ម៉ឺនដើម។
លោកថ្លែងថា៖ «យុទ្ធនាការ ១០ តុលាក្នុងការចែកជូនកូនឈើជាង ១ លានដើមជារៀងរាល់ឆ្នាំជូនប្រជាពលរដ្ឋដាំរបស់រដ្ឋមន្ត្រីក្រសួងបរិស្ថាននឹងទទួលបានជោគជ័យ ដោយមន្ត្រីបរិស្ថាននៅតាមមន្ទីរទូទាំងរាជធានីខេត្ត បន្តបណ្តុះកូនឈើគ្រប់ប្រភេទ ដើម្បីចែកជូនដល់ប្រជាពលរដ្ឋជាបន្តបន្ទាប់ចាប់ពីខែកក្កដាខាងមុខ»។
លោកលើកឡើងថា៖ «គិតចាប់ពីថ្ងៃបើកយុទ្ធនាការថ្ងៃទី ១០ ខែតុលា ឆ្នាំ ២០២៣ មកទល់ថ្ងៃទី ១០ ខែកុម្ភៈឆ្នាំ ២០២៤ មន្ត្រីក្រសួងបរិស្ថានបានចែកកូនឈើគ្រប់ប្រភេទ (កូនឈើប្រណីត និងឈើហូបផ្លែ) ចំនួន ២០០ ៥៦២ ដើមរួចជាស្រេចទៅដល់ប្រជាពលរដ្ឋដើម្បីដាំស្តារព្រៃរេចរឹល ដាំនៅតាមមូលដ្ឋាន តាមសហគមន៍ ដាំនៅតាមសាលារៀន វត្តអារាម»។
កូនឈើ ត្រៀមចែកពលរដ្ឋដាំស្តារព្រៃឈើឡើងវិញ។ ក្រសួងបរិស្ថាន
ជុំវិញបញ្ហានេះលោក ជុំ ហួត ប្រធានសមាគមអ្នកស្រឡាញ់បរិស្ថាន និងសង្គម បានគាំទ្រចំពោះយុទ្ធនាការចែកកូនឈើជូនពលរដ្ឋដាំដោយឥតគិតថ្លៃនេះ ដែលជាការជំរុញឱ្យប្រជាពលរដ្ឋចូលរួមដាំដើមឈើ និងស្តារព្រៃឈើ ព្រមទាំងចូលរួមចំណែកអភិរក្សព្រៃឈើរបស់កម្ពុជាឱ្យ មានស្ថិរភាពឡើងវិញ ជាពិសេសបង្កើនប្រាក់ចំណូលទៅដល់សហគមន៍នៅក្នុងមូលដ្ឋាន។
លោកថា៖ «ការដាំដើមឈើ អាចបង្កើតដើមឈើហូបផ្លែនៅតាមសហគមន៍ និងបង្ហាញភាពទាក់ទាញដល់ភ្ញៀវទេសចរ មកទស្សនាដល់សហគមន៍របស់ពួកគាត់ ដែលមានភាពបៃតង ដែលវាអាចបង្កើនចំណូលទៅដល់សហគមន៍ផងដែរ»។
លោក ជុំ ហួត បញ្ជាក់ទៀតថា សមាគមរបស់លោកក៏នឹងចូលរួមគាំទ្រ និងសហការជាមួយក្រសួងបរិស្ថានដែរដើម្បីដាំកូនឈើនៅតាមសហគមន៍ សាលារៀន វត្តអារាម និងនៅតាមទីសាធារណៈផ្សេងៗទៀត ព្រោះយុទ្ធនាការនេះ គឺល្អ និងផ្តល់ផលប្រយោជន៍ដល់បរិស្ថាន និងសង្គមជាតិ។សូមរំឭកដែរថា ក្រសួងបរិស្ថានបានដាក់ចេញយុទ្ធសាស្ត្រចក្រាវិស័យបរិស្ថាន ២០២៣-២០២៨ ដែលបានដាក់ចេញការងារអាទិភាពចំនួន ៣ រួមមាន៖ ភាពស្អាត ភាពបៃតង និងចីរភាព។
ក្នុងមុមផែនការអាទិភាពទី២ ភាពបៃតង ក្រសួងបរិស្ថាននឹងអនុវត្តដោយពង្រីកចលនាដាំដើមឈើ ជំរុញការគ្រប់គ្រងតំបន់ការពារធម្មជាតិ និងលើកកម្ពស់ជីវភាពសហគមន៍មូលដ្ឋាន។ ផែនការយុទ្ធសាស្ត្រទី២ នេះ បានរៀបចំឡើងលើការប្រយុទ្ធប្រឆាំងនឹងការប្រែប្រួលអាកាសធាតុដែលយកចិត្តទុកដាក់ជាសំខាន់ គឺជំរុញការបណ្តុះ និងដាំកូនឈើ សំដៅបង្កើនគម្របព្រៃឱ្យដល់ ៦០% នៅឆ្នាំ ២០៥០។
លោក អ៊ាង សុផល្លែត ធ្លាប់បានលើកឡើងថា សម្រាប់ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍប្រកបដោយចីរភាព ឱ្យមានប្រសិទ្ធភាព រួមមានការអនុវត្តច្បាប់ ១០០% ដោយមិនអត់ឱនចំពោះឧក្រិដ្ឋកម្មធនធានធម្មជាតិ និងពង្រឹងការសហការឱ្យកាន់តែស្អិតល្មួត ជាមួយអាជ្ញាធរមូលដ្ឋានគ្រប់ថ្នាក់ ដើម្បីទប់ស្កាត់បទល្មើសធនធានធម្មជាតិ៕
