លោក ហួត ហាក់ រដ្ឋមន្ត្រីអធិការកិច្ច។ រូបថត ក្រសួងអធិការកិច្ច
ភ្នំពេញៈ លោក ហួត ហាក់ រដ្ឋមន្ត្រីអធិការកិច្ចបានថ្លែងថានៅក្នុងលទ្ធផលការងារចុះអធិការកិច្ចនាពេលកន្លងទៅ បានរួមចំណែកក្នុងការផ្លាស់ប្តូរឥរិយាបថរបស់មន្ត្រីរាជការសាធារណៈមួយចំនួន ដែលអនុវត្តការងារពុំទាន់បានល្អនៅឡើយ ខណៈដែលក្រសួងនឹងបន្តធ្វើអធិការកិច្ចតាមដានជាប់ជាប្រចាំ ក្នុងការអង្កេតស្រាវជ្រាវក្នុងករណីមានភាពមិនប្រក្រតី នៃការបំពេញកាតព្វកិច្ចរបស់មន្ត្រីរាជការ។លោករដ្ឋមន្ត្រី បានថ្លែងបែបនេះ នាពិធីបើកសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ កាលពីថ្ងៃទី ១២ ខែកុម្ភៈ ឆ្នាំ ២០២៤ នៅសណ្ឋាគារសុខាភ្នំពេញ។
លោក ហួត ហាក់ ថ្លែងថា លទ្ធផលអធិការកិច្ចមិនអាចវាស់វែងបានទាំងអស់នោះទេ ប៉ុន្តែយ៉ាងហោចណាស់ក៏លទ្ធផលការងារអធិការកិច្ចបានចូលរួមចំណែកយ៉ាងសំខាន់ ក្នុងការផ្លាស់ប្តូរឥរិយាបថមិនល្អ របស់មន្ត្រីសាធារណៈមួយចំនួនផងដែរ។
លោកថ្លែងថា៖«លទ្ធផលការងារអធិការកិច្ច នាពេលកន្លងទៅ ពិតជាបានចូលរួមចំណែកយ៉ាងសំខាន់ ក្នុងការផ្លាស់ប្តូរឥរិយាបថមិនល្អ របស់មន្ត្រីសាធារណៈមួយចំនួន ដែលបានអនុវត្តតួនាទី និងភារកិច្ចការងារពុំទាន់បានល្អ និងដាស់តឿនឱ្យមានការប្រុងប្រយ័ត្នខ្ពស់ មានការទទួលខុសត្រូវប្រកបដោយមនសិការវិជ្ជាជីវៈ ដែលជាភារកិច្ចមួយដ៏មានសារៈសំខាន់និងមិនអាចកាត់ថ្លៃបានរបស់ក្រសួងអធិការកិច្ច»។
លោកថ្លែងថា ទន្ទឹមនឹងនោះ ក៏ត្រូវមានការត្រួតពិនិត្យ ឬធ្វើអធិការកិច្ចជាប់ជាប្រចាំ ដោយត្រូវតាមដាន ត្រួតពិនិត្យ អង្កេតស្រាវជ្រាវក្នុងករណីមានភាពមិនប្រក្រតី លើសកម្មភាព និងដំណើរការនៃការអនុវត្តការងារ ដើម្បីសន្និដ្ឋាន វាយតម្លៃ ស្វែងរកចំណុចខ្លាំង និងចំណុចខ្វះខាត បញ្ហាប្រឈម និងដំណោះស្រាយ។
លោកថា៖«ការងារអធិការមិនសំដៅតែលើការស្វែងរកកំហុស និងដាក់វិន័យ តែប៉ុណ្ណោះទេ ប៉ុន្តែក៏បានកត់សម្គាល់នូវគុណសម្បត្តិ ដើម្បីលើកសរសើរ ព្រមទាំងក្តាប់ឱ្យបាននូវការងារលំបាក និងសំណូមពររបស់ប្រតិបត្តិករដើម្បីរួមគ្នារកដំណោះស្រាយផងដែរ»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ថ្លែងថា ការចុះអធិការកិច្ចពិតជាមានសារៈសំខាន់ខ្លាំង សម្រាប់ស្ថាប័នរដ្ឋ ខណៈដែលមន្ត្រីអធិការកិច្ចត្រូវតែប្រកាន់គោលជំហរ និងបែបបទឱ្យបានច្បាស់លាស់ ក្នុងការស្វែងរកបញ្ហាឆ្គាំឆ្គងទាំងឡាយរបស់មន្ត្រីសាធារណៈ ដើម្បីឱ្យកែប្រែ៕
