លោក ហេង សួរ ក្នុងសន្និបាតក្រសួងការងារកាលពីថ្ងៃទី ៨ កុម្ភៈ។ រូប STPM
ភ្នំពេញៈ យោងតាមរបាយការណ៍ស្តីពីការបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់់ក្រសួងកាងារ និងបណ្តុះបណ្តាលវិជ្ជាជីវៈឱ្យដឹងថា ការដោះស្រាយវិវាទការងារនៅឆ្នាំ ២០២៣ មានភាពល្អប្រសើរ ដោយក្រសួងបានដោះស្រាយវិវាទសរុបចំនួន ១ ០០៥ ករណី។
របាយការណ៍ដែលបានចេញផ្សាយកាលពីសប្តាហ៍មុន បានឱ្យដឹងថា ដើម្បីពង្រឹងប្រសិទ្ធភាពនៃការដោះស្រាយវិវាទការងារ ក្រសួងការងារបានធ្វើឡើងតាមរយៈយន្តការនៃការដោះស្រាយវិវាទការងារ និងការពង្រឹងសមត្ថភាពមន្ត្រីផ្សះផ្សា ភាពជាដៃគូនៃកិច្ចសន្ទនាសង្គម យន្តការត្រីភាគី និងគាំទ្រនិរន្តរភាពនៃក្រុមប្រឹក្សាអាជ្ញាកណ្តាល ការដោះស្រាយវិវាទការងារក្រៅប្រព័ន្ធតុលាការ ព្រមទាំងការកែលម្អនីតិវិធីនៃការដោះស្រាយ វិវាទការងារជាប្រចាំ។
ជាក់ស្តែងតាមរយៈការពង្រឹងប្រសិទ្ធភាពនៃការដោះស្រាយវិវាទការងារនេះឃើញថា៖«នៅក្នុងឆ្នាំ ២០២៣ ក្រសួងបានដោះស្រាយ វិវាទសរុបចំនួន ១ ០០៥ ករណី ក្នុងនោះ សះជាចំនួន ៨២៩ ករណី (ស្មើនឹង ៨២,៤៩%) មិនសះជា ចំនួន ១៤៨ ករណី (ស្មើនឹង ១៤,៧៣%) មោឃៈ ចំនួន ២៨ ករណី (ស្មើនឹង ២,៧៩%)»។ ក្នុងករណីវិវាទទាំងអស់នេះ វិវាទបុគ្គលមានចំនួន ៨១៨ ករណី (ស្មើនឹង ៨១,៣៩%) និងវិវាទការងាររួមមានចំនួន ១៨៧ ករណី (ស្មើនឹង ១៨,៦១%)។
ទន្ទឹមគ្នានេះ ក្រសួងក៏បានបញ្ជូនសំណុំរឿងទៅដោះស្រាយបន្តនៅក្រុមប្រឹក្សាអាជ្ញាកណ្ដាល ចំនួន ២២ ករណី ដោយក្នុងនោះសំណុំរឿងចេញសេចក្តីបង្គាប់ ចំនួន ១៦ ករណី និងសំណុំរឿងមិនចេញសេចក្តីបង្គាប់ (កិច្ចព្រមព្រៀង) សះជាដោយក្រុមប្រឹក្សាអាជ្ញាកណ្ដាល ចំនួន ៦ ករណី។
ក្រសួងការងារ អះអាងទៀតថា៖ «តាមរយៈការពង្រឹងយន្តការដោះស្រាយវិវាទខាងលើនេះឃើញថា អត្រាសះជានៃការដោះស្រាយវិវាទការងាររួមទាំងនៅកម្រិតមន្ត្រីផ្សះផ្សា និងក្រុមប្រឹក្សាអាជ្ញាកណ្តាលបានកើនឡើងពី ៧៣,៣៣% ដល់ ៩០,៣៧% ពីចន្លោះឆ្នាំ ២០២២ ដល់ឆ្នាំ ២០២៣»។
ក្រសួងបញ្ជាក់ថា៖ «នេះបង្ហាញថា យន្តការដោះស្រាយវិវាទការងាររបស់ក្រសួងមានភាពល្អប្រសើរព្រមទាំងការយល់ដឹងរបស់អ្នកពាក់ព័ន្ធក្នុងការដោះស្រាយវិវាទធ្វើឱ្យអត្រាសះជាមានកម្រិតខ្ពស់»។
លោក ហ្វា សាលី ប្រធានសម្ព័ន្ធសហជីពជាតិ បានថ្លែងនៅថ្ងៃទី ១២ ខែកុម្ភៈថា ទាក់ទងនឹងការដោះស្រាយវិវាទការងារ និងការដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា មានលក្ខណៈល្អប្រសើរគួរឱ្យកត់សម្គាល់ ព្រោះថា នាយកដ្ឋានដោះស្រាយវិវាទការងារ បានយកចិត្តទុកដាក់ និងខិតខំដោះស្រាយ ក៏ដូចជាសម្របសម្រួលបានល្អ។
ទន្ទឹមគ្នានេះលោក ហ្វាសាលីក៏បានស្នើដែរថា៖ «សូមឱ្យរដ្ឋមន្ត្រីក្រសួងការងារ ធ្វើការពិនិត្យមើល ឬដោះដូរតួនាទីមន្ត្រីទីប្រឹក្សាមួយចំនួនឡើងវិញ ព្រោះកន្លងមកមានមន្ត្រីខ្លះតែងតែធ្វើទុក្ខបុកម្នេញដល់សហជីព ដែលធ្វើឱ្យប៉ះពាល់ដល់សកម្មភាពការងារ។ អ៊ីចឹងសង្ឃឹមថា ក្រសួងនឹងពិនិត្យឡើងវិញ ដើម្បីធានាដល់សុខដុមរម្មនីយកម្មរបស់សហជីពក្នុងវិស័យការងារ»។
យោងតាមរបាយការណ៍របស់ក្រសួងការងារបានលើកឡើងដែរថា ក្រៅពីការដោះស្រាយវិវាទការងារនៅឆ្នាំ ២០២៣ មានស្ថានភាពល្អប្រសើរហើយនោះ ការដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញាក៏មានការថយចុះជាបន្តបន្ទាប់ផងដែរ។
តាមរយៈការពង្រឹងគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា (គ.ក.ប.) បានអន្តរាគមន៍ដោះស្រាយកូដកម្មសរុប ចំនួន ១០១ រោងចក្រសហគ្រាស ស្មើនឹង ១១៩ ករណី ក្នុងនោះ ៩៤,៩៦% ត្រូវបានដោះស្រាយសះជា និងបានធ្វើអន្តរាគមន៍ដោះស្រាយបាតុកម្ម ចំនួន ៨ រោងចក្រសហគ្រាស ស្មើនឹង ១២ ករណី ក្នុងនោះ ៩១,៦៧% ត្រូវបានដោះស្រាយសះជា។
តាមរយៈនេះ ក្រសួងឃើញថា អត្រារោងចក្រ សហគ្រាសដែលកើតមានកូដកម្មមានការថយចុះជាបន្តបន្ទាប់ និងស្ថិតក្នុងអត្រាក្រោម ១% នៃរោងចក្រ សហគ្រាសដែលបានចុះបញ្ជីសរុបនៅក្រសួងការងារ, ការធ្វើអន្តរាគមន៍បានគ្រប់ករណី និងទាន់ពេលវេលា និងការដោះស្រាយកូដកម្ម បាតុកម្មសះជាទទួលបានប្រសិទ្ធភាពខ្ពស់៕
