ក្រុមគ្រូពេទ្យ និងដៃគូពេលចុះពន្យល់ពលរដ្ឋពីការឆ្លងជំងឺរបេងនៅខេត្ដព្រៃវែងកាលពីឆ្នាំមុន។ រូបថត ហ្វេសប៊ុក
ភ្នំពេញៈ ប្រធានមជ្ឈមណ្ឌលជាតិកម្ចាត់រោគរបេង និងហង់សិនបានឱ្យដឹងថា នៅក្នុងឆ្នាំ ២០២៣ កន្លងទៅ កម្ពុជារកឃើញមានករណីជំងឺរបេងជាង ៣០ ០០០ ករណី បើធៀបនឹងឆ្នាំ ២០២២ ចំនួនអ្នកកើតជំងឺរបេងមានការថយចុះក្នុងចំនួនតិចតួចនៅឡើយ។
លោក ហួត ចាន់យុដា ប្រធានមជ្ឈមណ្ឌលជាតិកម្ចាត់រោគរបេង និងហង់សិនបានឱ្យដឹងនៅថ្ងៃទី ១២ ខែកុម្ភៈថា នៅឆ្នាំ ២០២៣ កន្លងមក កម្ពុជាបានរកឃើញករណីជំងឺរបេងបានចំនួនជាង ៣០ ០០០ ករណី ក្នុងនោះក៏មានករណីស្លាប់ដែរ ប៉ុន្តែចំនួនប៉ុន្មាននោះគឺលោកមិនទាន់អាចបញ្ជាក់បានទេ ដោយសារចំនួនតួលេខមិនទាន់បូកសរុបនៅឡើយ។
លោកបានបន្តថា៖ «ដូច្នេះតួលេខជំងឺរបេងក្នុងឆ្នាំ ២០២៣ បើធៀបនឹងឆ្នាំ ២០២២ គឺរកឃើញចំនួនអ្នកកើតជំងឺរបេង អាចប្រហាក់ប្រហែលគ្នាឬក៏មានការថយចុះតែបន្តិចបន្តួចប៉ុណ្ណោះ»។
លោកថា ជាទូទៅបើតាមការសិក្សាស្រាវជ្រាវពីជំងឺរបេងរកឃើញថា នៅទូទាំង ២៥ រាជធានី-ខេត្ត របស់កម្ពុជា សុទ្ធតែមានករណីជំងឺរបេង ខណៈករណីទាំងនោះវាក៏មិនអាចកំណត់បានថា ខេត្តណាមានករណីជំងឺរបេងតិច និងខេត្តណាទៀតមានករណីជំងឺរបេងច្រើនបានឡើយ ព្រោះវាអាស្រ័យទៅលើស្ថានភាពនៃការរស់នៅក្នុងតំបន់ទាំងនោះ ស្ថានភាពនៃការឆ្លង ក៏ដូចជាស្ថានភាពនៃការអប់រំសុខភាពនៅមានកម្រិតជាដើម។
លោក ហួត ចាន់យុដា បានបន្ថែមថា នៅតាមតំបន់ព្រំដែនរវាងកម្ពុជាជាមួយថៃ ក៏ដូចជារវាងកម្ពុជា និងវៀតណាម តាមរយៈការសង្កេតក៏ឃើញមានករណីជំងឺរបេងកើនឡើងផងដែរ ជាពិសេសបានកើតឡើងលើជនចំណាកស្រុក។
បើតាមលោក ហួត ចាន់យុដា នៅឆ្នាំ ២០២៤ នេះ តាមផែនការរបស់មជ្ឈមណ្ឌលជាតិកម្ចាត់រោគរបេងគឺត្រូវធ្វើយ៉ាងណា ស្រាវជ្រាវឱ្យបានច្រើនករណីជំងឺរបេង ដើម្បីកាត់បន្ថយអត្រាកើតនិងអត្រាស្លាប់ដោយសារជំងឺរបេងឱ្យបានច្រើនទៅតាមអ្វីដែលជាយុទ្ធសាស្ត្ររបស់កម្មវិធីជាតិនៃក្រសួងសុខាភិបាល។
លោកបានថ្លែងថា៖ «ទោះបីយ៉ាងណាក៏យើងរំពឹងទុកថា ករណីជំងឺរបេង វានឹងថយចុះ នៅពេលដែលយើងមានធនធានហិរញ្ញវត្ថុជួយជ្រោមជ្រែង និងមានការចូលរួមពីអង្គការដៃគូ ក៏ដូចជាការគាំទ្រពីរាជរដ្ឋាភិបាលជាដើម»។
ក្នុងឆ្នាំ ២០២៤ នេះដែរ មជ្ឈមណ្ឌលជាតិកម្ចាត់រោគរបេង និងដៃគូពាក់ព័ន្ធ កំពុងធ្វើការអង្កេតប្រេវ៉ាឡង់ជំងឺរបេងថ្នាក់ជាតិលើកទី ៣ ដើម្បីប្រមូលលទ្ធផលអង្កេតនេះក្នុងការជួយកម្ពុជាបង្កើតផែនការកាន់តែប្រសើរឡើងក្នុងការបញ្ចប់ជំងឺរបេង។
ក្រៅពីនេះ មជ្ឈមណ្ឌលជាតិក៏ពង្រីកការងារអប់រំសុខភាពទាក់ទងនឹងជំងឺរបេងនៅតាមសហគមន៍មូលដ្ឋានទាំងអស់ដែលមានប្រជាពលរដ្ឋរស់នៅក៏ដូចជា បង្កើនការងារអប់រំសុខភាពនៅកន្លែងផ្សេងៗទៀតដែលសង្ស័យថា មានករណីជំងឺរបេងដូចជា រោងចក្រ ពន្ធនាគារ និងជនចំណាកស្រុកមួយចំនួនផងដែរ។ នេះជាការបន្ថែមរបស់លោក ហួត ចាន់យុដា។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានឱ្យដឹងដែរថា ស្ថានភាពជំងឺរបេងក្នុងខេត្តកំពង់ឆ្នាំងមិនមានអ្វីគួរឱ្យបារម្ភនោះទេ ដោយសារទាំងអត្រាអ្នកកើត អត្រាអ្នកឆ្លង និងអត្រាអ្នកព្យាបាលគឺស្ថិតក្រោមការគ្រប់គ្រងបាន។
លោកថា ជាក់ស្ដែងក្នុងឆ្នាំ ២០២៣ កន្លងទៅ ទូទាំងខេត្តកំពង់ឆ្នាំងរកឃើញករណីជំងឺរបេងសរុបប្រមាណ ៨០០ ករណី បើធៀបនឹងឆ្នាំ ២០២២ គឺឃើញថា អ្នកកើតជំងឺរបេងមានការថយចុះមួយចំនួនធំដែរ។
លោកបានបន្តទៀតថា តួលេខ ៨០០ ករណីនេះ គឺសរុបគ្រប់ប្រភេទនៃជំងឺរបេងទាំងអស់ដែលកើតឡើងក្នុងខេត្តកំពង់ឆ្នាំង ខណៈអ្នកជំងឺរបេងទាំងនោះមិនមាននរណាម្នាក់ត្រូវបានទុកចោលទេ គឺពួកគាត់សុទ្ធតែទទួលបានការព្យាបាល និងទទួលបានថ្នាំសម្រាប់លេបនៅចំពោះមុខគ្រូពេទ្យជាប្រចាំ។
លោកប្រាក់ វ៉ុន បានបញ្ជាក់ថា៖ «ឆ្នាំនេះយើងបានដាក់ចេញផែនការសកម្មភាពរបស់យើង គឺបង្កើនការស្រាវជ្រាវជំងឺរបេងសកម្មនៅតាមមូលដ្ឋាន និងពង្រឹងគុណភាពព្យាបាលហើយនិងយើងបង្កើនសកម្មភាពការងារអប់រំសុខភាពជូនប្រជាពលរដ្ឋដើម្បីកុំឱ្យមានការចម្លង»។
ទន្ទឹមនឹងនេះ នៅក្នុងមណ្ឌលសុខភាពនីមួយៗក្នុងខេត្តកំពង់ឆ្នាំងក៏មានឧបករណ៍សម្រាប់ស្រាវជ្រាវរកករណីជំងឺរបេងនៅពេលដែលមានអ្នកជំងឺមានរោគសញ្ញាក្អក ដូច្នេះក្រុមគ្រូពេទ្យនឹងកំណត់មុខសញ្ញាស្រាវជ្រាវរកជំងឺរបេង ដើម្បីកាត់បន្ថយអត្រាការឆ្លងជំងឺនេះផងដែរ។ នេះបើតាមការបន្ថែមរបស់លោក ប្រាក់ វ៉ុន៕
