លោកស សុខា ក្នុងពិធីបិទវគ្គបណ្ដុះបណ្ដាលកម្រិតបឋមវិជ្ជាជីវៈនគរបាលនៅសាលានគរបាលជាតិភូមិភាគ១ខេត្តស្ទឹងត្រែងកាលពីថ្ងៃទី១៣កុម្ភៈ។ រូបថត ហ្វេសប៊ុក Sar Sokha
ស្ទឹងត្រែងៈ លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានលើកឡើងថា យុទ្ធនាការប្រយុទ្ធប្រឆាំងគ្រឿងញៀនក្នុងចំណោមមន្រ្តីនគរបាលជាតិ តាមរយៈការអនុវត្តវិធានការធ្វើតេស្តរកសារធាតុញៀន នឹងត្រូវអនុវត្តបន្ដដោយគ្មានការដកដៃឡើយ ដើម្បីធានាភាពជាគំរូនៃមន្រ្តីអនុវត្តច្បាប់។
លោក ស សុខា បានលើកឡើងបែបនេះកាលពីថ្ងៃទី១៣ ខែកម្ភៈ ក្នុងពិធីសម្ពោធផ្លូវបេតុង និងសមិទ្ធផលនានា ព្រមទាំងពិធីបិទវគ្គបណ្ដុះបណ្ដាលកម្រិតបឋមវិជ្ជាជីវៈនគរបាល ជំនាន់ទី១៧ លើកទី២ នៅសាលានគរបាលជាតិភូមិភាគ១ នៅខេត្តស្ទឹងត្រែង។
លោកថ្លែងថា៖«យុទ្ធនាការប្រយុទ្ធប្រឆាំងគ្រឿងញៀនក្នុងចំណោមមន្រ្តីនគរបាលជាតិ តាមរយៈការអនុវត្តវិធានការធ្វើតេស្តរកសារធាតុញៀន លើមន្រ្តីកងកម្លាំងរបស់ក្រសួងមហាផ្ទៃ ទាំងមន្រ្តីនគរបាលជាតិ និងមន្រ្តីពន្ធនាគារ នឹងត្រូវអនុវត្តបន្ដដោយគ្មានការដកដៃឡើយ ដើម្បីធានាភាពជាគំរូនៃមន្រ្តីអនុវត្តច្បាប់»។
ជាមួយគ្នានេះលោកស សុខា បានកោតសរសើរចំពោះថ្នាក់ដឹកនាំ និងមន្រ្តីកងកម្លាំងចំណុះក្រសួងមហាផ្ទៃទាំងអស់ដែលបានចូលរួមអនុវត្តវិធានការនេះយ៉ាងសកម្ម និងស្មោះត្រង់ ធ្វើឱ្យក្រសួងមហាផ្ទៃ ឈានទៅអនុវត្តវិធានការវិន័យចំពោះមន្រ្តីប្រើប្រាស់គ្រឿងញៀន។
ទាក់ទងនឹងការអនុវត្តវិធានការវិន័យ លោក ស សុខា បានសង្កត់ធ្ងន់ថា ៖ «៥ខែចុងក្រោយនេះ យើងឃើញមន្រ្តីប្រព្រឹត្តបទល្មើស ឬល្មើសវិន័យជាបន្តបន្ទាប់ត្រូវបានបណ្ដេញចេញ ឬមួយបន្ថយស័ក្ដិ ឬមួយដកហូតតួនាទី។ ខ្ញុំខ្លួនឯងផ្ទាល់ ឬមួយឯកឧត្តមរដ្ឋលេខាធិការទទួលបន្ទុក ឬមួយឯកឧត្តមអគ្គស្នងការ ក៏មិនចង់ធ្វើដែរ ប៉ុន្តែនេះជាការកាត់សាច់ស្អុយ ជាការសម្អាតផ្ទះយើង មុននឹងយើងរៀបចំផែនការបន្តទៀត ទាំងការអភិវឌ្ឍធនធានមនុស្ស»។
សូមរំឭកដែរថា «ការវះកាត់» គឺជាជម្រើសចុងក្រោយមួយនៃការអនុវត្តមរតក «អភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» របស់លោក ហ៊ុន សែន អតីតនាយករដ្ឋមន្រ្តី។
នាឱកាសនោះដែរ លោកឧបនាយករដ្ឋមន្ត្រីក៏បានរំឭកថា ត្រូវមានស្មារតីម៉ឺងម៉ាត់ក្នុងការប្រយុទ្ធប្រឆាំងគ្រឿងញៀន ដោយផ្ដើមចេញពីខ្លួនឯងជាមុន ពីព្រោះប្រសិនបើកងកម្លាំងណាម្នាក់ផុងខ្លួនប្រើប្រាស់ ឬពាក់ព័ន្ធបទល្មើសគ្រឿងញៀន រួមទាំងបទល្មើសផ្សេងៗ ក្នុងសង្គម ក្រសួងនឹងសម្រេចបណ្ដេញចេញពីក្របខ័ណ្ឌដោយគ្មានការលើកលែងនោះឡើយ។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូបានថ្លែងថា ការពង្រឹងយុទ្ធនាការប្រយុទ្ធប្រឆាំងគ្រឿងញៀនគឺជារឿងចាំបាច់ដែលរាជរដ្ឋាភិបាលត្រូវបន្តធ្វើ។ ដូច្នេះកងកម្លាំងនគរបាល កងកម្លាំងគ្រប់ប្រភេទ និងមន្រ្តីរាជការត្រូវនៅឱ្យឆ្ងាយពីគ្រឿងញៀនគឺជាការអនុវត្តត្រឹមត្រូវ និងជាគំរូសម្រាប់ប្រជាពលរដ្ឋ។
លោកបានបន្តថា៖«បញ្ហាគ្រឿងញៀនជារឿងនៅតែគួរឱ្យព្រួយបារម្ភ ព្រោះបើយើងពិនិត្យមើលជនដែលជាប់ឃុំនៅក្នុងពន្ធនាគារជាង ៥០% ពាក់ព័ន្ធបទល្មើសគ្រឿងញៀន ហើយមានជនរងគ្រោះដោយសារគ្រឿងញៀនរាប់ម៉ឺននាក់ទៀត»។
លោក អំ សំអាត បន្តថា គ្រឿងញៀនបំផ្លាញធនធានមនុស្ស បំផ្លាញធនធានបុគ្គល គ្រួសារ និងថវិកាជាតិ ដូច្នេះយន្តការក្នុងការទប់ស្កាត់ និងការបង្រ្កាបគ្រឿងញៀន ត្រូវតែពង្រឹងបន្ថែម ដូចជាពង្រឹងការអនុវត្តច្បាប់ បង្កើនកិច្ចសហការពីគ្រប់ភាគី និងការចូលរួមពីប្រជាពលរដ្ឋ បំបាត់អំពើពុករលួយទាក់ទងគ្រឿងញៀន ជនដែលពាក់ព័ន្ធបទល្មើសគ្រឿងញៀនត្រូវធានាថា ទទួលទោសតាមច្បាប់។
លើសពីនេះលោកអំ សំអាត លើកឡើងថា កម្ពុជាត្រូវបង្កើនកិច្ចសហការជាមួយបណ្តាប្រទេសជិតខាង ក្នុងតំបន់ និងអន្តរជាតិដើម្បីទប់ស្កាត់ និងបង្រ្កាបបញ្ហាគ្រឿងញៀន៕
