ទិដ្ឋភាពអ្នកលក់ និងអ្នកទិញរបស់អនុស្សាវរីយ៍ក្នុងទិវានៃក្ដីស្រឡាញ់។ ហេង ជីវ័ន
ក្រសួង-ស្ថាប័នចំនួន៤ បានអំពាវនាវដល់មាតាបិតា អាណាព្យាបាល និងសមត្ថកិច្ច ពាក់ព័ន្ធគ្រប់លំដាប់ថ្នាក់ ចូលរួមផ្សព្វផ្សាយអប់រំក្រើនរំឭក ដោយកុំយកថ្ងៃទី១៤កុម្ភៈ «ទិវានៃសេចក្តីស្រឡាញ់» ទៅប្រព្រឹត្តសកម្មភាពប្រាសចាកសីលធម៌ វប្បធម៌ ក៏ដូចជាប្រពៃណីខ្មែរ។
ក្រសួងកិច្ចការនារី បានលើកឡើងថា កន្លងមកមានប្រជាពលរដ្ឋ និងយុវជន យុវនារីមួយចំនួន នៅមានការយល់ខុស និងភាន់ច្រឡំលើអត្ថន័យនៃថ្ងៃទី១៤ ខែកុម្ភៈ ដែលមនុស្សមួយចំនួន បានយកថ្ងៃនៃក្តីស្រឡាញ់នេះ ទៅប្រព្រឹត្តសកម្ម ភាពដែលពុំគួរគប្បី ប្រាសចាកសីលធម៌ វប្បធម៌ ប្រពៃណី និងទំនៀមទម្លាប់ដ៏ល្អផូរផង់របស់ខ្មែរ។
ក្រសួងបានបញ្ជាក់ថា៖ «សូមក្រើនរំឭកជូនដល់ប្រជាពលរដ្ឋ ពិសេសយុវជន យុវនារីខ្មែរ មេត្តាប្រកាន់ខ្ជាប់នូវកិត្តិយស សេចក្តីថ្លៃថ្នូរ និងចូលរួមថែរក្សា លើកស្ទួយ កិត្យានុភាពជាតិ វប្បធម៌ ប្រពៃណី ទំនៀមទម្លាប់ខ្មែរ ដែលជាមរតកដ៏ថ្លៃថ្លាបន្សល់ទុកតាំងពីបុរាណកាលមក ហើយគួរសិក្សាស្រាវជ្រាវ ស្វែងយល់ឱ្យបានស៊ីជម្រៅ គ្រប់ជ្រុងជ្រោយលើអត្ថន័យ និងខ្លឹមសារនៃទិវានៃក្តីស្រឡាញ់នេះ»។
ទន្ទឹមនឹងនេះដែរ ក្រសួងវប្បធម៌ និងវិចិត្រសិល្បៈ ក៏បានអំពាវនាវឱ្យមានការចូលរួមផ្សព្វផ្សាយអប់រំ ពន្យល់ណែនាំ ក្រើនរំឭកដល់កូនចៅ ក្នុងគោលដៅប្រើប្រាស់ទិវានៃក្តីស្រឡាញ់ថ្ងៃទី១៤ កុម្ភៈ ឱ្យស្របតាមគន្លងប្រពៃណីដ៏ល្អត្រកាលរបស់ខ្មែរ ដើម្បីជាកិត្តិយស និងភាពថ្លៃថ្នូររបស់ខ្លួន របស់ក្រុមគ្រួសារខ្លួន ពិសេសរួមចំណែកលើកកម្ពស់កិត្យានុភាពនៃសង្គមជាតិ។
ចំណែក រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន ក៏បានណែនាំដល់គ្រប់គ្រឹះស្ថានសិក្សាសាធារណៈ និងឯកជនទាំងអស់ ត្រូវពង្រឹងការអនុវត្តបទបញ្ជាផ្ទៃដោយតាមដានអវត្តមានរបស់សិស្សានុសិស្សជាប់ជាប្រចាំ និងត្រូវផ្សព្វផ្សាយពីអត្ថន័យទិវានៃក្តីស្រឡាញ់ដល់សិស្សានុសិស្សឱ្យបានទូលំទូលាយ ដើម្បីចៀសវាងការយល់ច្រឡំដែលនាំឱ្យប្រាសចាកវប្បធម៌ និងប្រពៃណីជាតិរបស់ខ្មែរ។
បន្ថែមពីនេះក្រសួងអប់រំ ក៏បានណែនាំឱ្យគ្រឹះស្ថានសិក្សាសាធារណៈ និងឯកជនទាំងអស់ ត្រូវមានទំនាក់ទំនងជាមួយមាតាបិតា ឬអ្នកអាណាព្យាបាលសិស្ស និងសហគមន៍ ដើម្បីផ្តល់ និងទទួលព័ត៌មាននានា ដែលពាក់ព័ន្ធនឹងសកម្មភាពមិនប្រក្រតីផងដែរ។
ដោយឡែក ក្នុងទិវានៃក្ដីស្រឡាញ់នេះដែរ អាជ្ញាធរជាតិប្រយុទ្ធនឹងជំងឺអេដស៍ បានអំពាវនាវដល់ពលរដ្ឋ ជាពិសេសយុវវ័យ កុំធ្វើសកម្មភាពអ្វីដែលប្រាសចាកពីប្រពៃណី ទំនៀមទម្លាប់ខ្មែរ និងអាចប៉ះពាល់ដល់សុខភាពផ្ទាល់ខ្លួនផងដែរ។ ដោយអាជ្ញាធរជាតិប្រយុទ្ធនឹងជំងឺអេដស៍ បានដាក់ចេញពាក្យស្លោកថា «ស្រឡាញ់ពិត ថែជីវិតចាកពីមេរោគអេដស៍»។
អាជ្ញាធរជាតិប្រយុទ្ធនឹងជំងឺអេដស៍ បានឱ្យដឹងថា៖ «សូមស្នើក្មួយៗប្រើប្រាស់ទិវានៃក្តីស្រឡាញ់ ទៅជាការស្រឡាញ់ខ្លួនឯង ស្រឡាញ់គ្រួសារ ស្រឡាញ់បងប្អូន ស្រឡាញ់ញាតិមិត្ត ស្រឡាញ់ប្រទេសជាតិ ស្រឡាញ់វប្បធម៌ ប្រពៃណី ដូនតាខ្មែរដ៏ផូរផង់របស់យើង»។
បើតាមអាជ្ញាធរជាតិប្រយុទ្ធនឹងជំងឺអេដស៍ មកដល់ពេលបច្ចុប្បន្ននេះ ការឆ្លងរីករាលដាលមេរោគអេដស៍ នៅកំពុងបន្តកើតមានក្នុងចំណោមក្រុមប្រជាជនគន្លឹះ ជាពិសេសក្រុមយុវវ័យបុរសរួមភេទជាមួយបុរស។
តាមការប៉ាន់ប្រមាណនៅឆ្នាំ២០២៣ នេះ អ្នកផ្ទុកមេរោគអេដស៍ មានចំនួនប្រមាណ ៧៦០០០ នាក់ អ្នកឆ្លងមេរោគអេដស៍ថ្មីមានប្រមាណ ១៤០០ នាក់ នៅក្នុង ១ ឆ្នាំ ឬប្រមាណ ៤ នាក់ នៅក្នុង ១ ថ្ងៃ។ ក្នុងចំណោមអ្នកឆ្លងមេរោគអេដស៍ថ្មីប្រមាណ ៤២% គឺជាយុវវ័យដែលមានអាយុពី១៥-២៤ឆ្នាំ៕
ជាមួយគ្នានេះដែរ យោងតាមរបាយការណ៍របស់លោក តុង សុប្រាជ្ញ អ្នកសិក្សាស្រាវជ្រាវផ្នែកសុខភាពសាធារណៈ បានបង្ហាញថា យុវវ័យកម្ពុជា ជាងពាក់កណ្ដាល បានធ្លាក់ចុះចំពោះការរួមភេទក្នុងថ្ងៃបុណ្យនៃក្តីស្រឡាញ់ បើធៀបនឹង ១៥ឆ្នាំមុន ពី ១២,៤% ក្នុងឆ្នាំ២០០៩ មកសល់ត្រឹម ២,២% ក្នុងឆ្នាំ២០២៤ នេះ។
លោកបានឱ្យដឹងថា គម្រោងស្រាវជ្រាវនេះ បានធ្វើទៅលើយុវវ័យ ដែលមានទ្រព្យសម្បតិ្តបង្គួរដែលមានអាយុពី ១៥ ឆ្នាំ ទៅ ២៤ ឆ្នាំ រស់នៅរាជធានីភ្នំពេញ។ ដោយឡែកយុវវ័យក្នុងការសិក្សាស្រាវជ្រាវនេះ ត្រូវបានបែងចែកចេញជា ៤ ផ្នែក គឺយុវជនដែលមានគូសង្សារ យុវជនដែលមិនមានគូ យុវនារីដែលមានគូសង្សារ និងយុវនារីដែលមិនមានគូដែលមានចំនួនសរុប ១៤៦៩ នាក់ (ស្រី ៨០៥ នាក់)។
ក្នុងរបាយការណ៍បានបង្ហាញថា ៖ «យុវវ័យ មានការចាប់អារម្មណ៍ ចំពោះថ្ងៃបុណ្យនៃក្តីស្រឡាញ់តិចជាងជិតពាក់កណ្តាល មានពី ៦១,២% ក្នុងឆ្នាំ២០០៩ មកសល់ត្រឹមតែ ៣៤,៤% ក្នុងឆ្នាំ២០២៤។ ចំណែកយុវវ័យ ដែលមានគូស្នេហ៍ ដែលចាប់អារម្មណ៍វិញ បានថយពី ៨១% ក្នុងឆ្នាំ២០០៩ មក ៣៩,០% ក្នុងឆ្នាំ២០២៤»។
លោក តុង សុប្រាជ្ញ បញ្ជាក់តាមរយៈរបាយការណ៍ថា៖ «អ្វីដែលគួរឱ្យកត់សម្គាល់នោះ គឺទំនាក់ទំនងផ្លូវភេទ ក្នុងចំណោមយុវវ័យ ដែលអាចនឹងរួមភេទនៅថ្ងៃបុណ្យនៃក្តីស្រឡាញ់ មានការធ្លាក់ចុះ ៥ដង បើធៀបនឹងការសិក្សាកាលពី ១៥ ឆ្នាំ មុន គឺមាន ១២,៤% ក្នុងឆ្នាំ២០០៩ មកសល់ត្រឹមតែ ២,២% ក្នុងឆ្នាំ២០២៤នេះ»។
ការដែលមានបំណងរួមភេទក្នុងថ្ងៃបុណ្យនៃក្ដីស្រឡាញ់នេះ មានទំនាក់ទំនងគ្នាយ៉ាងជាក់លាក់គឺការដែលនិយមថ្ងៃនៃក្ដីស្រឡាញ់នេះថា ជាថ្ងៃពិសេសសម្រាប់យុវវ័យនោះ គឺមានទិន្នាការធ្លាក់ចុះជាងពាក់កណ្ដាល បើធៀបនឹង ១៥ ឆ្នាំ មុន»៕
