ទិដ្ឋភាពនៃការធ្វើដំណើររបស់កម្មករ កម្មការិនី។ ហុង មិនា
បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំផែនការយុទ្ធសាស្ត្រដោះស្រាយមធ្យោបាយដឹកជញ្ជូនកម្មករ ដើម្បីកាត់បន្ថយអត្រាគ្រោះថ្នាក់ការងារ ពិសេសគ្រោះថ្នាក់ចរាចរណ៍ដល់បងប្អូនកម្មករនិយោជិត ដែលជាសមាជិក ប.ស.ស. ឱ្យបានជាអតិបរមា។
ក្រសួងការងារបានលើកឡើងកាលពីថ្ងៃទី១៣ ខែកុម្ភៈថា ការរៀបចំផែនការយុទ្ធសាស្ត្រ ដើម្បីកាត់បន្ថយអត្រាគ្រោះថ្នាក់ការងារនេះ គឺធ្វើឡើងស្របទៅតាមអនុសាសន៍ណែនាំរបស់លោកនាយករដ្ឋមន្ត្រី ហ៊ុន ម៉ាណែត។ ហេតុនេះ ដើម្បីកាត់បន្ថយគ្រោះថ្នាក់ចរាចរណ៍របស់កម្មករនិយោជិត ប.ស.ស. បានកំណត់សកម្មភាព សិក្សា សហការ និងរៀបចំមធ្យោបាយធ្វើដំណើរសមរម្យសម្រាប់កម្មករនិយោជិត សំដៅលើកកម្ពស់កម្មវិធីបង្ការហានិភ័យការងារ។
ក្រសួងបានបន្តថា៖«ដើម្បីកាត់បន្ថយគ្រោះថ្នាក់ចរាចរណ៍របស់បងប្អូនកម្មករនិយោជិតឱ្យមានប្រសិទ្ធភាព គឺ ប.ស.ស. បានដាក់ចេញយុទ្ធសាស្ត្រសំខាន់ៗដោយត្រូវធ្វើបញ្ជីបច្ចុប្បន្នភាពអ្នកបើកបរយានយន្តដឹកកម្មករនិយោជិតជាប្រចាំ និងត្រូវសិក្សាពីជម្រើសក្នុងការជំរុញការផ្លាស់ប្តូររថយន្តកែច្នៃដែលដឹកកម្មករនិយោជិតបច្ចុប្បន្ន ទៅជារថយន្តដឹកអ្នកដំណើរសម្រាប់ដឹកកម្មករនិយោជិត ដែលស្ថិតនៅក្រោមការគ្រប់គ្រងរបស់ក្រុមហ៊ុន ឬអង្គភាពណាមួយច្បាស់លាស់ យ៉ាងយូរត្រឹមឆ្នាំ២០២៧»។
ក្រៅពីចំណុចទាំងនេះ ប.ស.ស.ថារបាយការណ៍ស្តីពីការតាមដានរថយន្តដឹកកម្មករនិយោជិតប្រភេទដឹកទំនិញឱ្យមានការផ្លាស់ប្តូរ និងកែច្នៃកៅអីអង្គុយត្រឹមត្រូវ ក៏ត្រូវបានរៀបចំផងដែរ។
លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើកឡើងឱ្យដឹងដែរថា ការដាក់ចេញយុទ្ធសាស្ត្រដើម្បីកាត់បន្ថយអត្រាគ្រោះថ្នាក់ការងារ ធ្វើឡើងបន្ទាប់ពីសង្កេតឃើញការធ្វើដំណើររបស់កម្មករនិយោជិតប្រើប្រាស់រថយន្តដឹកទំនិញ មិនមានដំបូល កន្លែងអង្គុយមិនបានត្រឹមត្រូវ និងដឹកកម្មករក្នុងចំណុះច្រើន ដែលអាចប្រឈមនឹងហានិភ័យគ្រោះថ្នាក់ចរាចរណ៍កើតឡើង។
លោកបន្តទៀតថា៖«យើងលើកទឹកចិត្តឱ្យមានរថយន្តក្រុងមានផាសុកភាព មានម៉ាស៊ីនត្រជាក់ មានកៅអីអង្គុយត្រឹមត្រូវប៉ុន្តែទន្ទឹមគ្នានេះ យើងក៏ត្រូវគិតថាតើយើងត្រូវធ្វើដូចម្តេចដើម្បីឱ្យអ្នករកស៊ីដឹកកម្មករមានលទ្ធភាពប្រើប្រាស់រថយន្តប្រភេទនេះ ដូច្នេះហើយទើបក្រសួងកំពុងខិតខំដោះស្រាយបញ្ហានេះ ហើយយើងនឹងពិភាក្សាជាមួយ ភាគីពាក់ព័ន្ធដើម្បីសម្រេចផែនការនេះ»។
ជុំវិញរឿងនេះប្រធានសម្ព័ន្ធសហជីពជាតិ លោក ហ្វា សាលី បានគាំទ្រចំពោះរាជរដ្ឋាភិបាលដែលផ្តួចផ្តើមឱ្យមានការធានាសុវត្ថិភាពការងារដល់កន្លែងការងារ ខណៈគ្រោះថ្នាក់ចរាចរណ៍ដែលកើតមានចំពោះកម្មករនៅតែមានហានិភ័យខ្ពស់ ហើយលោកសង្ឃឹមថា ផែនការយុទ្ធសាស្ត្រនេះនឹងសម្រេចជោគជ័យឆាប់ៗ។
លោកបានប្រាប់ថា៖«ទោះជាមិនដឹងច្បាស់ថាផែនការឬយុទ្ធសាស្ត្រកាត់បន្ថយគ្រោះថ្នាក់ចរាចរណ៍របស់ក្រសួងបែបណាប្រាកដ តែយើងនឹងរង់ចាំមើល ហើយជំរុញឱ្យបងប្អូនកម្មករប្រើប្រាស់ ប.ស.ស ឱ្យបានគ្រប់គ្នាៗ ហើយយើងសង្ឃឹមថាផែនការនឹងសម្រេចឆាប់ៗ ដើម្បីចៀសវាងកាត់បន្ថយគ្រោះថ្នាក់ចរណ៍ផ្សេងៗ»។
ទន្ទឹមគ្នានេះដែរ លោក ហ្វា សាលី ក៏បានស្នើឱ្យស្នងការ និងក្រុមនគរបាលទូទាំងប្រទេស ចូលរួមសម្រួលចរាចរណ៍ និងបញ្ចៀសហានិភ័យចំពោះកម្មករនៅលើដងផ្លូវផងដែរ។
ផ្អែកតាមផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈឆ្នាំ២០២៤-២០២៨ របស់ក្រសួងនៅក្នុងយុទ្ធសាស្ត្រទី៥-កម្មវិធីទី៣, បេឡាជាតិសន្តិសុខសសង្គម ក៏បានលើកឡើងពីការពង្រឹងការអប់រំ និងផ្សព្វផ្សាយលើកកម្ពស់សុខុលមាលភាព ការបង្ការហានិភ័យការងារ និងការគ្រប់គ្រងហិរញ្ញវត្ថុផងដែរ។
ដើម្បីអនុវត្តការងារនេះ ឱ្យមានប្រសិទ្ធភាព នឹងឆ្លើយតបទៅនឹងផែនការយុទ្ធសាស្ត្រអភិវឌ្ឍន៍វិស័យការងារនេះ ប.ស.ស. នឹងកំណត់សកម្មភាពផ្សព្វផ្សាយស្តីពីសុវត្ថិភាពចរាចរណ៍ពេលធ្វើដំណើរ និងលក្ខខណ្ឌអនាម័យ សុវត្ថិភាពការងារ លក្ខខណ្ឌការងារ អត្ថប្រយោជន៍របបសន្តិសុខសង្គម និងការគ្រប់គ្រងហិរញ្ញវត្ថុ ដែលក្នុង ១ឆ្នាំត្រូរៀបចំយ៉ាងតិចឱ្យបាន៩៦០វគ្គ និងមានអ្នកចូលរួមយ៉ាងតិចចំនួន១២៨ ០០០នាក់ថែមទៀត៕
