ក្រសួងសង្គមកិច្ច អតីតយុទ្ធជន និងយុវនីតិសម្បទា បានចុះកិច្ចព្រមព្រៀងជាមួយសមាគម និងអង្គការមិនមែនរដ្ឋាភិបាលចំនួន ៣០ ក្នុងទំហំថវិកាជាង ១៨,៥ លានដុល្លារអាមេរិក សម្រាប់រយៈពេល ៣ ឆ្នាំ ក្នុងគម្រោងជួយដល់កិច្ចគាំពារកុមារ ជនងាយរងគ្រោះ និងលើកកម្ពស់សេដ្ឋកិច្ចគ្រួសារក្រីក្រ។
ពិធីចុះហត្ថលេខានេះ ប្រព្រឹត្តឡើងក្រោមវត្តមានរវាងលោក ស៊ូនី វង្សវិសិដ្ឋ រដ្ឋលេខាធិការ ក្រសួងសង្គមកិច្ច ជាមួយនឹងសមាគម អង្គការមិនមែនរដ្ឋាភិបាលចំនួន ៣០ នៅទីស្តីការក្រសួង កាលពីរសៀលថ្ងៃទី១៥ ខែកុម្ភៈ ឆ្នាំ២០២៤។ នេះបើតាមការជូនដំណឹងរបស់ក្រសួងសង្គមកិច្ចតាមរយៈ ហ្វេសប៊ុក។
នៅក្នុងចំណោមអង្គការទាំង ៣០ ដែលបានចុះហត្ថលេខា មានអង្គការអន្តរជាតិ (អង្គការមិនមែនរដ្ឋាភិបាលបរទេស) ចំនួន ១៦ និងអង្គការមិនមែនរដ្ឋាភិបាលក្នុងស្រុកចំនួន ១៤។
ក្រសួងសង្គមកិច្ចបញ្ជាក់ថា៖«ក្នុងនោះសមាគម និងអង្គការមិនមែនរដ្ឋាភិបាលចំនួន ២០ អនុវត្តគម្រោងពាក់ព័ន្ធលើវិស័យកុមារ, សមាគម និងអង្គការចំនួន ៦ អនុវត្តគម្រោងពាក់ព័ន្ធលើវិស័យគាំពារជនរងគ្រោះ, សមាគម និងអង្គការចំនួន ៤ ទៀត អនុវត្តគម្រោងពាក់ព័ន្ធនឹងវិស័យកិច្ចការគ្រួសារ»។
ឆ្លៀតក្នុងឱកាសនោះ លោក ស៊ូនី វង្សវីស្សិត បានថ្លែងអំណរគុណចំពោះសមាគម និងអង្គការមិនមែនរដ្ឋាភិបាលទាំងអស់ដែលបានសហការយ៉ាងល្អជាមួយក្រសួងសង្គមកិច្ចនាពេលកន្លងមក។
ពិសេសនោះ អង្គការបានបន្តខិតខំស្វែងរកមូលនិធិ អនុវត្តគម្រោងដែលជាប្រយោជន៍ជួយគាំពារ និងអភិវឌ្ឍន៍ដល់ស្ត្រី កុមារ ជនរងគ្រោះ និងងាយរងគ្រោះ គ្រួសារក្រីក្រ ដោយលោកបានគូសរំលេចថា កិច្ចការទាំងនេះនឹងចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍសង្គមសេដ្ឋកិច្ច ស្របតាមយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលកម្ពុជា។
សូមជម្រាបថា បច្ចុប្បន្នមានអង្គការ សមាគមចំនួន ១៤២ បានចុះកិច្ចព្រមព្រៀងអនុវត្តគម្រោង ជាមួយក្រសួងសង្គមកិច្ចអតីតយុទ្ធ ជននិងយុវនីតិសម្បទា ក្នុងនោះអង្គការធ្វើការលើវិស័យកុមារចំនួន ៩១ អង្គការ លើកិច្ចការគាំពារជនរងគ្រោះចំនួន ១៥ អង្គការ និងកិច្ចការគ្រួសារចំនួន ១៧ និងតាមវិស័យផ្សេងៗមួយចំនួនទៀត៕
