ក្រសួងព័ត៌មាន។ ហេង ជីវ័ន
ភ្នំពេញៈ មន្ត្រីនៃក្រសួងព័ត៌មានបានឱ្យដឹងថា ក្រសួងបានប្រកាសរៀបចំមហោស្រពតន្ត្រី និងចម្រៀងកុមារពានរង្វាន់របស់ក្រសួងប្រចាំឆ្នាំ ២០២៤ នាពេលឆាប់ៗខាងមុខនេះដែលមហោស្រពនេះ នឹងក្លាយជាផ្នែកមួយក្នុងការឈានទៅលើកកម្ពស់សិទ្ធិរបស់កុមារកម្ពុជា។
លោក ទេព អស្នារិទ្ធ អ្នកនាំពាក្យក្រសួងព័ត៌មាន នៅថ្ងៃទី ២១ ខែកុម្ភៈបានឱ្យដឹងថា ក្រោមការដឹកនាំរបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មានដ៏មានសារៈសំខាន់នេះ គ្រោងនឹងរៀបចំឡើងសម្រាប់ជាផ្នែកមួយក្នុងការឈានទៅអបអរការប្រារព្ធទិវាកុមារអន្តរជាតិ ឆ្នាំ ២០២៤។
លោកបានប្រាប់ថា៖ «គោលបំណងនៃការរៀបចំមហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ ២០២៤ នេះ គឺដើម្បីលើកកម្ពស់ការចូលរួមរបស់កុមារកម្ពុជាក្នុងការបញ្ចេញសមត្ថភាពពិតរបស់ពួកគេ និងលើកទឹកចិត្តដល់កុមារកម្ពុជាយើងក្នុងការបង្ហាញភាពអង់អាចក្លាហាន ទេពកោសល្យ និងស្នាដៃ សម្រាប់ផ្តល់ជាគំរូល្អដល់កុមារដទៃទៀត ដែលសុទ្ធសឹងជាទំពាំងស្នងឫស្សី និងជាការរួមចំណែកមួយរបស់ពួកគេចូលរួមក្នុងសកម្មភាពរបស់សង្គមយើង»។
លោកបានបន្ថែមថា រាល់ការបញ្ចេញសមត្ថភាពច្រៀង និងសម្តែង គឺសម្រាប់ការប្រកួតប្រជែងយកជយលាភីពិតមែន ប៉ុន្តែការបញ្ចេញសមត្ថភាពទាំងអស់សុទ្ធសឹងមានភ្ជាប់នូវគោលបំណងបង្ហាញភាពអង់អាចក្លាហាន ភាពអាចធ្វើបានរបស់កុមារកម្ពុជា ប្រកបដោយអត្ថន័យអប់រំ បណ្តុះគំនិតស្រឡាញ់វប្បធម៌ ប្រពៃណី និងការប្រកាន់ខ្ជាប់នូវសីលធម៌ល្អរបស់កុមារកម្ពុជា។
ជាងនេះទៀតខ្លឹមសារ និងការចូលរួមរបស់កុមារក្នុងកម្មវិធីនេះ រួមចំណែកលើកកម្ពស់សិទ្ធិរបស់កុមារ ការលុបបំបាត់អំពើកេងប្រវ័ញ្ចលើកុមារ ការលុបបំបាត់ការសេពគ្រឿងញៀន ការយល់ដឹងអំពីសុវត្ថិភាពចរាចរណ៍ តម្លៃនៃចំណេះវិជ្ជា សុជីវធម៌និងការរស់នៅក្នុងសង្គមតួយ៉ាង៖ ការគោរពឪពុក ម្តាយ ចាស់ទុំ ចាស់ព្រឹទ្ធាចារ្យ លោកគ្រូអ្នកគ្រូ និងសហគមន៍ដែលនៅជុំវិញខ្លួន។ នេះបើតាមការបញ្ជាក់បន្ថែមពីលោក ទេពអស្នារិទ្ធ។
លោក គង់ សំនៀង ប្រធានសហព័ន្ធសេវាអប់រំនៅកម្ពុជា បានថ្លែងគាំទ្រការបង្កើតឱ្យមានព្រឹត្តិការណ៍ការប្រកួតប្រជែងគ្រប់ផ្នែក និងគ្រប់វិស័យរបស់ក្រសួងនិងស្ថាប័នពាក់ព័ន្ធ ព្រោះជារឿងសំខាន់ជួយជំរុញភាពក្លាហានរបស់សិស្ស។
លោកថ្លែងថា៖ «ការសិក្សារៀនសូត្រ មានផ្នែកមួយផ្សាភ្ជាប់នឹងសិល្បៈ បើគ្រូគាត់មានជំនាញក្នុងការអប់រំ ហើយគាត់មានសិល្បៈក្នុងខ្លួនទៀត នឹងធ្វើឱ្យការអប់រំហ្នឹង ក្មេងចូលចិត្ត គាត់ស្រឡាញ់ រហូតដល់សាលាមួយចំនួនទៀតក៏បង្កើតជាចម្រៀងដែលបង្កប់នូវការអប់រំ ដើម្បីបណ្តុះការចូលរួមរបស់សិស្សរបស់ខ្លួនផងដែរ»។
លោកថ្លែងដោយជំរុញទៅដល់សាលាទាំងរដ្ឋ និងឯកជនចូលរួមក្នុងកម្មវិធីនេះ ខណៈក្រសួងព័ត៌ត្រូវបង្កើនការផ្សព្វផ្សាយបន្ថែមទៀត ដើម្បីជំរុញការចូលរួមពីសាលានៅទូទាំងប្រទេស ពិសេសសិស្សសាលានៅតាមតំបន់ដាច់ស្រយាល។
យោងតាមសេចក្តីជូនដំណឹងរបស់ក្រសួងព័ត៌មានបានឱ្យដឹងថា កុមារា កុមារីរូបណាដែលមានជំនឿចិត្តលើទេពកោសល្យ ភាពប៉ិនប្រសព្វលើកាយវិការ និងទឹកដមសំឡេងពីរោះនោះ អាចមកទំនាក់ទំនងមកដាក់ពាក្យប្រឡងនៅក្រសួងព័ត៌មានតាមកាលបរិច្ឆេទទទួលពាក្យប្រឡងចាប់ផ្ដើមពីថ្ងៃទី ១៩ ខែកុម្ភៈនេះ។
ចំពោះកាលបរិច្ឆេទរៀបចំមហោស្រពតន្ត្រី និងចម្រៀងកុមារឆ្នាំ ២០២៤ នេះ មិនទាន់អាចបញ្ជាក់នៅឡើយ ខណៈគណៈកម្មការរៀបចំនឹងបន្តបើកកិច្ចប្រជុំពិភាក្សាទៀត៕
