ជំនួបរវាងលោក ឈាង រ៉ា និងលោកស្រី Eda KRAJA កាលពីថ្ងៃទី២៦ កុម្ភៈ ។ រូបថត ក្រសួងសុខាភិបាល
ភ្នំពេញៈលោក ឈាង រ៉ា រដ្ឋមន្ត្រីក្រសួងសុខាភិបាល បានស្នើដល់អង្គការសហប្រជាជាតិសម្រាប់សេវាកម្មគម្រោង(UNOPS) ឱ្យបន្តរក្សាពង្រីកការគាំទ្រ និងចែករំលែកបទពិសោធន៍ល្អៗ ជាពិសេសផ្តោតលើការងារលទ្ធកម្ម ដើម្បីរួមគ្នាលើកកម្ពស់សុខុមាលភាពរបស់ប្រជាជនកម្ពុជា។
លោកស្នើដូច្នេះនៅក្នុងកិច្ចពិភាក្សាការងារជាមួយលោកស្រី Eda KRAJA នាយិកាអង្គការសហប្រជាជាតិសម្រាប់សេវាកម្មគម្រោង (United Nations Office for Project Service-UNOPS) ប្រចាំប្រទេសកម្ពុជា និងប្រទេសឡាវនាទីស្តីការក្រសួងសុខាភិបាលកាលថ្ងៃទី២៦ ខែកុម្ភៈ ឆ្នាំ២០២៤។ នេះបើយោងតាមហ្វេសប៊ុក ក្រសួងសុខាភិបាល។
ក្រសួងសុខាភិបាលបានឱ្យដឹងថា លោក ឈាង រ៉ា បានលើកឡើងពីអាទិភាពវិស័យសុខាភិបាលទាំង៩ចំណុច និងអាទិភាពគន្លឹះទាំង៣ចំណុចដើម្បីលើកម្ពស់វិស័យសុខាភិបាល ហើយលោកក៏បានសំណូមពរឱ្យ UNOPS បន្តរក្សាពង្រីកកិច្ចសហប្រតិបត្តិការដែលអាចអនុលោម និងបន្ស៊ីជាមួយវិស័យអាទិភាពទាំងនោះផងដែរ។
លោករដ្ឋមន្ត្រីបញ្ជាក់ថា៖«សូមឱ្យអង្គការបន្តរក្សាពង្រីកនិងចែករំលែកបទពិសោធន៍ល្អៗ ដែលបានអនុវត្តកន្លងមក ជាពិសេសផ្តោតលើការងារលទ្ធកម្មជាមួយក្រុមហ៊ុន និងដៃគូផ្គត់ផ្គង់ដើម្បីរួមគ្នាលើកកម្ពស់សុខុមាលភាពរបស់ប្រជាជនកម្ពុជាដើម្បីឈានទៅសម្រេចបាននូវការគ្របដណ្តប់សុខភាពជាសកលស្របតាមផែនការយុទ្ធសាស្ត្របញ្ចកោណ របស់រដ្ឋាភិបាលអាណត្តិទី៧»។
នាឱកាសនោះដែរ លោកស្រី នាយិកាអង្គការ UNOPS បានឱ្យដឹងថា អង្គការ UNOPS បានចាប់ផ្តើមការងារនៅកម្ពុជាអស់រយៈពេលជាង ១០ ឆ្នាំ មកហើយ ជាពិសេសក្នុងកិច្ចសហប្រតិបត្តិការជាមួយក្រសួងសុខាភិបាល ដើម្បីអនុវត្តលើគម្រោងនានា។
លោកស្រីបានបញ្ជាក់ថា៖«កិច្ចសហប្រតិបត្តិការរវាងអង្គការជាមួយក្រសួងកន្លងមក ពាក់ព័ន្ធនឹងការធ្វើលទ្ធកម្មទៅលើសម្ភារ និងឱសថ ការសម្របសម្រួល ទៅនឹងការងារប្រយុទ្ធប្រឆាំង និងលុបបំបាត់ជំងឺគ្រុនចាញ់ ការងារប្រយុទ្ធប្រឆាំងជំងឺរបេង និងការងារប្រយុទ្ធប្រឆាំងនឹងជំងឺឆ្លងសកល ដូចជាជំងឺកូវីដ១៩ ជាដើម»។
មន្ត្រីអង្គការដដែលនេះក៏បានឱ្យដឹងទៀតថា ក្រៅពីសកម្មភាពខាងលើ អង្គការក៏បានសហការជាមួយក្រសួងពាក់ព័ន្ធផ្សេងៗរបស់រាជរដ្ឋាភិបាលនិងអង្គការជាតិ-អន្តរជាតិឈានទៅសម្រេចគោលដៅអភិវឌ្ឍន៍ប្រកបដោយចីរភាព (SDG) មុនកាលបរិច្ឆេទកំណត់ផងដែរ។
លោក នុត សម្បត្តិ ប្រធានវិទ្យាស្ថានជីវសាស្ត្រ វេជ្ជសាស្ត្រ និងកសិកម្មនៃរាជបណ្ឌិត្យសភាកម្ពុជាបានសាទរចំពោះចំណងមិត្តភាពលើវិស័យសុខាភិបាលជាពិសេសការជំរុញឱ្យមានការបន្តគាំទ្រលើកិច្ចការលទ្ធកម្មនូវសម្ភារ និងឱសថសារវន្ត គឺជាកិច្ចការសំខាន់ដែលទាមទារឱ្យមានការជួយឧបត្ថម្ភនិងយកចិត្តទុកដាក់បន្ថែមលើវិស័យសុខាភិបាល។
លោកបានថ្លែងថា៖«ការជួយគាំទ្រនិងការចែករំលែកបទពិសោធន៍ល្អៗលើវិស័យសុខាភិបាលគឺជារឿងសំខាន់ ព្រោះវានឹងឈានទៅជួយលើកស្ទួយលើការពង្រឹងសមត្ថភាពធនធានមនុស្សពិសេសជំនាញបច្ចេកទេសពង្រឹងហេដ្ឋរចនាសម្ព័ន្ធ ពង្រឹងក្រមសីលធម៌វិជ្ជាជីវៈគ្រូពេទ្យ និងការពង្រឹងការស្រាវជ្រាវបន្ថែមឱ្យកាន់តែមានការរីកចម្រើនឡើង»។
នៅក្នុងជំនួបនេះដែរ ទោះមិនទាន់មានការឆ្លើយលើសំណើរបស់រដ្ឋមន្ត្រីក្រសួងសុខាភិបាលពីសំណាក់អង្គការ UNOPS ក្តី ប៉ុន្តែនាឱកាសនោះលោករដ្ឋមន្ត្រី បានថ្លែងស្វាគមន៍ដល់អង្គការ UNOPS ដែលបានសហការគាំទ្រក្រសួងសុខាភិបាល ទាំងការសម្របសម្រួលបច្ចេកទេសនិងហិរញ្ញវត្ថុក្នុងកិច្ចការលទ្ធកម្មនូវសម្ភារនិងឱសថសារវន្ត ក្នុងការចូលរួមចំណែកលើកកម្ពស់សុខុមាលភាពរបស់ប្រជាជនកម្ពុជានាពេលកន្លងមក៕
