មន្ត្រីបោះឆ្នោតចាក់សន្លឹកឆ្នោតរាប់ក្រោយបិទការិយាល័យបោះឆ្នោតព្រឹទ្ធសភា។ ហេង ជីវ័ន
លោក ហង្ស ពុទ្ធា អ្នកនាំពាក្យនៃគណៈកម្មាធិការជាតិរៀបចំការបោះឆ្នោត (គ.ជ.ប ) បានអះអាងថា ការត្រួតពិនិត្យ និងផ្ទៀងផ្ទាត់លទ្ធផលបឋម នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ទាំង ៨ ភូមិភាគ ដែលបានប្រព្រឹត្តទៅកាលពីថ្ងៃទី ២៥ ខែកុម្ភៈ ឆ្នាំ ២០២៤ បានរកឃើញថាមានភាពត្រឹមត្រូវទាំងអស់។
លោកបានបញ្ជាក់បែបនេះ នៅក្រោយពេលដែលក្រុមការងារត្រួតពិនិត្យ និងផ្ទៀងផ្ទាត់របស់ គ.ជ.ប បានបញ្ចប់ការត្រួតពិនិត្យ និងផ្ទៀងផ្ទាត់ឡើងវិញ ដើម្បីបញ្ជាក់ពីភាពត្រឹមត្រូវនូវលទ្ធផលនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ដែលគណៈកម្មការរាជធានី-ខេត្តរៀបចំការបោះឆ្នោត (គធ.ខប) បានបញ្ជូនមក គ.ជ.ប នៅទីស្តីការគ.ជ.ប នៅថ្ងៃទី២៧ ខែកុម្ភៈ ឆ្នាំ២០២៤។
លោក ហង្ស ពុទ្ធា បានបញ្ជាក់ថា សម្រាប់ការការត្រួតពិនិត្យ និងផ្ទៀងផ្ទាត់លទ្ធផលបឋម នៃការបោះឆ្នោត ជ្រើសតាំង សមាជិកព្រឹទ្ធសភា នីតិកាលទី៥ ទាំង៣៣ ការិយាល័យ មានការចូលរួមឃ្លាំមើលពីតំណាងគណបក្សនយោបាយចំនួន ២ គឺគណបក្សប្រជាជនកម្ពុជា និងគណបក្សឆន្ទៈខ្មែរ តំណាងអង្គការក្រៅរដ្ឋាភិបាលចំនួន ៤ ហើយនិងអ្នកយកព័ត៌មានជាច្រើនរូបទៀត។
លោកបានថ្លែងថា៖«លទ្ធផលបានរកឃើញថា ការរាប់សន្លឹកឆ្នោត ហើយនិងការបូកសរុបផ្សេងៗ ព្រមទាំងការបោះឆ្នោត និងរាប់សន្លឹកឆ្នោត គឺមានភាពត្រឹមត្រូវទាំងអស់។ អ៊ីចឹង!ផ្តើមចេញពីនេះ គ.ជ.ប នឹងរៀបចំទៅជាបញ្ជីបោះឆ្នោតបណ្តោះអាសន្ន ហើយបញ្ជីបោះឆ្នោតបណ្តោះអាសន្ននេះ នឹងផ្សព្វផ្សាយជាសាធារណៈ ដើម្បីទុកឱ្យគណបក្សនយោបាយធ្វើការប្តឹង បើមិនសុខចិត្ត ចំពោះលទ្ធផលនៃការបោះឆ្នោតនេះ»។
ជុំវិញបញ្ហានេះដែរ លោកតុប ឫទ្ធី អគ្គនាយកនៃអគ្គនាយកដ្ឋានសេវាកម្មច្បាប់ និងបច្ចេកទេស នៃគ.ជ.បបានប្រាប់ក្រុមអ្នការព័ត៌មាននៅថ្ងៃទី២៧ ខែកុម្ភៈថា ក្រោយពីគណៈកម្មការរាជធានី-ខេត្តរៀបចំការបោះឆ្នោត បានបញ្ជូនលទ្ធផលបឋម ដែលបានត្រួតពិនិត្យនៅតាមរាជធានី-ខេត្តនីមួយៗ គ.ជ.ប បានរៀបចំក្រុមការងារត្រួតពិនិត្យជា ៣ ក្រុមដើម្បីធ្វើការត្រួតពិនិត្យទៅលើទម្រង់ ១១.១០ ទម្រង់ ១១.១១ និងទម្រង់ ១១.១៤។
លោកបានបញ្ជាក់ថា ការត្រួតពិនិត្យ និងផ្ទៀងផ្ទាត់ឡើងវិញនូវលទ្ធផលនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ទៅលើទម្រង់ទាំងនេះពុំមានអ្វីខុសឆ្គងនោះទេ ឃើញថា ត្រឹមត្រូវទាំងអស់។
លោក តុប ឫទ្ធី បានថ្លែងថា៖«ក្រោយការពិនិត្យ និងដាក់ជូនគ.ជ.ប ពិនិត្យ និងសម្រេច យើងនឹងដាក់ផ្សព្វផ្សាយ បណ្តោះអាសន្ន នៅថ្ងៃទី២៩ ខែកុម្ភៈ ឆ្នាំ២០២៤ ខាងមុខនេះ។ ក្រោយពីគ.ជ.ប សម្រេចហើយ យើងនឹងបិទផ្សាយ បណ្តោះអាសន្ន នៅពេលខាងមុខ។ ក្រោយពីប្រកាសលទ្ធផលរួចហើយ យើងទុកឱ្យគណបក្សនយោបាយ ដែលចូលរួម ការបោះឆ្នោត មានសិទ្ធិប្តឹងតវ៉ា ក្នុងរយៈពេល៧២ម៉ោង ប៉ុន្តែបើមិនមានបណ្តឹងទេ គឺគ.ជ.ប នឹងប្រកាសលទ្ធផលផ្លូវការ ទាំងអាសនៈ និងបេក្ខជនជាប់ឆ្នោត»។
បើតាមលោក តុប ឫទ្ធី គណបក្សនយោបាយដែលនាំមុខចំពោះការបោះឆ្នោតជ្រើសតាំងសមាជិកព្រឹទ្ធសភានៅពេលនេះ គឺគណបក្សប្រជាជនកម្ពុជា គ្រប់ភូមិភាគទាំងអស់។
យោងតាមសេចក្តីប្រកាសព័ត៌មានរបស់គ.ជ.បបានឱ្យដឹងថា ក្រុមត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោត នៃគ.ជ.ប ដែលបែងចែកជា ៣ក្រុម បានត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោតតាមភូមិភាគនីមួយៗដោយឡែកពីគ្នាយ៉ាងល្អិតល្អន់ តាមប្រមាណវិធីដោយដៃ និងកម្មវិធីត្រួតពិនិត្យ និងបូកសរុបលទ្ធផលនៃការបោះឆ្នោតតាមមណ្ឌលភូមិភាគ។
ជាលទ្ធផល ក្រុមត្រួតពិនិត្យ មិនបានរកឃើញកំហុស ឬភាពមិនប្រក្រតីណាមួយពាក់ព័ន្ធនឹងការគណនាតួលេខលទ្ធផលសំឡេងឆ្នោតគាំទ្រគណបក្សនយោបាយនីមួយៗដែល គធ.ខប ទាំង ២៥ បានបញ្ជាក់ក្នុងតារាងបូកសរុបលទ្ធផលនៃការបោះឆ្នោតក្នុងរាជធានី-ខេត្ត (ទ.១១១០) កំណត់ហេតុ បូកសរុបលទ្ធផលនៃការបោះឆ្នោតក្នុងរាជធានី-ខេត្ត (ទ.១១១១) និងក្រដាសលទ្ធផលនៃការបោះឆ្នោតក្នុងរាជធានី-ខេត្ត (ទ.១១១៤) ឡើយ។
សេចក្តីប្រកាសបន្តថា ៖ «តាមបទបញ្ជា និងនីតិវិធីសម្រាប់ការបោះឆ្នោត គណបក្សនយោបាយឈរឈ្មោះបោះឆ្នោត ក្នុងភូមិភាគ ឬតំណាងមានសិទ្ធិប្ដឹងតវ៉ាទៅនឹងលទ្ធផលបណ្ដោះអាសន្ននៃការបោះឆ្នោត១ផ្នែក ឬលទ្ធផលទាំងអស់ទៅ គ.ជ.ប ឬក្រុមប្រឹក្សាធម្មនុញ្ញ ក្នុងរយៈពេល ៧២ម៉ោងយ៉ាងយូរ បន្ទាប់ពីការប្រកាសលទ្ធផលបណ្ដោះអាសន្ននៃការបោះឆ្នោត»។
សូមបញ្ជាក់ថា លទ្ធផលបឋម នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលបានប្រព្រឹត្តទៅនាថ្ងៃទី២៥ ខែកុម្ភៈ បានបង្ហាញថា គណបក្សប្រជាជនកម្ពុជា ទទួលបានសំឡេងគាំទ្រយ៉ាងច្រើនលើសលប់នៅក្នុងមណ្ឌលភូមិភាគទាំង ៨ ដោយទទួលបានអាសនៈចំនួន ៥៥ អាសនៈ ដែលមានសំឡេងឆ្នោតសរុបចំនួន ១០ ០៥២ សំឡេង។
គណបក្សឆន្ទៈខ្មែរ ដែលបានចូលរួមការបោះឆ្នោតព្រឹទ្ធសភានេះ ទទួលបានសំឡេងឆ្នោត ១ ៣៩៤សំឡេងទទួលបានអាសនៈចំនួន ៣អាសនៈ។ រីឯគណបក្សហ្វ៊ុនស៊ិនប៉ិច និងគណបក្សកម្លាំងជាតិ មិនទទួលបានអាសនៈនោះទេ៕
