លោកនាយករដ្ឋមន្ត្រី ហ៊ុន ម៉ាណែត និងលោកនាយករដ្ឋមន្ត្រីម៉ាឡេស៊ី ដាតុ ស៊េរី អាន់វ៉ា ប៊ីន អ៊ីប្រាហ៊ីម កាលពីថ្ងៃម្សិលមិញ។ រូបថត STPM
ភ្នំពេញៈ កម្ពុជា និងម៉ាឡេស៊ី បានឯកភាពគ្នាជំរុញកិច្ចសហប្រតិបត្តិការ និងទំនាក់ទំនងទ្វេភាគីឱ្យកាន់តែស៊ីជម្រៅលើវិស័យជាច្រើន ក្នុងនោះមានទាំងសន្តិសុខ និងការពារជាតិ ទេសចរណ៍ បច្ចេកវិទ្យាឌីជីថល ហិរញ្ញវត្ថុ និងសន្តិសុខថាមពល។
ការឯកភាពគ្នានេះត្រូវបានធ្វើឡើងរវាងនាយករដ្ឋមន្ត្រីកម្ពុជា លោក ហ៊ុន ម៉ាណែត និងនាយករដ្ឋមន្ត្រីម៉ាឡេស៊ី លោកដាតុ ស៊េរី អាន់វ៉ា ប៊ីន អ៊ីប្រាហ៊ីម (YB Dato' Seri Anwar Bin Ibrahim) នៅក្នុងជំនួបពិភាក្សាការងារ និងធ្វើសន្និសីទសារព័ត៌មានរួមគ្នា ក្រោយជំនួបទ្វេភាគីនាឱកាសលោកហ៊ុន ម៉ាណែត បានទៅបំពេញទស្សនកិច្ចផ្លូវការនៅប្រទេសម៉ាឡេស៊ី នាថ្ងៃទី ២៧ ខែកុម្ភៈ ឆ្នាំ ២០២៤។
នៅក្នុងសុន្ទរកថានាសន្និសីទសារព័ត៌មានរួមគ្នានាថ្ងៃដដែលនោះនាយករដ្ឋមន្ត្រីទាំង ២ បានឯកភាពគ្នាជំរុញទំនាក់ទំនងទ្វេភាគី ឱ្យកាន់តែរឹងមាំថែមទៀត ខណៈទំនាក់ទំនងនេះមានភាពវិជ្ជមានស្រាប់តាំងពីសម័យរដ្ឋាភិបាលដែលដឹកនាំដោយអតីតនាយករដ្ឋមន្ត្រី លោកហ៊ុន សែន ដែលនឹងបន្តជំរុញដើម្បីផលប្រយោជន៍ទៅវិញទៅមក។
លោក ហ៊ុន ម៉ាណែត ថ្លែងថា៖ «តាមរយៈការធ្វើទស្សនកិច្ចផ្លូវការរបស់ឯកឧត្តមនាយករដ្ឋមន្ត្រីដាតុ ស៊េរី អាន់វ៉ា ប៊ីន អ៊ីប្រាហ៊ីមកាលពីខែមីនា ឆ្នាំមុន[ទស្សនកិច្ចទៅកម្ពុជា] និងដំណើរទស្សនកិច្ចផ្លូវការរបស់ខ្ញុំ នាឱកាសនេះ នឹងរួមចំណែកក្នុងការធ្វើឱ្យទំនាក់ទំនងដ៏យូរលង់រវាងកម្ពុជា-ម៉ាឡេស៊ី កាន់តែស៊ីជម្រៅថែមទៀត»។ លោកបន្តថា ឆ្នាំនេះគឺជាខួបលើកទី ៦៧ នៃទំនាក់ទំនងរវាងប្រទេសទាំង ២ ហើយក្នុងរយៈពេលប៉ុន្មានឆ្នាំមកនេះ ទំនាក់ទំនងនេះបានកើនឡើងដល់កម្រិតថ្មីនៅក្នុងលក្ខខណ្ឌនៃទំនាក់ទំនងសេដ្ឋកិច្ច អន្តរកម្មកម្រិតខ្ពស់ ការផ្លាស់ប្តូររវាងប្រជាជន និងប្រជាជន និងការពង្រឹងទំនាក់ទំនងលើវិស័យការពារជាតិ។
លោក ហ៊ុន ម៉ាណែត បញ្ជាក់ថា៖ «ក្នុងជំនួបរវាងខ្ញុំ និងឯកឧត្តមនាយករដ្ឋមន្ត្រី បានកត់សម្គាល់នូវការពេញចិត្ត និងការបោះជំហានជាវិជ្ជមានចាប់តាំងពីដំណើរទស្សនកិច្ចផ្លូវការរបស់ឯកឧត្តម អាន់វ៉ា មកកាន់ប្រទេសកម្ពុជាកាលពីខែមីនា ឆ្នាំ ២០២៣ កន្លងទៅ»។ តាមរយៈជំនួបពិភាក្សានេះ បានដាក់ចេញនូវយុទ្ធសាស្ត្រថ្មី ដើម្បីពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំង ២ លើវិស័យចាំបាច់មួយចំនួន។
យោងតាមខ្លឹមសារនៃជំនួបទ្វេភាគី បានឱ្យដឹងថា លោក ហ៊ុន ម៉ាណែត និងនាយករដ្ឋមន្ត្រីម៉ាឡេស៊ី មានសុទិដ្ឋិនិយមថា ទំនាក់ទំនងរវាងកម្ពុជា-ម៉ាឡេស៊ី នឹងកាន់តែរឹងមាំ និងអាចឈានដល់កម្រិតទំនាក់ទំនងខ្ពស់បន្ថែមទៀត។ ខ្លឹមសារដដែលបន្តថា លោក ដាតុ ស៊េរី អាន់វ៉ា ប៊ីន អ៊ីប្រាហ៊ីម បានស្វាគមន៍ចំពោះការអញ្ជើញមកបំពេញទស្សនកិច្ចផ្លូវការនៅប្រទេសម៉ាឡេស៊ីក្នុងនាមជានាយករដ្ឋមន្ត្រីរបស់លោក ហ៊ុន ម៉ាណែត និងគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា។
ទន្ទឹមនឹងនេះលោកនាយករដ្ឋមន្ត្រីម៉ាឡេស៊ី ក៏បានបញ្ជាក់ដែរថា តាមរយៈដំណើរទស្សនកិច្ចផ្លូវការរបស់លោក ហ៊ុន ម៉ាណែត នាឱកាសនេះ ទំនាក់ទំនងទ្វេភាគីកម្ពុជា-ម៉ាឡេស៊ី នឹងកាន់តែរីកចម្រើន និងរឹងមាំបន្ថែមទៀត។
ខ្លឹមសារនៃជំនួបបានបង្ហាញឱ្យដឹងទៀតថា សមភាគីទាំង ២ បានវាយតម្លៃខ្ពស់លើលទ្ធផលនៃកិច្ចសហប្រតិបត្តិការទ្វេភាគីកន្លងមក និងបានផ្លាស់ប្ដូរយោបល់ពីការពង្រឹង និងពង្រីកកិច្ចសហប្រតិបត្តិការ លើវិស័យជាច្រើន ដែលរួមមាន៖ វិស័យនយោបាយ ការពារជាតិ សន្តិសុខ ពាណិជ្ជកម្ម និងវិនិយោគ ទេសចរណ៍ ការងារ ឧស្សាហកម្មអាហារហាឡាល់ ទូរគមនាគមន៍ និងបច្ចេកវិទ្យាព័ត៌មាន បច្ចេកវិទ្យាឌីជីថល និងសន្តិសុខថាមពល។
ក្នុងជំនួបនេះ សមភាគីទាំង ២ ក៏បានពិភាក្សាក្នុងការពិនិត្យលទ្ធភាពពង្រីកជើងហោះហើរផ្ទាល់ពីម៉ាឡេស៊ីទៅកាន់តំបន់ទេសចរណ៍សំខាន់ៗកម្ពុជា ដូចជាខេត្តសៀមរាប ផងដែរ។ នេះបើយោងតាមខ្លឹមសារនៃជំនួបទ្វេភាគីដដែលនេះ។ ប្រភពដដែលបានបន្តថា ក្នុងក្របខ័ណ្ឌ នៃវិស័យការពារជាតិ និងសន្ដិសុខ សមភាគីទាំង ២ បានឯកភាពលើការបន្តជំរុញកិច្ចសហប្រតិបត្តិការរួមមាន៖ ការបណ្តុះបណ្តាលធនធានមនុស្ស ការកសាងសមត្ថភាព ការផ្លាស់ប្តូរព័ត៌មាន និងការធ្វើលំហាត់រួមគ្នា។
ដោយឡែក លើវិស័យសន្តិសុខថាមពល សមភាគីទាំង ២ ក៏បានឯកភាពក្នុងការគាំទ្រការសម្របសម្រួលសម្រាប់គម្រោងខ្សែបញ្ជូនថាមពលក្រោមសមុទ្រ (ឡាវ-កម្ពុជា-សិង្ហបុរី) ដោយឆ្លងកាត់បាតសមុទ្ររបស់ប្រទេសម៉ាឡេស៊ី។
ជាងនេះទៅទៀត សមភាគីទាំង ២ បានឯកភាពក្នុងការពិនិត្យលទ្ធភាព រៀបចំកិច្ចប្រជុំ នៃគណៈកម្មការចម្រុះកិច្ចសហប្រតិបត្តិការទ្វេភាគី (JCBC) នាពេលខាងមុខដែលដឹកនាំដោយរដ្ឋមន្ត្រីការបរទេសនៃប្រទេសទាំង ២។
ជុំវិញទំនាក់ទំនងកម្ពុជា និងម៉ាឡេស៊ី លោក សេង វណ្ណលី សាស្ត្រាចារ្យផ្នែកទំនាក់ទំនងអន្តរជាតិ លើកឡើងថា ដំណើរទស្សនកិច្ចរបស់លោកហ៊ុន ម៉ាណែតនេះបង្ហាញពីការយកចិត្តទុកដាក់របស់លោកលើទំនាក់ទំនងជាមួយម៉ាឡេស៊ី ជាពិសេសជាមួយរដ្ឋាភិបាលលោកអាន់វ៉ា ដោយអាចមានការពង្រឹងទំនាក់ទំនងរវាងបុគ្គលនិងបុគ្គលផង។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា និងជាអ្នកជំនាញវិទ្យាសាស្ត្រនយោបាយថ្លែងថា ការបំពេញទស្សនកិច្ចនេះជាការសម្តែងការគួរសមផង ជាការរឹតចំណងការទូត ហើយក៏ជាបែបបទប្រូតូកូលពិធីការរបស់អាស៊ានផងដែរ។
លោកបន្តថា៖ «ការបំពេញទស្សនកិច្ចនេះបានផ្តល់នូវសារៈសំខាន់ទាំងកិច្ចការនយោបាយ សន្តិសុខនយោបាយ ពាណិជ្ជកម្ម និងសង្គមផ្សេងទៀត។ យើងឃើញថា សណ្តាប់ធ្នាប់ពិភពលោកបច្ចុប្បន្ននេះកំពុងជំរុញឱ្យមានទំនាក់ទំនងល្អរវាងរដ្ឋ និងរដ្ឋ ដូចគ្នានេះដែរម៉ាឡេស៊ីនិងកម្ពុជានេះគឺជាចំណុចពង្រឹងកិច្ចសហប្រតិបត្តិការដើម្បីធានាឱ្យបាននូវសន្តិសុខសណ្តាប់ធ្នាប់ក្នុងតំបន់ និងពិភពលោកផងដែរ»៕
