រថយន្ត និងអ្នកបើកបរបង្កគ្រោះថ្នាក់។ រូបថត ហ្វេសប៊ុក
បុរសជនជាតិវៀតណាមម្នាក់ ត្រូវសមត្ថកិច្ចក្រុងតាខ្មៅបញ្ជូនទៅតុលាការនៅរសៀលថ្ងៃទី ២៦ កុម្ភៈ បន្ទាប់ពីបង្កគ្រោះថ្នាក់ចរាចរណ៍កាលពីរសៀលថ្ងៃទី ២៤ ខែកុម្ភៈ បណ្តាលឱ្យមនុស្សរបួសធ្ងន់ស្រាល ២៩ នាក់ នៅតាមបណ្តោយផ្លូវជាតិលេខ ២១ ស្ថិតក្នុងសង្កាត់រកាខ្ពស់ ក្រុងតាខ្មៅ ខេត្តកណ្តាល។
លោក ភឿង វ៉ាត អធិការរងទទួលផែនចរាចរណ៍នៃអធិការដ្ឋាននគរបាលក្រុងតាខ្មៅប្រាប់នៅថ្ងៃទី ២៦ កុម្ភៈថា ជនសង្ស័យម្នាក់នោះអាយុ ៣៩ ឆ្នាំត្រូវសមត្ថកិច្ចជំនាញកសាងសំណុំរឿងបញ្ជូនទៅតុលាការខេត្តកណ្តាលនៅរសៀលថ្ងៃទី ២៦ កុម្ភៈ។ដោយសារតែគាត់ជាជនជាតិវៀតណាម ហើយមិនចេះភាសាខ្មែរផងនោះហេតុដូច្នេះហើយ សមត្ថកិច្ចជំនាញចរាចរណ៍កំពុងតែដំណើរការនីតិវិធីស្រាវជ្រាវបន្តទៀត។
លោកថ្លែងថា៖ «បុរសសង្ស័យមិនមានជាតិអាល់កុលក្នុងឈាមទេ រីឯរថយន្តក៏មិនទាន់ដឹងថា ជាកម្មសិទ្ធិរបស់គាត់ឬក៏គាត់ខ្ចីគេដែរ ខ្ញុំកំពុងស្រាវជ្រាវបន្តទៀត។ ជនសង្ស័យត្រូវបញ្ជូនទៅតុលាការនៅរសៀលថ្ងៃនេះ (ថ្ងៃទី ២៦ កុម្ភៈ) ហើយ»។
លោក ឃុន ណារិទ្ធ នាយនគរបាលប៉ុស្តិ៍រកាខ្ពស់ ក្រុងតាខ្មៅឱ្យ ភ្នំពេញ ប៉ុស្តិ៍ ដឹងថា កាលពី វេលាម៉ោងជាង ៤ រសៀលថ្ងៃទី ២៤ ខែកុម្ភៈ មានរថយន្ត១គ្រឿងម៉ាកហ្វតពណ៌ក្រហមពាក់ស្លាកលេខខេមរភូមិន្ទ 2-1862 បើកបរពីទិសត្បូងទៅទិសខាងជើង។លុះបើកមកដល់ចំណុចកើតហេតុតាមបណ្តាយផ្លូវជាតិលេខ ២១ ក្នុងភូមិសាស្ត្រសង្កាត់រកាខ្ពស់ ក៏បានបុករះរ៉ឺម៉កម៉ូតូ ១ គ្រឿង ស្របទិសគ្នាបណ្តាលឱ្យ ស្ត្រីជិះលើរ៉ឺម៉កចំនួន ២២ នាក់ទៀតប៉ើងធ្លាក់ពីរ៉ឺម៉កក្នុងនោះមាន ៣ នាក់បាក់ដៃ និងបាក់ជើងក្រៅពីនោះរបួសស្រាលៗទេ។ បន្ទាប់មករថយន្តក៏បានជ្រុលទៅបុកផាសអាប់ ១ គ្រឿង និងម៉ូតូ ១ គ្រឿងទៀត បណ្តាលឱ្យមនុស្សប្រុសស្រី៧នាក់ទៀតរបួសស្រាល។
លោកបន្តថា ក្រោយហេតុការណ៍ គឺបុរសអ្នកបើករថយន្តមិនបានបើករថយន្តគេចឡើយ ហើយភ្លាមៗនោះកម្លាំងសមត្ថកិច្ចបានចុះទៅដល់កន្លែងកើតហេតុនិងបានឃាត់ជនសង្ស័យ។ពេលនោះសមត្ថកិច្ចបានពិនិត្យជាតិអាល់កុលនៅក្នុងឈាមរបស់ជនបង្កតែមិនឃើញមានជាតិអាល់កុលទេ។ប៉ុន្តែមូលហេតុមកពីពេលកំពុងបើករថយន្តគឺគាត់ងងុយដេក ងោក។
លោកថ្លែងថា៖ «ជំហានដំបូងកម្លាំងយើងសង្ស័យថា គាត់ស្រវឹងតែពេលពិនិត្យមើលទៅអត់មានជាតិអាល់កុលទេ។គាត់អត់ស្រវឹងទេហើយប្រាប់គេនៅកន្លែងកើតហេតុថា គាត់អត់ងងុយពីយប់»។
កាលពីថ្ងៃទី ២២ ខែកុម្ភៈ ឆ្នាំ ២០២៤ ករណីដូចគ្នានេះដែរដោយមានបុរសជនជាតិចិនម្នាក់បានបើករថយន្ត ម៉ាកឡិចស៊ីសពណ៌ខ្មៅ ១ គ្រឿង ពាក់ស្លាកលេខខេមរភូមិន្ទ 2-4572 បានបើកគេចពីនគរបាលចរាចរណ៍ក្នុងក្រុងព្រះសីហនុ ខេត្តព្រះសីហនុ។ បន្ទាប់មកសមត្ថកិច្ចបានតាមស្រាវជ្រាវរកឃើញរថយន្តនោះប្លុងចោលក្នុងបរិវេណអតីតសាលាខេត្តព្រះសីហនុចាស់។
ជុំវិញជនរបរទេសប្រើប្រាស់រថយន្តពាក់ស្លាកលេខខេមរភូមិន្ទនេះ ភ្នំពេញ ប៉ុស្តិ៍ នៅថ្ងៃទី ២៦ ខែកុម្ភៈ បានទូរស័ព្ទទំនាក់ទំនងលោកឈុំ សុជាត អ្នកនាំពាក្យក្រសួងការពារជាតិដើម្បីសុំការពន្យល់តែទូរស័ព្ទរបស់លោកគ្មានអ្នកទទួលឡើយ៕
