លោកស្រី ប៊ុន រ៉ានី និងសេចក្ដីប្រកាសរបស់កាកបាទក្រហមកម្ពុជា ។ រូបថត CRC
ភ្នំពេញៈមន្ត្រីជាន់ខ្ពស់កាកបាទក្រហមកម្ពុជា បានអះអាងថា ទិវាពិភពលោកកាកបាទក្រហម អឌ្ឍចន្ទក្រហមខួបលើក ១៦១ នៅឆ្នាំនេះ គឺធ្វើឡើងក្រោមគោលបំណងធំៗចំនួន៣ ដែលពិធីនេះនឹងត្រូវប្រារព្ធនៅថ្ងៃទី៨ ខែឧសភា២០២៤ ខាងមុខក្រោមប្រធានបទ«រួមគ្នាជាមួយកាកបាទក្រហមកម្ពុជាដើម្បីសហគមន៍មានសុខភាពល្អនិងមានភាពធន់នឹងអាកាសធាតុ»។
ការអះអាងនេះធើ្វឡើងតាមរយៈបទសម្ភាសន៍របស់លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជាជាមួយអ្នកសារព័ត៌មានក្រោយបញ្ចប់កិច្ចប្រជុំស្ដីពីការរៀបចំខួបលើកទី១៦១ទិវាពិភពលោកកាកបាទក្រហមនិងអឌ្ឍចន្ទក្រហម ៨ ឧសភា ឆ្នាំ២០២៤ នៅស្នាក់ការកាកបាទក្រហមកម្ពុជាកាលថ្ងៃទី២៧ ខែកុម្ភៈ ឆ្នាំ២០២៤។
លោកស្រី ម៉ែន នារីសោភ័គ បានឱ្យដឹងថា ប្រធានបទ«រួមគ្នាជាមួយកាកបាទក្រហមកម្ពុជាដើម្បីសហគមន៍មានសុខភាពល្អនិងមានភាពធន់នឹងអាកាសធាតុ»សម្រាប់ទិវានេះគឺជាការឆ្លើយតបនឹងបញ្ហាប្រឈមនៅក្នុងពេលបច្ចុប្បន្នដែលប្រជាជាតិកំពុងជួបប្រទះ។
លោកស្រីបានមានប្រសាសន៍ថា៖«ទិវានេះគឺបានរៀបចំឡើងក្នុងគោលបំណងធំៗចំនួន៣គឺ១-ដើម្បីរំឭកដល់ខួបនៃការបង្កើតចលនាអន្តរជាតិកាកបាទក្រហមនិងអឌ្ឍចន្ទក្រហម,ទី២-ជាឱកាសផ្សព្វផ្សាយបង្ហាញពីសមិទ្ធផលវឌ្ឍនភាព បេសកកម្មមនុស្សធម៌របស់កាកបាទក្រហមកម្ពុជាក្នុងរយៈពេល១ឆ្នាំកន្លងមកដែលយើងបានប្រើប្រាស់ថវិការបស់សប្បុរសជនជូនសាធារណជនជាតិ និងអន្តរជាតិបានដឹង»។
លោកស្រី បានបន្ថែមថា ចំណែកទី៣-បន្តការអំពាវនាវដើម្បីឱ្យសប្បុរសជនបន្តចូលរួមឧបត្ថម្ភគាំទ្រជាស្មារតី សម្ភារ និងថវិកាជូនដល់កាកបាទក្រហមកម្ពុជាដើម្បីបន្តបេសកកម្មមនុស្សធម៌ឆ្លើយតបនឹងភាពងាយរងគ្រោះនៅក្នុងប្រទេស។
លោកស្រី ម៉ែន នារីសោភ័គ បានបញ្ជាក់ទៀតថា តាមរយៈគោលបំណងនៃទិវាដែលបានដាក់ចេញនេះ កាកបាទក្រហមកម្ពុជានឹងយកឱកាសនោះផ្សព្វផ្សាយទៅដល់សហគមន៍ឱ្យកាន់តែទូលាយពីការលើកកម្ពស់អនាម័យ អាហារូបត្ថម្ភការលើកទឹកចិត្តពីការធ្វើលំហាត់ប្រាណការថែទាំសុខភាពបឋមនិងលើកកម្ពស់ការចូលរួមរបស់សហគមន៍ដើម្បីចូលរួមកាត់បន្ថយការប្រែប្រួលអាកាសធាតុជាដើម។
ជាមួយគ្នានោះ លោកស្រី អ៊ុក ម៉ាលី អគ្គហេរញ្ញិកកាកបាទក្រហមកម្ពុជា ក៏បានលើកឡើងដែរថា អង្គប្រជុំបានពិនិត្យ ពិភាក្សានិងអនុម័តលើឯកសារមួយចំនួនដូចជា ឯកសារទស្សនទាន,សេចក្តីប្រកាសព័ត៌មាន,ខ្លឹមសារបដានិងពាក្យស្លោក និងការងារផ្សេងៗដើម្បីឈានទៅដំណើរការរៀបចំទិវាពិភពលោកកាកបាទក្រហម អឌ្ឍចន្ទក្រហមនាឆ្នាំនេះ។
លោកស្រីបានឱ្យដឹងថា៖«ទិសដៅសំខាន់នៃប្រធានបទសម្រាប់រៀបចំទិវានៅឆ្នាំនេះក៏ជាការចូលរួមកសាងសហគមន៍នានាឱ្យទៅជាសហគមន៍ដែលមានសមត្ថភាពទ្រាំទ្របានឬធន់ទ្រាំបាននិងបន្សាំបានទៅនឹងបញ្ហាប្រឈមនានាដែលជារួមមាន សុខភាពផ្លូវកាយ-ផ្លូវចិត្តនៅក្នុងជីវិតរស់នៅប្រចាំថ្ងៃដែលបង្កដោយផលប៉ះពាល់ពីសង្គ្រាម, វិបត្តិសេដ្ឋកិច្ចសកលលោកនិងការប្រែប្រួលអាកាសធាតុផងដែរ»។
តាមរយៈសកម្មភាពអនុវត្តខ្លឹមសារប្រធានបទនេះ កាកបាទក្រហមកម្ពុជារំពឹងថានឹងសម្រេចបានសហគមន៍មួយដែលមានវឌ្ឍនភាពជានិរន្តរ៍,ពលរដ្ឋម្នាក់ៗរស់នៅទីនោះមានសុខភាពល្អទាំងផ្លូវកាយ ផ្លូវចិត្ត និងមានសមត្ថភាពដឹកនាំគ្រប់គ្រងក្នុងការបង្ការ ការឆ្លើយតប និងស្តារឡើងវិញ ក្រោយមានស្ថានភាពមិនអំណោយផលផ្សេងៗបង្កដោយការប្រែប្រួលអាកាសធាតុនិងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត។
ជាងនេះទៀត បើយោងតាមសេចក្តីប្រកាសព័ត៌មានរបស់កាកបាទក្រហមកម្ពុជា បានឱ្យដឹងដែរថា ក្នុងការកាត់បន្ថយភាពក្រីក្រ ការលើកកម្ពស់វិស័យសុខភាពសាធារណៈនិងការពង្រឹងភាពធន់របស់សហគមន៍ទៅនឹងការប្រែប្រួលអាកាសធាតុកាកបាទក្រហមកម្ពុជាត្រូវការចាំបាច់នូវការជួយឧបត្ថម្ភគាំទ្រពីសប្បុរសជនគ្រប់មជ្ឈដ្ឋានដើម្បីធានាបន្តនិរន្តរភាពការងាររបស់ខ្លួន។
កាកបាទក្រហមកម្ពុជា ក៏បានអំពាវនាវដល់សាធារណជនទាំងអស់ សូមបន្តចូលរួមបរិច្ចាគថវិកា សម្ភារជូនកាកបាទក្រហមកម្ពុជាដើម្បីឱ្យសមាគមជាតិមានធនធាន និងលទ្ធភាពគ្រប់គ្រាន់ក្នុងការបន្តផ្តល់សេវាកម្មមនុស្សធម៌ជួយដល់ជនរងគ្រោះ និងជនងាយរងគ្រោះបំផុត ប្រកបដោយបរិយាបន្ន៕
