លោក ជិន ប៊ុនធឿន និងលោកស្រី អាគីកូ សាសាគី ក្នុងពិធីចុះហត្ថលេខាលើអនុស្សរណៈនៅថ្ងៃទី២៨ កុម្ភៈ។ រូបថត កាកបាទក្រហមកម្ពុជា
ភ្នំពេញៈសាខាកាកបាទក្រហមរាជធានីភ្នំពេញ និងអង្គការចំនួន ២ បានចុះអនុស្សរណៈនៃការយោគយល់គ្នា (MoU) ដើម្បីរួមសហការលើកកម្ពស់សុវត្ថិភាពចរាចរណ៍នៅតំបន់ជាប់ព្រំប្រទល់រាជធានីភ្នំពេញ ដើម្បីឈានទៅ កាត់បន្ថយអត្រាគ្រោះថ្នាក់ និងអត្រាស្លាប់បណ្តាលមកពីគ្រោះថ្នាក់ចរាចរណ៍ឱ្យកាន់តែមានប្រសិទ្ធភាព។
ពិធីចុះហត្ថលេខានេះ បានរៀបចំឡើងកាលថ្ងៃទី២៨ ខែ កុម្ភៈ ឆ្នាំ២០២៤ រវាងលោក ជិន ប៊ុនធឿន នាយកប្រតិបត្តិសាខាកាកបាទក្រហមរាជធានីភ្នំពេញ ជាមួយលោកស្រី អាគីកូ សាសាគី នាយិកាប្រតិបត្តិអង្គការសាយបាយសាយ អ៊ិនធឺណេសិនណល (SBSI) និងលោក គង់ សុវណ្ណ ស្ថាបនិកអង្គការទ្រទ្រង់សុវត្ថិភាពកម្ពុជា (CAMSAFE)។
MoU នេះ មានគោលបំណងបង្កើតភាពជាដៃគូក្នុងស្រុក និងអន្តរជាតិ ដើម្បីអនុវត្តគម្រោងឬកម្មវិធីប្រកបដោយប្រសិទ្ធភាពខ្ពស់ឆ្ពោះដល់ការលើកកម្ពស់សុវត្ថិភាពចរាចរណ៍ ការឆ្លើយតបក្រោយហេតុការណ៍គ្រោះថ្នាក់ចរាចរណ៍ និងសុខភាពសាធារណៈសម្រាប់គ្រប់ប្រជាពលរដ្ឋ និងភ្ញៀវទេសចរ នៅក្នុងរាជធានីភ្នំពេញ ក៏ដូចជាតំបន់ជាប់ព្រំប្រទល់រាជធានីភ្នំពេញ។ អនុស្សរណៈលើកកម្ពស់សុវត្ថិភាពចរាចរណ៍នេះនឹងចាប់ផ្តើមអនុវត្តចាប់ពីខែមីនា ឆ្នាំ២០២៤ រហូតដល់ខែមីនា ឆ្នាំ២០២៦ ខាងមុខ។នេះបើយោងតាមហ្វេសប៊ុករបស់កាកបាទក្រហមកម្ពុជា ។
លោក ជិន ប៊ុនធឿន បានថ្លែងថា អនុស្សរណៈនាពេលនេះ គឺបានបង្ហាញឱ្យឃើញពីឆន្ទៈ ការប្តេជ្ញាចិត្តឱ្យកាន់តែសកម្ម ស៊ីជម្រៅថែមទៀត ក្នុងការសហការជាមួយអង្គការទាំង២ក្នុងការអនុវត្តសេវាកម្មមនុស្សធម៌រួមមាន ការឆ្លើយតប ការត្រៀមបង្ការគ្រោះមហន្តរាយ ការការពារគ្រោះថ្នាក់និងការរងរបួស ការថែរក្សាសុខភាព និងការផ្សព្វផ្សាយសម្រាប់ប្រជាពលរដ្ឋឱ្យបានកាន់តែទូលំទូលាយថែមទៀត។
លោកបានបញ្ជាក់ថា កិច្ចសហការរួមគ្នានេះនឹងជាផ្នែកមួយដើម្បីលើកកម្ពស់សុវត្ថិភាពចរាចរណ៍និងការឆ្លើយតបការសង្គ្រោះក្រោយហេតុការណ៍គ្រោះថ្នាក់ចរាចរណ៍និងសុខភាពសាធារណៈ។
នាឱកាសនោះលោកស្រី អាគីកូ សាសាគី បានឱ្យដឹងថា អង្គការ SBSI ជាអង្គការមិនរកប្រាក់ចំណេញមួយ បង្កើតឡើងនៅឆ្នាំ១៩៨៥ មានការិយាល័យកណ្ដាលរបស់ខ្លួននៅទីក្រុងតូក្យូប្រទេសជប៉ុន និងមានបេសកកម្មក្នុងជំនួយមនុស្សធម៌និងផ្គត់ផ្គង់សម្ភារបរិក្ខារ។ជាមួយគ្នានេះលោកស្រីបានថ្លែងអំណរគុណចំពោះកាកបាទក្រហមភ្នំពេញដែលតែងតែផ្តល់នូវការសហការយ៉ាងល្អជាមួយអង្គការរហូតដល់រួមគ្នាចុះហត្ថលេខាលើអនុស្សរណៈនាពេលនេះ។
ទន្ទឹមគ្នានេះ លោក គង់ សុវណ្ណ ស្ថាបនិកអង្គការ CAMSAFE បានឱ្យដឹងថា អង្គការលោក គឺជាអង្គការមួយក្នុងប្រទេសកម្ពុជាដែលមិនស្វែងរកប្រាក់ចំណេញមានគោលដៅដើម្បីទប់ស្កាត់ការស្លាប់និងរបួសដោយគ្រោះថ្នាក់ចរាចរណ៍លើកកម្ពស់ភាពធន់និងការប្រែប្រួលបរិស្ថាននិងលើកកម្ពស់សុខភាពសាធារណៈនៅកម្ពុជា។
លោកបានរំពឹងថា៖ «តាមរយៈMoU នេះ ជឿជាក់ថាកុមារ យុវវ័យ និងស្ត្រីគឺជាភ្នាក់ងារមានឥទ្ធិពលខ្ពស់ក្នុងការធ្វើឱ្យមនុស្សជាតិគ្រប់រូបក្នុងពិភពលោកមានសុខភាពល្អ» ។
គួរជម្រាបថា ក្នុងឆ្នាំ២០២៣ គ្រោះថ្នាក់ចរាចរណ៍កើតឡើងសរុប ៣ ៣១៧ លើក បណ្តាលឱ្យមនុស្សស្លាប់ចំនួន១ ៥៩០នាក់ និងរបួស ៤ ៥១៥ នាក់។ បើគិតក្នុងឆ្នាំ២០២៣ ធៀបនឹងឆ្នាំ២០២២ គ្រោះថ្នាក់ចរាចរណ៍មានការកើន ៣៤១ លើកស្មើ ១១ ភាគរយ ប៉ុន្តែចំនួនអ្នកស្លាប់ថយចុះ ១១៩ នាក់ស្មើ ៧ ភាគរយ និងចំនួនអ្នករបួសកើន ៤៨៩ នាក់ ស្មើ ១២ ភាគរយ។នេះបើយោងតាមរបាយការណ៍អនុគណៈកម្មការទី២ នៃគណៈកម្មាធិការជាតិសុវត្ថិភាពចរាចរណ៍ផ្លូវគោកចេញផ្សាយកាលពីខែមករា ឆ្នាំ២០២៤៕
