អគារទីស្តីការក្រសួងអប់រំ យុវជន និងកីឡា។ ហុង មិនា
ក្រសួងអប់រំ យុវជន និងកីឡា ចេញសេចក្ដីបំភ្លឺ ជុំវិញករណីកៀរគរថវិកាសប្បុរសជន ដើម្បីគាំទ្របន្ថែមដល់ដំណើរការសាលារៀននៅតាមគ្រឹះស្ថានសិក្សាសាធារណៈ ខណៈក្រសួងបញ្ជាក់បន្ថែមថា ហាមឃាត់ដាច់ខាតការតម្រូវឱ្យប្រមូលថវិកាពីសិស្ស មាតាបិតា អ្នកអាណាព្យាបាល ខុសពីគោលការណ៍ណែនាំ។
ការចេញបំភ្លឺនេះ បន្ទាប់ពីមានការលើកឡើងរបស់សារព័ត៌មានមួយចំនួន ជុំវិញករណីការស្នើឱ្យមាតាបិតា អ្នកអាណាព្យាបាលសិស្សចូលរួមថវិកាសម្រាប់គាំទ្របន្ថែមលើដំណើរការសាលារៀន នៅតាមគ្រឹះស្ថានសិក្សាសាធារណៈ នៅរាជធានីភ្នំពេញ ដូចជាការចូលរួមបង់ថ្លៃទឹក ភ្លើង សំរាម ក្នុងមួយឆ្នាំសិក្សាប្រមាណពី ១ ម៉ឺនទៅ ៣ ម៉ឺនរៀល។
សេចក្តីបំភ្លឺរបស់ក្រសួងអប់រំ ចុះថ្ងៃទី ២ ខែកុម្ភៈ ឆ្នាំ ២០២៤ បានឱ្យដឹងថា កន្លងមកដោយមានសំណូមពរពីមាតាបិតា អ្នកអាណាព្យាបាល និងសិស្សានុសិស្សក្នុងការបំពាក់ កង្ហារ បន្ទប់ម៉ាស៊ីនត្រជាក់ បន្ទប់កុំព្យូទ័រ បន្ទប់ពិសោធន៍ ការបង្រៀនបែបឌីជីថល ការរៀបចំបរិស្ថានបៃតង និងលើកកម្ពស់អនាម័យផាសុកភាពនៅសាលារៀន ធ្វើឱ្យចំណាយលើការបង់ថ្លៃអគ្គិសនី ទឹក និង សំរាម មានការកើនឡើង ដែលនាំឱ្យថវិកាដំណើរការសាលារៀនមិនអាចទ្រទ្រង់ទំហំចំណាយនេះរួចដែលជាមូលហេតុនៃការសម្រេចរបស់គណៈកម្មការគ្រប់គ្រងសាលារៀន ក្នុងការស្វែងរកថវិកាបន្ថែមពី សប្បុរសជន និងការចូលរួមឧបត្ថម្ភដោយស្ម័គ្រចិត្តពីមាតាបិតា អ្នកអាណាព្យាបាល។
យ៉ាងណាមិញ ក្រសួងអប់រំ បានគូសបញ្ជាក់ថា៖ «ក្នុងការអនុវត្តភាពជាដៃគូរដ្ឋ និងសហគមន៍ក្នុងវិស័យអប់រំ មុននឹងកៀរគរថវិកាអ្វីមួយ គឺតម្រូវឱ្យមានការប្រជុំ ពិភាក្សា ឯកភាពពីគណៈកម្មការគ្រប់គ្រងសាលារៀន មាតាបិតា និងអ្នកអាណាព្យាបាល សិស្សយ៉ាងតិចសំឡេងគាំទ្រឱ្យបានលើសពី ៨០% ទើបអាចចាត់ទុកជាផ្លូវការ ដោយមានកំណត់ហេតុច្បាស់លាស់ទុកទៅទីចាត់ការសាលារៀន»។
ក្រសួងបន្ថែមថា ថវិកាទាំងអស់ដែលទទួលបានស្ថិតក្រោមការគ្រប់គ្រង និងប្រើប្រាស់ប្រកបដោយតម្លាភាព តាមរយៈការសម្រេចពីគណៈកម្មការគ្រប់គ្រងសាលារៀន ក្នុងគោលដៅកែលម្អលទ្ធផលសិស្សានុសិស្ស។ ចំពោះគ្រួសារសិស្សដែលពុំមានលទ្ធភាពវិញ ត្រូវបានលើកលែងពីការចូលរួមបដិភាគគ្រប់ប្រភេទ ក្នុងការគាំទ្រដល់ដំណើរការកែលម្អការរៀន និងបង្រៀន។
សេចក្តីបំភ្លឺបន្ថែមថា ក្រសួងបាននិងកំពុងអនុវត្តនូវអធិការកិច្ចនៅតាមគ្រឹះស្ថានសិក្សា ដើម្បីពង្រឹងដល់ដំណើរការ អភិបាលកិច្ចសាលារៀន និងលើកកម្ពស់ប្រសិទ្ធភាពនៃការប្រើប្រាស់ថវិកាដំណើរការសាលា ដែលរួមមានថវិកាទទួលបានពីរដ្ឋ និងការចូលរួមពីសប្បុរសជន មាតាបិតា អ្នកអាណាព្យាបាល និងសហគមន៍ ប្រកបដោយតម្លាភាព និងគណនេយ្យភាពឆ្ពោះទៅលើកកម្ពស់លទ្ធផលសិក្សារបស់សិស្ស ការផ្លាស់ប្តូរ វប្បធម៌សាលារៀន ការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់ បុគ្គលិកអប់រំ និងសិស្សានុសិស្ស។
សេចក្តីបំភ្លឺឱ្យដឹងទៀតថា គោរពតាមគោលការណ៍ណែនាំពីក្រសួង ទៅមន្ទីរអប់រំ យុវជន និងកីឡារាជធានីភ្នំពេញ គឺបានដាក់ចេញនូវវិធានការយ៉ាងតឹងរ៉ឹងក្នុងការទប់ស្កាត់បាតុភាពមិនប្រក្រតី នៃការប្រមូលថវិកាពីសិស្ស មាតាបិតា អ្នកអាណាព្យាបាល។
បើតាមសេចក្តីបំភ្លឺដដែល គ្រឹះស្ថានសិក្សាសាធារណៈទទួលបានមូលនិធិដំណើរការសាលារៀនប្រចាំឆ្នាំជាមធ្យម ១៦លានរៀល សម្រាប់ដំណើរការរដ្ឋបាលសាលារៀន និងគាំទ្រការរៀន និងបង្រៀន។ ជាក់ស្ដែងផ្អែកតាមសំណូមពរ មាតាបិតា និងតម្រូវការខាងលើធ្វើឱ្យចំណាយទៅលើថ្លៃទឹក ភ្លើង និងសំរាមកើនឡើងពី ៥ ទៅ ១០ ដង នៃទំហំថវិកាដែលសាលារៀនបានទទួលពីរដ្ឋសម្រាប់ចំណាយ៕
