![](https://pppkhmer.sgp1.digitaloceanspaces.com/image/main/20242/5_2_2024_gaeb_43.jpg)
រូបភាពអ្នកស៊ីសាច់ឆ្កែថតផ្សាយតាមតិកតុក។ រូបថត CMAC
មន្ត្រីជាន់ខ្ពស់នៃអង្គភាពស៊ីម៉ាក់ បានស្នើឱ្យក្រសួងកិច្ចការនារី និងក្រសួងវប្បធម៌ ចាត់វិធានការអប់រំ លើស្ដ្រីដែលបានផលិតវីដេអូបរិភោគសាច់សុនខ និងស្នើឱ្យសមត្ថកិច្ចពាក់ព័ន្ធ ត្រូវគិតគូររៀបចំច្បាប់ជាតិមួយហាមឃាត់ការបរិភោគសាច់សុនខ ដូចបណ្តាប្រទេសជឿនលឿនមួយចំនួនលើពិភពលោកដែរ។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានឃើញស្ត្រីខែ្មរប៉ុន្មាននាក់ផលិតវីដេអូ ពីការចម្អិន និងការបរិភោគសាច់សុនខ ហើយបានធ្វើការផ្សព្វផ្សាយតាមបណ្តាញសង្គមតិកតុក(TikTok)។
លោកបានលើកឡើងថា៖ «ខ្ញុំសង្វេគ និងសោកស្តាយបំផុតចំពោះទង្វើរបស់ស្ត្រីខ្មែរប៉ុន្មាននាក់នេះ ដែលធ្វើឱ្យប៉ះពាល់ធ្ងន់ធ្ងរដល់តម្លៃស្ត្រីខែ្មរដ៏ល្អប្រពៃថ្លៃថ្លា ប៉ះពាល់ដល់សីលធម៌ប្រពៃណីសង្គម ប៉ះពាល់អារម្មណ៍ទេសចរអន្តរជាតិ និងពិសេសជាទង្វើដែលគួរតែមានច្បាប់ហាមឃាត់»។
អង្គភាពស៊ីម៉ាក់តែងតែយកចិត្តទុកដាក់អាណិតស្រឡាញ់សត្វសុនខ ជាសហការីដ៏ស្មោះត្រង់ និងជាកម្លាំងជំនាញជួយសង្គ្រោះអាយុជីវិតមនុស្ស ជាពិសេសប្រជាពលរដ្ឋដែលរងការគំរាមកំហែងដោយសារគ្រាប់មីននិងសំណល់ជាតិផ្ទុះពីសង្គ្រាម។ នេះបើយោងតាមទំព័រហ្វេសប៊ុករបស់លោក ហេង រតនា បានឱ្យដឹងកាលពីថ្ងៃទី២ ខែកុម្ភៈ ឆ្នាំ២០២៤។
លោកបានលើកឡើងទៀតថា៖ «នៅចំពោះមុខនេះ ខ្ញុំសូមសំណូមពរកម្លាំងសមត្ថកិច្ចពាក់ព័ន្ធ ជាពិសេសក្រសួងកិច្ចការនារី ក៏ដូចជាក្រសួងវប្បធម៌ មេត្តាជួយចាត់វិធានការអប់រំ ចំពោះមុខសញ្ញាល្មើសនេះ»។
លោក ហេង រតនា បានបន្ថែមដែរថា វិធានការបន្ទាប់ ប្រទេសកម្ពុជាក្នុងកាលៈទេសៈបែបនេះ អាចជាពេលវេលាយ៉ាងចាំបាច់ក្នុងការរៀបចំច្បាប់ជាតិមួយ ស្ដីពីហាមឃាត់ការបរិភោគសាច់សុនខ ដូចបណ្តាប្រទេសរីកចម្រើនជឿនលឿនមួយចំនួនលើពិភពលោកនេះ ដែលសូម្បីប្រទេសវៀតណាម ក៏កំពុងគិតគូររៀបចំច្បាប់ ស្ដីពីការហាមបរិភោគសាច់សុនខ ក្នុងគោលបំណងដើម្បីជាប្រយោជន៍ចូលរួមទាក់ទាញទេសចរបរទេសផងដែរ។
ជុំវិញការស្នើសុំរបស់អង្គភាពស៊ីម៉ាក់នេះ លោក ស៊ុំ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់ឱ្យដឹងនៅថ្ងៃទី៤ ខែកុម្ភៈថា ក្រសួងមិនទាន់ទទួលបានព័ត៌មានលម្អិតពីបញ្ហានេះនៅឡើយទេ ប៉ុន្តែក្រសួងនឹងពិនិត្យមើលសកម្មភាពនៃការផលិតវីដេអូទាំងនោះមុននឹងមានវិធានការអប់រំ។
លោកបានបញ្ជាក់ថា៖ «ខ្ញុំនឹងពិនិត្យព័ត៌មាននេះសិន ប៉ុន្តែបច្ចុប្បន្នក្រសួងវប្បធម៌ ពុំទាន់មានប្រតិកម្មអ្វីនៅឡើយទេ»។
ចំណែកលោកស្រី ញាណ សុចិត្រា អគ្គនាយកដ្ឋានអភិវឌ្ឍន៍សង្គម នៃក្រសួងកិច្ចការនារី ក៏បានប្រាប់ឱ្យដឹងដែរថា លោកស្រីមិនអាចឆ្លើយតបបានភ្លាមៗ ទៅនឹងនីតិវិធីរបស់ក្រសួង ដើម្បីចាត់វិធានការអប់រំលើក្រុមស្ដ្រីដែលបានផលិតវីដេអូផ្សព្វផ្សាយទាក់ទងនឹងសកម្មភាពចម្អិន និងបរិភោគសាច់សុនខនេះបានទេ ព្រោះក្រសួងមានក្រុមការងារដែលទទួលបន្ទុកទាក់ទងនឹងបញ្ហាសីលធម៌សង្គមនេះ។
លោកស្រីបានបន្ថែមថា៖ «ការងារនេះ ទាក់ទងនឹងសីលធម៌សង្គម គឺយើងមានក្រុមការងារទទួលបន្ទុកលេខាធិការដ្ឋានគណៈកម្មាធិការលើកកម្ពស់សីលធម៌សង្គម។ ដូច្នេះយើងបានផ្ញើជូនថ្នាក់ដឹកនាំទទួលបន្ទុកហើយ ដើម្បីពិភាក្សាគ្នាលើករណីហ្នឹង»។
សូមបញ្ជាក់ដែរថា កាលពីឆ្នាំ២០២០ កន្លងមក នៅក្នុងប្រទេសកម្ពុជា មានតែខេត្តសៀមរាបប៉ុណ្ណោះ ដែលបានដាក់បម្រាមហាមឃាត់មិនឱ្យមានការសម្លាប់ និងការជួញដូរសត្វសុនខ (ឆ្កែ)។ ប៉ុន្តែបើតាមលោក ទា គីមសុទ្ធ ប្រធានមន្ទីរកសិកម្មខេត្តសៀមរាប បានលើកឡើងថា ទោះបីឥឡូវនេះ ក្រោយពីការដាក់បម្រាមហាមឃាត់ទាំងនោះមក ខេត្តសៀមរាប គឺលែងមានករណីជួញដូរសត្វសុនខជាលក្ខណៈខ្នាតធំបន្តទៀតនោះទេ តែនៅមានប្រជាពលរដ្ឋខ្លះ ពួកគាត់បានលួចលាក់សម្លាប់សត្វសុនខសម្រាប់បរិភោគជាលក្ខណៈគ្រួសារ។
លោកបានថ្លែងថា៖ «នៅពេលរកឃើញមានបទល្មើសនេះម្ដងៗ យើងមិនបានដាក់ទោសគាត់ទេ ប៉ុន្តែយើងចុះទៅប្រជុំដើម្បីអប់រំគាត់ឱ្យយល់ពីផលប៉ះពាល់ដល់សុខភាពដែលបរិភោគសាច់សុនខ។ កាលដែលយើងមិនដាក់ទោសនេះ ក៏ព្រោះតែកម្ពុជាយើងមិនទាន់មានច្បាប់ចែងហាមឃាត់បរិភោគសត្វសុនខ»។
បើទោះបីកម្ពុជាមិនទាន់មានច្បាប់ចែងពីការហាមឃាត់បរិភោគសត្វសុនខក្ដី ប៉ុន្តែការដើរទាក់ទិញ-លក់ និងពិឃាតសត្វយ៉ាងអនាធិបតេយ្យ ដោយគ្មានការអនុញ្ញាត គឺវាផ្ទុយនឹងច្បាប់ស្ដីពីសុខភាពសត្វ និងផលិតកម្មសត្វ ដែលត្រូវទទួលទោសយ៉ាងធ្ងន់ធ្ងរតាមមាត្រា១១២ ១១៣ និងមាត្រ១១៥នៃច្បាប់នេះ។ នេះបើតាមការបន្ថែមរបស់លោក ទា គីមសុទ្ធ។
សូមរំឭកផងដែរថា នាពេលថ្មីៗនេះ រាជរដ្ឋាភិបាលប្រទេសកូរ៉េខាងត្បូង បានសម្រេចដាក់ឱ្យអនុវត្តច្បាប់ហាមឃាត់ការបរិភោគសាច់សុនខ ដែលច្បាប់នេះ អាចធ្វើការផាកពិន័យជនល្មើសជាទឹកប្រាក់ជាង ២២០០០ដុល្លារឬជាប់គុករយៈពេល ៣ឆ្នាំ ខណៈដែលប្រពៃណីប្រទេសនេះតាំងពីបុរាណមក បានចាក់ឫសយ៉ាងជ្រៅដែលប្រជាជនចូលចិត្តបរិភោគសាច់សុនខ៕