មន្ដ្រីជំនាញកត់ត្រាអត្ដសញ្ញាណថ្ម នៅថ្ងៃទី៥ កុម្ភៈ ។ រូបថត អាជ្ញាធរជាតិអប្សរា
សៀមរាបៈ មន្ត្រីជំនាញជួសជុលនៅខឿនរួតទី១ របស់ប្រាសាទបាយ័ននៃអាជ្ញាធរជាតិអប្សរាបានឱ្យដឹងថា ថ្មប្រាសាទជាង ៤០០ ដុំ ក្នុងចំណោមថ្មជាង ២ ០០០ ដុំ ត្រូវបានកំណត់អត្តសញ្ញាណ និងស្គាល់ទីតាំងដើមរបស់វា ខណៈថ្មជាច្រើនរយដុំទៀតមិនទាន់ដឹងប្រភពមកពីណានៅឡើយ។
កញ្ញា ម៉េង សុវណ្ណលីលីន ស្ថាបត្យករ និងជាអ្នកគ្រប់គ្រងការដ្ឋានជួសជុលខឿនរួតទី១ ប្រាសាទបាយ័ន បានឱ្យដឹងថា មុននឹងឈានដល់ការជួសជុលថ្មកម្រាលដែលស្រុត និងជួសជុលប្រព័ន្ធបង្ហូរនៅទិសខាងត្បូងឆៀងខាងលិចនៅរួតទី១ នៃប្រាសាទបាយ័នឡើងវិញ គឺដំបូង ក្រុមការងារត្រូវរើគំនរថ្មដែលនៅខាងក្រោយជញ្ជាំងរោងទងនៃទីតាំងជួសជុលជាចាំបាច់។
កញ្ញាបានបន្តថា ការងារជំហានទី១ គឺត្រូវចុះបញ្ជីថ្មនីមួយៗ និងរើម្តងមួយៗ បែងចែកទៅតាមប្រភេទថ្ម ដើម្បីងាយស្រួលរកតួនាទី និងទីតាំងរបស់វា លើកលែងតែថ្មដំបូលទាំងអស់ហ្នឹងត្រូវយកចេញទៅខាងក្រៅ រៀបគរលើគ្នាឱ្យមានសណ្ដាប់ធ្នាប់ អ្វីដែលយើងចង់បានគឺរកឃើញផ្នែកខាងលើបំផុតនៃតួប្រាង្គមុខ ៤។ នេះបើយោងតាមហ្វេសប៊ុកអាជ្ញាធរជាតិអប្សរា នៅថ្ងៃទី ៥ ខែកុម្ភៈ ឆ្នាំ ២០២៤។
កញ្ញា ម៉េង សុវណ្ណលីលីន បានបញ្ជាក់ថា៖ «ជាផែនការ ក្រុមការងារនឹងព្យាយាមរុករកទីតាំងដើមរបស់គំនរថ្មនីមួយៗ ហើយប្រសិនបើមានលទ្ធភាពនឹងរៀបចំថ្មដែលរកឃើញទាំងអស់នោះទៅទីតាំងដើមវិញនាពេលអនាគត»។
បើតាមអាជ្ញាធរជាតិអប្សរា ក្នុងចំណោមថ្មចំនួនប្រមាណ ២ ០០០ ដុំ គរនៅទីតាំងខាងត្បូងឆៀងខាងលិចប្រាសាទបាយ័ន ដែលចាប់ផ្តើមរើតាំងពីពាក់កណ្តាលខែមករា ឆ្នាំ ២០២៤ ត្រូវបានរកឃើញចំនួនជាង ៤០០ដុំ ដែលអាចកំណត់អត្តសញ្ញាណបានថា គឺជាថ្មធ្លាក់មកពីថែវទី២ និងកំពូលព្រហ្មមុខ ៤ នៅជ្រុងនិរតីនៃប្រាសាទបាយ័ន ខណៈថ្មជាច្រើនទៀត មិនទាន់ដឹងថាមានប្រភពមកពីណានៅឡើយ។
លោក ញ៉ុក ឡូ បុគ្គលិកជួសជុលប្រាសាទរបស់អាជ្ញាធរជាតិអប្សរា និងជាអ្នកជំនាញរកថ្មបានឱ្យដឹងថា ក្នុងការរើគំនរថ្មទិសខាងត្បូងប៉ែកខាងលិចរបស់ប្រាសាទបាយ័នក្នុងជំហានដំបូងនេះ បានរកឃើញថ្ម និងអាចកំណត់អត្តសញ្ញាណជាច្រើនប្រភេទដូចជា ថ្មផ្តែ ថ្មចិញ្ចើមព្រហ្ម ថ្មទងត្រចៀករបស់ព្រហ្មមុខ៤ ថ្មសសរពេជ្រ ថ្មហោជាង និងដំបូលរបស់ប្រាសាទបាយ័ន។
លោកបានបន្តថា ដោយឡែក ថ្មមានចម្លាក់ជាទងត្រចៀក បបូរមាត់ទាំងនោះ បានជ្រុះធ្លាក់ពីកំពូលមុខព្រហ្មលេខ ២៧ រួមទាំងធ្លាក់ពីថែវទី២ ដែលនៅទល់មុខនឹងគំនរថ្មនេះតែម្តង។
លោក ញ៉ុក ឡូ បានបញ្ជាក់ថា៖ «ចំពោះដុំថ្មដែលអាចកំណត់អត្តសញ្ញាណបាន គឺត្រូវរៀបទុកមួយផ្នែកសម្រាប់យកមកផ្គុំគ្នាឡើងវិញ។ រីឯថ្មមួយចំនួនទៀត មិនទាន់អាចកំណត់អត្តសញ្ញាណបានត្រូវទុកដាច់ដោយឡែកជាបណ្តោះអាសន្នសិន»។
សូមរំឭកដែរថា កាលពីថ្ងៃទី ៣១ ខែមករា ក្រុមអ្នកជំនាញរបស់នាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានរើគំនរផ្ទាំងថ្មជាច្រើនរយដុំដើម្បីជួសជុលកម្រាលដែលស្រុត ព្រមទាំងរៀបចំប្រព័ន្ធបង្ហូរទឹកបុរាណឡើងវិញនៅរោងទងទី១ផ្នែកខាងត្បូងឆៀងខាងលិចរបស់ប្រាសាទបាយ័ន។
ប្រព័ន្ធបង្ហូរទឹកបុរាណវិញ មិនដំណើរការយូរឆ្នាំមកហើយ ហើយពេលមានភ្លៀងធ្លាក់ម្តងៗ ស្ទះទឹក ទើបក្រុមអ្នកជំនាញជួសជុលឡើងវិញដើម្បីឱ្យមានដំណើរការរំដោះទឹកចេញពីប្រាសាទបាយ័នទៅខាងក្រៅ ដើម្បីបញ្ចៀសភ្លៀងហូរចូលទៅក្នុងគ្រឹះប្រាសាទច្រើន អាចនាំឱ្យដីល្បាប់ខ្សាច់ហូរចេញទៅតាមទឹកភ្លៀង ដែលវានឹងធ្វើឱ្យគ្រឹះប្រាសាទខ្សោយ៕
