កម្មកររោងចក្រចេញពីធ្វើការនាពេលកន្លងមក។ ហេង ជីវ័ន
ក្រសួងការងារ និងបណ្តុះបណ្តាលវិជ្ជាជីវៈបានប្រកាសបន្តបើកផ្តល់ប្រាក់ឧបត្ថម្ភជូនកម្មករនិយោជិតក្នុងវិស័យកាត់ដេរ ដែលត្រូវបានព្យួរកិច្ចសន្យាការងារស្របតាមស្មារតីនៃកញ្ចប់វិធានការរបស់រាជរដ្ឋាភិបាល (លើកទី១៨) សម្រាប់ខែវិច្ឆិកា និងខែធ្នូ ឆ្នាំ២០២៣ សម្រាប់រោងចក្រទាំង១៤។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៥ ខែមករា បានឱ្យដឹងថា ក្រសួងបើកផ្ដល់ប្រាក់ឧបត្ថម្ភដល់កម្មករនិយោជិតដែលបានព្យួរកិច្ចសន្យាការងារនៃរោងចក្រ ចំនួន ១៤ ក្នុងវិស័យកាត់ដេរ ដែលត្រូវបានព្យួរកិច្ចសន្យាការងារ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល។
រោងចក្រទាំង ១៤ នោះ មាននៅរាជធានីភ្នំពេញ ខេត្តកណ្តាល កំពង់ចាម តាកែវ ស្វាយរៀង និងព្រៃវែង។
ក្រសួងបានលើកឡើងដែរថា ប្រាក់ឧបត្ថម្ភនេះ នឹងត្រូវបើកផ្តល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារ ក្នុងនោះចំនួន ៨១ ០០០ រៀល (២០ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ៧ ថ្ងៃ ដល់ ១៤ថ្ងៃ និង ១៦២ ០០០ រៀល (៤០ ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ១៥ ថ្ងៃ ដល់ ១ ខែ។
លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់ឱ្យដឹងនៅថ្ងៃទី៥ ខែកុម្ភៈថា ចាប់តាំងពីថ្ងៃទី១ ខែមេសា ឆ្នាំ២០២៣ រហូតដល់ថ្ងៃទី៥ ខែកុម្ភៈ ឆ្នាំ២០២៤ នេះមានកម្មករនិយោជិតសរុបចំនួន ១៥៣ ៩២៨នាក់ ក្នុងចំណោមកម្មករនិយោជិតចំនួន ១៦០ ៦១២ នាក់ ដែលស្មើនឹងថវិកាចំនួន ២៤,៧៣៧,៦៤៣,០០០រៀល បានបើកប្រាក់ឧបត្ថម្ភរបស់រាជរដ្ឋាភិបាលពីភ្នាក់ងារវីង។
ក្រសួងការងារបានបញ្ជាក់តាមរយៈសេចក្តីជូនដំណឹងផងដែរថា ធនាគារ វីង (ខេមបូឌា) ម.ក នឹងបង្វិលប្រាក់ឧបត្ថម្ភនេះជូនរាជរដ្ឋាភិបាលវិញ ប្រសិនជាកម្មករនិយោជិតខកខាន មិនបានទៅបើកប្រាក់ឧបត្ថម្ភនេះ ក្នុងរយៈពេល ២១ថ្ងៃ បន្ទាប់ពីទទួលបានសារតាមទូរស័ព្ទពីធនាគារ វីង។
ក្រសួងបន្តថា៖«ក្នុងករណីបងប្អូនកម្មករនិយោជិត ដែលបម្រើការងារនៅរោងចក្រទាំង១៤ នេះ មិនបានទទួលសារទូរស័ព្ទពីធនាគារ វីង សូមទំនាក់ទំនងសួរព័ត៌មានបន្ថែម ឬធ្វើបច្ចុប្បន្នភាពលេខទូរស័ព្ទរបស់ខ្លួនទៅរដ្ឋបាលរោងចក្រ របស់ខ្លួន»។
លោក ម៉ាន់ សេងហាក់ ប្រធានសហព័ន្ធសហជីពឥទ្ធិពលការងារ បានប្រាប់ឱ្យដឹងដែរ ការផ្តល់ប្រាក់ឧបត្ថម្ភពីរាជរដ្ឋាភិបាលនេះ ជារឿងល្អមួយសម្រាប់កម្មករដោះស្រាយទុក្ខលំបាកបាន ១ កម្រិត ប៉ុន្តែចំនួនប្រាក់ឧបត្ថម្ភនេះ មិនអាចទ្រទ្រង់ជីវភាពបាននោះទេដោយសារទំនិញឡើងថ្លៃ។
លោកបានថ្លែងថា៖«ខ្ញុំឃើញ សេចក្តីជូនដំណឹងរបស់ក្រសួង គេអនុវត្តតាំងពីឆ្នាំ២០២០ ក្នុងអំឡុងកូវីដ ហើយមកទល់ពេលនេះ យើងឃើញថា ៣ឆ្នាំហើយ។ ជាមួយគ្នានេះដែរ កម្មករដែលនៅមានការងារធ្វើ បានដំឡើងប្រាក់ឈ្នួល ជារៀងរាល់ឆ្នាំផងដែរ ដូចនេះ កម្មករដែលព្យួរការងារ ក៏គួរតែបូកប្រាក់បន្ថែមប្រាក់ឱ្យពួកគាត់ផងដែរ»៕
